រាជរដ្ឋាភិបាល ចេញសេចក្ដីណែនាំ ចាត់វិធានការបង្ការ ទប់ស្កាត់ការនាំចូល ការជួញដូរ ការធ្វើអាជីវកម្មនិងការប្រើប្រាស់ផលិតផល អេចឈ៏ ធី ភី (HTPs)
ភ្នំពេញ ៖ រាជរដ្ឋាភិបាលកម្ពុជា បានចេញសេចក្ដីណែនាំ ស្ដីពី ចាត់វិធានការបង្ការ ទប់ស្កាត់ការនាំចូល ការជួញដូរ ការធ្វើអាជីវកម្មនិងការប្រើប្រាស់ផលិតផល អេចឈ៏ ធី ភី (HTPs) នៃព្រះរាជាណាចក្រកម្ពុជា នៅថ្ងៃទី១៨ ខែមីនា ឆ្នាំ២០២១។ សេចក្ដីណែនាំនេះ ហាមឃាត់ ការប្រើប្រាស់ ការនាំចូល ការជួញដូរ និងការធ្វើអាជីវកម្ម បារីអេឡិចត្រូនិកគ្រប់ប្រភេទ រួមបញ្ចូលទាំង អេចឈ៏ ធី ភី (HTPs)។ នេះបើតាមសេចក្ដីប្រកាសព័ត៌មានរបស់អង្គការចលនាដើម្បីសុខភាពកម្ពុជា ដែលបានចេញផ្សាយនៅថ្ងៃចន្ទនេះ។
លោកវេជ្ជបណ្ឌិត មុំ គង់ នាយកប្រតិបត្តិនៃអង្គការចលនាដើម្បីសុខភាពកម្ពុជា បានសាទរចំពោះចំណាត់ការនេះ ដោយមានមានប្រសាសន៍ថា៖ “ការដាក់ចេញនូវសេចក្តីណែនាំនេះ បានរួមចំណែកដល់ការទប់ស្កាត់ការរាតត្បាតចូលសហគមន៍នៃជំងឺកូវីដ ១៩ ដែលប្រទេសកម្ពុជាកំពុងយកចិត្តទុកដាក់។ មានយុវជនកម្ពុជាមួយចំនួន កំពុងប្រើប្រាស់ឧបករណ៍ជក់បារីអេឡិកត្រូនិក និងអេចឈ៍ ធី ភី រួមគ្នា ដែលជាកត្តាហានីភ័យយ៉ាងធំនៃការចម្លងជំងឺកូវីដ ១៩ ពីម្នាក់ទៅម្នាក់”។
បច្ចុប្បន្ន យើងសង្កេតឃើញថា បារីអេឡិចត្រូនិក និងអេចឈ៏ ធី ភី ត្រូវបានគេផ្សព្វផ្សាយលក់ យ៉ាងគគ្រឹកគគ្រេងតាមរយៈបណ្ដាញពត៌មានសង្គម ដែលធ្វើអោយប្រជាពលរដ្ឋ ជាពិសេសយុវជនចាប់ផ្ដើម និងបន្តការប្រើប្រាស់។
អាជ្ញាធរជាតិប្រយុទ្ធប្រឆាំងគ្រឿងញៀន បានអោយដឹងថា ការប្រើប្រាស់បារីអេឡិកត្រូនិក និងអេចឈ៍ ធី ភី អាចជាច្រកទ្វារមួយ ទៅកាន់ការប្រើប្រាស់គ្រឿងញៀនខុសច្បាប់ផ្សេងទៀត។
អង្គការសុខភាពពិភពលោក (WHO) បានបញ្ជាក់ថា ការប្រើប្រាស់បារីអេឡិចត្រូនិក និងអេចឈ៏ ធី ភី (HTPs) បណ្ដាលឲ្យញៀន កើតជម្ងឺសួតធ្ងន់ធ្ងរ រហូតបាត់បង់ជីវិត។ យោងតាមមជ្ឈមណ្ឌលពិនិត្យត្រួតពិនិត្យជំងឺ (Centers for Diseases Control (CDC)នៃសហរដ្ឋអាមេរិក បានឲ្យដឹងថា ការប្រើប្រាស់ បារីអេឡិចត្រូនិក និងអេចឈ៏ ធី ភី (HTPs) បង្កើនហានិភ័យនៃជំងឺបេះដូងនិងជំងឺសួត ហើយគិតត្រឹមខែកុម្ភៈឆ្នាំ២០២០ នៅសហរដ្ឋអាមេរិក មានការរងរបួសសួតប្រមាណជិត ៣០០០ករណី ពាក់ព័ន្ធការប្រើប្រាស់បារីអេឡិកត្រូនិច និងអេចឈ៏ ធី ភី (HTPs) ក្នុងនោះមានអ្នកស្លាប់ជិត៧០នាក់៕
