អាជ្ញាធរកោះហៅស្ត្រីម្នាក់លក់មីឆាបាយឆា តែងតែបោសកាកសំណល់ទម្លាក់ ចូលក្នុងរ៉ឺហ្គែលូ មកធ្វើការអប់រំនិងធ្វើកិច្ចសន្យាឲ្យបញ្ឈប់
ភ្នំពេញ ៖ ជារៀងរាល់យប់ ក្រោយពីឈប់លក់មីឆាបាយឆា នៅទីតាំងមុខពេទ្យ ធ្មេញចាក់អង្រែស្ត្រីម្នាក់នេះ តែងតែបោសកាកសំណល់ទម្លាក់ ចូលក្នុងលូខាងមុខនេះ។ បន្ទាប់ពីមានករណីនេះកើតឡើងមកនោះ តាមការណែនាំរបស់លោកឃួង ស្រេង អភិបាលរាជធានីភ្នំពេញ អាជ្ញាធរខណ្ឌមានជ័យ បានកោះហៅស្ត្រីរូបនោះ មកធ្វើកិច្ចសន្យាបញ្ឈប់សកម្មភាព បោសសម្រាម និងចាក់កាកសំណល់ផ្សេងៗ ចូលក្នុងរ៉ឺហ្គូលូទៀត។
យោងតាមកំណត់ហេតុរបស់រដ្ឋបាលសង្កាត់ចាក់អង្រែក្រោម នៅថ្ងៃទី២២ ខែមីនាឆ្នាំ២០២១នេះ ស្តីពីការពិនិត្យនិងធ្វើកិច្ចសន្យា ការបោសសំរាមចូលក្នុងរ៉ឺហ្គែលូ នៅមុខពេទ្យធ្មេញចាក់អង្រែ ភូមិទួលរកា សង្កាត់ចាក់អង្រែក្រោម ខណ្ឌមានជ័យ បានបញ្ជាក់ថា នាព្រឹកថ្ងៃទី២២ខែមីនាឆ្នាំ២០២១នេះ លោកឌី រ័ត្នខេមរុណ អភិបាលរងខណ្ឌមានជ័យ បានដឹកនាំកម្លាំងចម្រុះ និងកម្លាំងនគរបាលប៉ុស្តិ៍ចាក់អង្រែក្រោម ចុះមកទីតាំងស្ថិតនៅផ្ទះលេខ៦១០ ក្រុមទី១៣ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ដែលមានម្ចាស់ផ្ទះឈ្មោះ លី សារ៉េត ភេទស្រី អាយុ២៧ឆ្នាំ។
តាមរយៈរបាយការណ៍បានបញ្ជាក់បន្ថែមថា លោកឌី រ័ត្នខេមរុណ អភិបាលរងខណ្ឌមានជ័យ បានពិនិត្យឃើញថាទីតាំងខាងលើឈ្មោះ លីសារ៉េត មុខរបរលក់មីឆាលតឆា នៅក្រុមទី១៣ ភូមិទួលរកា សង្កាត់ចាក់អង្រែក្រោម ខណ្ឌមានជ័យ មុខពេទ្យធ្មេញចាក់អង្រែ បានបោសសំរាមចូលរ៉ឺហ្គែលូប្រាកដមែន លោកក៏បានធ្វើការអប់រំនិងធ្វើកិច្ចសន្យាឲ្យបញ្ឈប់ការបោសសំរាមចូលក្នុងរ៉ឺហ្គែលូបន្តទៀត ពុំដូចនោះទេអាជ្ញាធរ នឹងចាត់ការតាមនីតិវិធីច្បាប់ហើយ។
ក្នុងកិច្ចសន្យា បានបញ្ជាក់ថា ឈ្មោះ លី សារ៉េត អាយុ ២៧ ឆ្នាំ សញ្ជាតិ ខ្មែរ ស្នាក់នៅផ្ទះជួលលេខ ២ ផ្លូវជាតិលេខ២ ក្រុមទី១៧ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មុខរបរ លក់មីឆាបាយឆា នៅទីតាំងមុខពេទ្យ ធ្មេញចាក់អង្រែ ផ្លូវជាតិលេខ២ ក្រុមទី១៣ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។ លេខទូរស័ព្ទទំនាក់ទំនង៖ ០៨៦៨៩២៥២១ ។
ឈ្មោះ លី សារ៉េតសូមធ្វើកិច្ចសន្យាដូចខាងក្រោម ៖ នាងខ្ញុំសូមធ្វើកិច្ចសន្យាបញ្ឈប់សកម្មភាព បោសសម្រាម និងចាក់កាកសំណល់ផ្សេងៗ ចូលក្នុងរ៉ឺហ្គូលូ ទៀត ហើយ បើថ្ងៃក្រោយនាងខ្ញុំនៅតែបន្តធ្វើកម្មភាពនេះទៀត សូមឲ្យអាជ្ញាធរអនុវត្តន៍តាមផ្លូវច្បាប់ជាធរមាន ។ នាងខ្ញុំសូមសន្យា អនុវត្តឲ្យបានម៉ឺងម៉ាត់បំផុតតាមកិច្ចសន្យាខាងលើនេះ ។ ក្រែងពុំប្រាកដ នាងខ្ញុំ សូមផ្តិតមេដៃស្តាំទុកជាភ័ស្តុតាងស្រាប់ និងដើម្បីទទួលខុសត្រូវចំពោះមុខច្បាប់ ។
សូមបញ្ជាក់ថា ឧត្តមសេនីយ៍ ទី ចំរើន កុសល បានសរសេរសារលើហ្វេសប៊ុកថា សកម្មភាពបែបនេះគឺមានជារៀងរាល់យប់ ក្រោយពីឈប់លក់ស្ត្រីម្នាក់នេះ តែងតែបោសកាកសំណល់ទម្លាក់ ចូលក្នុងលូខាងមុខនេះ។ ស្នើសុំដល់សាលារាជធានីភ្នំពេញមេត្តា មានវិធានការចំពោះបុគ្គលម្នាក់នេះ ជាបន្ទាន់ទាន់។ សកម្មភាពនេះកើតឡើងកាលពីយប់ ថ្ងៃទី២១-០៣-២០២១ នៅជាប់ ពេទ្យធ្មេញចក្រអង្រៃ ក្នុងទឹកដីសង្កាត់ ចាក់អង្រែក្រោម ខណ្ឌមានជ័យ៕
