ឃុំខ្លួនមនុស្សប្រុសស្រី៣នាក់ ករណីស្រវឹងបើកឡាន រារាំងដល់ការអនុវត្តវិធានការរដ្ឋបាល
ខេត្តកណ្ដាល ៖ មនុស្សប្រុសស្រី៣នាក់ មានម្នាក់ជាមន្ត្រីយោធានៅនាយកដ្ឋានវិស្វកម្ម នៃក្រសួងការពារជាតិ បាននាំគ្នាផឹកស៊ីស្រវឹងធ្លាក់ភ្នែក រួចបើករថយន្តពណ៌ត្រេអ៊ីពាក់ផ្លាកលេខ ខ.ម មកបំពាន រារាំងដល់ការអនុវត្តវិធានការរដ្ឋបាលនៅចំណុចគោលដៅ បិទខ្ទប់ នាក្រុងតាខ្មៅ ខេត្តកណ្តាល នៅល្ងាចថ្ងៃទី២៥ ខែមេសា ឆ្នាំ២០២១ នេះ ត្រូវបានលោក វ៉ាន់ សុបញ្ញា ចៅក្រមស៊ើបសួរសាលាដំបូងខេត្តកណ្តាល សម្រេចឃុំខ្លួនដាក់ពន្ធនាគារ បណ្តោះអាសន្ន ក្រោមការចោទប្រកាន់ពីបទ មិនគោរពវិធានការរដ្ឋបាល តាមមាត្រា៤ និង មាត្រា១០ នៃច្បាប់ស្តីពីកូវីដ ។
បើតាមរបាយការណ៍របស់អធិការដ្ឋាននគរបាលក្រុងតាខ្មៅ បានឲ្យដឹងថា មនុស្សប្រុសស្រី៣នាក់ ត្រូវបាននគរបាលខេត្តកណ្ដាលចាប់ខ្លួន បញ្ជូនមកអធិការដ្ឋាននគរបាលក្រុងតាខ្មៅ ដើម្បីអនុវត្តតាមនីតិវិធីច្បាប់ ក្នុងករណីស្រវឹងស្រា បានរារាំងដល់ការអនុវត្តវិធានការរដ្ឋបាល ។ ករណីនេះកើតឡើងនៅវេលាម៉ោង២១និង៤០នាទី ថ្ងៃទី២៤ ខែមេសា ឆ្នាំ២០២១ ស្ថិតនៅចំណុច ផ្លូវ១១៥ជិតស្តុប៦០ម៉ែត្រ ភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្តាល។
មន្ត្រីនគរបាលក្រុងតាខ្មៅបានបញ្ជាក់ឲ្យដឹងថា ជនសង្ស័យ០៣នាក់ ទី១.ឈ្មោះ គឹម ពិសិដ្ឋ ភេទប្រុស អាយុ៣៣ឆ្នាំ ជនជាតិខ្មែរ ទីលំនៅ ភូមិទួលគោក សង្កាត់ទួលសង្កែ ខណ្ឌឬស្សី ភ្នំពេញ មុខរបរយោធា នៅនាយកដ្ឋាន វិស្វកម្ម (ឃាត់ខ្លួន) មានកំរិតជាតិ អាកុល ០.០៧៦មីលី្លត្រខ្យល់ ទី២.ឈ្មោះ សាត សុម៉ាលី ភេទស្រី អាយុ៤២ឆ្នាំ មានទីលំនៅបូរីពិភពថ្មី២ ភូមិ ព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរលក់ដូរ (ឃាត់ខ្លួន) និងទី៣.ឈ្មោះ ណី ប៊ុនធឿន ភេទប្រុស អាយុ៤២ឆ្នាំ មានទីលំនៅ បូរីប៉េងហួត ផ្លូវ៦០ម៉ែត្រ សង្កាត់ បឹងទំពន់ ខណ្ឌមានជ័យ ភ្នំពេញ មុខរបរគ្រូចិនសែ (ឃាត់ខ្លួន)។
ដោយឡែកវត្ថុតាងចាប់យករួមមាន ៖ រថយន្ត១គ្រឿងម៉ាក ford evrest ពណ៌ ត្រេអ៊ី ផ្លាកលេខ ខម០១២-៧២០៤ ។
ប្រភពដដែលបន្តថា មុនពេលហេតុ នៅវេលាកើតហេតុខាងលើ ពេលដែលកម្លាំងចម្រុះកំពុងតែឈរយាម នៅគោលដៅផ្លូវ១១៥ជិតស្តុប៦០ម៉ែត្រ មិនឲ្យប្រជាពលរដ្ឋចេញចូល បើគ្មានការចាំបាច់ ដើម្បីទប់ស្កាត់ការឆ្លងរាលដាលជំងឺកូវីដ១៩ ពេលនោះស្រាប់តែឃើញជនសង្ស័យ០៣នាក់ខាងលើ ក្នុងស្ថានភាពស្រវឹង បានជិះរថយន្តមកដល់ ដោយ ឈ្មោះ គឹម ពិសិដ្ឋ ជាអ្នកបើក ហើយសមត្ថកិច្ច ក៏បានឃាត់សួរនាំ រួចបញ្ជូនខ្លួន មកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរនិងចាត់ការតាមនីតិវិធី។ ជនសង្ស័យទាំង ៣រូបខាងលើ សមត្ថកិច្ចធ្វើកំណត់ហេតុស្តាប់ចម្លើយកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធី៕
