អាជ្ញាធរប្រទេសBelarus បង្ខំឲ្យយន្តហោះដឹកអ្នកដំណើរ ចុះចត និងចាប់ខ្លួនអ្នកកាសែតម្នាក់របស់ក្រុមប្រឆាំង

ចេញផ្សាយ ថ្ងៃទី 24 ខែ ឧសភា ឆ្នាំ 2021

រ៉យទ័រ៖ កាលពីថ្ងៃអាទិត្យអាជ្ញាធរប្រទេស Belarus បានបញ្ជាឲ្យយន្តហោះចម្បាំងមួយគ្រឿងចេញប្រតិបត្តិការប្រកាសសញ្ញា អាសន្នក្លែងក្លាយថាមានគ្រាប់បែក ដើម្បីបង្ខំឲ្យយន្តហោះរបស់ក្រុមហ៊ុនអាកាសចរណ៍ Ryanair ចុះចត បន្ទាប់មកបានចាប់អ្នកកាសែតរបស់ក្រុមប្រឆាំងម្នាក់នៅលើយន្តហោះនោះ ដែលទង្វើនេះបាន ទទួលការថ្កោលទោសពីសហភាពអឺរ៉ុប និងសហរដ្ឋអាមេរិក។

យន្តហោះរបស់ក្រុមហ៊ុន Ryanair ជើងហោះហើរលេខៈ 4978 ឆ្ពោះទៅកាន់ទីក្រុង Vilnius នៃប្រទេសលីតូនី (Lithuania) ដែលកំពុងហោះហើរនៅលើលំហអាកាសនៃដែនដីរបស់សហភាពអឺរ៉ុប ត្រូវបានបង្ខំឱ្យបង្វែរទិសចុះចតនៅអាកាសយានដ្ឋាននៅជិតបំផុត នៃរដ្ឋធានីម៉ិនស៍ (Minsk) របស់ប្រទេសបេឡារ៉ូស (Belarus) ដោយប្រើប្រាស់លេសក្លែងក្លាយថាមានគ្រឿងផ្ទុះបង្កប់ក្នុងយន្តហោះ។

ប្រធានាធិបតីបេឡារ៉ូស បានបញ្ជាឱ្យយន្តរបស់កងទ័ពអាកាសបេឡារ៉ូស MiG29 ហោះប្រដេញតាមយន្តហោះដឹកអ្នកដំណើរដែលមានអ្នកដំណើរចំនួន ១៩៧នាក់ ដឺលក្នុងចំណោមនោះក៏មានសកម្មជនប្រឆាំងផងដែរ ដើម្បីបង្ខំឱ្យបង្វែរទិសចុះចត។
នៅពេលយន្តហោះចុះចតនៅអាកាសយានដ្ឋានរដ្ឋធានីម៉ិនស៍ភ្លាម អាជ្ញាធរបានចាប់ខ្លួនលោក ប្រ៉ូតាសេវិច (Protasevich) ដែលគេដឹងថាជាសកម្មជនប្រឆាំងនិងជាអ្នកសារព័ត៌មានសញ្ចាតិបេឡារ៉ូស និងមិត្តស្រី ដែលរស់នៅនិរទេសនៅប្រទេសលីតូនី។

ទីភ្នាក់ងារសារព័ត៌មាន Delfi របស់ Lithuania បានដកស្រង់សម្តីរបស់អ្នកដំណើរមួយរូបដែលនិយាយថា លោក Protasevich បានអង្គុយដោយមានការភិតភ័យយ៉ាងខ្លាំងហើយដាក់ដៃនៅលើក្បាលនៅពេលដែលដឹងថាជើងហោះហើរឆ្ពោះទៅកាន់ទីក្រុង Minsk ។ យោងតាមរបាយការណ៍ នៅពេលគាត់ត្រូវបាននាំចេញទៅ គាត់បាននិយាយថា “ខ្ញុំនឹងទទួលទោសប្រហារជីវិតនៅទីនេះ” ។ ប៉ុន្តែរ៉យទ័រមិនអាចផ្ទៀងផ្ទាត់របាយការណ៍នោះបានទេ។

អ្នកកាសែតវ័យ ២៦ ឆ្នាំរូបនេះបានធ្វើការឲ្យភ្នាក់ងារព័ត៌មានអនឡាញដែលមានមូលដ្ឋាននៅប៉ូឡូញឈ្មោះ NEXTA បានចាក់ផ្សាយនូវការធ្វើបាតុកម្មទ្រង់ទ្រាយធំប្រឆាំងនឹងប្រធានាធិបតី ប្រទេស Belarus លោក Alexander Lukashenko កាលពីឆ្នាំមុន តាមរយៈកម្មវិធីផ្ញើសារតាមបណ្តាញសង្គម Telegram នៅពេលដែលប្រព័ន្ធផ្សព្វផ្សាយបរទេសពិបាកធ្វើការចាក់ផ្សាយ។

លោក Protasevich ដែលបច្ចុប្បន្នបម្រើការឱ្យបណ្តាញព័ត៌មាន Telegram ផ្សេងមួយទៀតដែលមានឈ្មោះថា Belamova ត្រូវបានគេចាប់ខ្លួននៅក្នុងប្រទេស Belarus ដោយបទចោទប្រកាន់ពីបទជ្រុលនិយម និងរៀបចំកុប្បកម្មទ្រង់ទ្រាយធំ និងជាការញុះញង់ឲ្យមានការស្អប់ខ្ពើមសង្គម ជាបទចោទប្រកាន់ ដែល លោកបានបដិសេធ ។

លោកប្រធានាធិបតីប្រទេស Belarusត្រូវបានចោទប្រកាន់ពីបទរៀបចំមហាកូដកម្មប្រឆាំងនឹងការកាន់អំណាចយូរអង្វែងរយៈពេល ២៦ឆ្នាំ របស់ប្រធានាធិបតីបេឡារ៉ូស Alexander Lukashenko និងពីបទញុះញង់ឱ្យមានការស្អប់ខ្ពើមសង្គម។ ប៉ុន្មានម៉ោងក្រោយមក អ្នកដំណើរផ្សេងទៀតត្រូវបានអនុញ្ញាតឱ្យឡើងយន្តហោះ ដើម្បីបន្តដំណើរទៅកាន់ប្រទេសគោលដៅ។

ប្រធានាធិបតីលីតូនីដែលជាសមាជិកសហភាពអឺរ៉ុបបានចោទរដ្ឋាភិបាលរបស់ប្រធានាធិបតី Alexander Lukashenko ថាបានប្រព្រឹត្តអំពើភេរវកម្មគាំទ្រដោយរដ្ឋ និងបានស្នើឱ្យដាក់ទណ្ឌកម្មធ្ងន់ធ្ងរ។ ចំណែកប្រធានកិច្ចការនយោបាយបរទេសរបស់សហភាពអឺរ៉ុបបានថ្កោលទោសនិងបានចាត់ទុកអំពើនេះ គឺជាការប្លន់យន្តហោះ និងជាការប៉ុនប៉ងបំបិទសម្លេងប្រឆាំង។

សហរដ្ឋអាមេរិកនិងចក្រភពអង់គ្លេសទាមទារឱ្យដោះលែងសកម្មជនប្រឆាំងរូបនេះជាបន្ទាន់ និងក៏បានទាមទារឱ្យក្រុមប្រឹក្សានៃអង្គការអាកាសចរណ៍ស៉ីលអន្តរជាតិស៊ើបអង្កេតឧប្បដិហេតុននេះ។ ចំណែកក្រុមហ៊ុនយន្តហោះ Ryanair បានថ្លែងថាឧប្បដិហេតុ កាលពីថ្ងៃអាទិត្យ គឺ«អំពើប្លន់គាំទ្រដោយរដ្ឋ៕