ផ្ទុះកូវីដ-១៩នៅក្នុងរោងចក្រ H7 ដាក់ពង្រាយរនាំងដែក និងដាក់ពង្រាយកម្លាំង បិទខ្ទប់ ចំនួន១៤គោលដៅ ម្តុំផ្សារព្រៃទា
ភ្នំពេញ ៖ អគ្គស្នងការដ្ឋាននគរបាលជាតិ បានឲ្យដឹងថា កម្លាំងនគរបាលរាជធានីភ្នំពេញ អនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានចុះសហការជាមួយកម្លាំងគណៈបញ្ជាការឯកភាពខណ្ឌពោធិ៍សែនជ័យ បាននាំយករនាំងដែក និងដាក់ពង្រាយកម្លាំងបិទខ្ទប់ចំនួន១៤គោលដៅម្តុំផ្សារព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញនៅយប់ថ្ងៃទី២៤ ខែឧសភា ខណៈជំងឺកូវីដ១៩ បានផ្ទុះរាលដាលក្នុងរោងចក្រ H7 នៅម្តុំផ្សារព្រៃទា ដែលមានកម្មករប្រមាណជាង១០០នាក់បានឆ្លងជំងឺកូវីដ១៩ ហើយអ្នកពាក់ព័ន្ធបានកំពុងបន្តយកសំណាកធ្វើតេស្តផងដែរ ។
ការដាក់រនាំងដែកបិទខ្ទប់និងពង្រាយកម្លាំងការពារនៅគោលដៅម្តុំផ្សារព្រៃទា រោងចក្រ H7គេឃើញមានវត្តមានដឹកនាំកម្លាំងដោយលោក មាន ចាន់យ៉ាដា អភិបាលរងរាជធានីភ្នំពេញ និងលោកវរសេនីយ៍ឯក សែម រតនា នាយការិយាល័យនគរបាលចរាចរណ៍ នៃស្នងការដ្ឋាននគរបាលរាជធានីភ្នំពេញ គឺហាមឃាត់មិនឱ្យប្រជាពលរដ្ឋនៅក្នុងភូមិសាស្ត្រខាងលើធ្វើដំណើរចេញ-ចូល ឬក៏មិនអនុញ្ញាតឱ្យប្រជាពលរដ្ឋនៅខាងក្រៅធ្វើដំណើរចូលក្នុងតំបន់នោះទេ ដើម្បីបង្ការទប់ស្កាត់កុំឱ្យមានការឆ្លងរីករាលដាលជំងឺកូវីដ-១៩ ទៅតំបន់ផ្សេងទៀត ។ខណៈដែលរដ្ឋបាលរាជធានីភ្នំពេញបានប្រកាសសេចក្ដីជូនដំណឹង បង្ហាញឱ្យដឹងថារយៈពេល២៤ម៉ោងចុងក្រោយនេះ នៅរាជធានីភ្នំពេញ រកឃើញករណីវិជ្ជមានកូវីដ-១៩ ចំនួន ២៦០នាក់ ដែលជាករណីឆ្លងក្នុងសហគមន៍ ។
រដ្ឋបាលរាជធានីភ្នំពេញ សូមអំពាវនាវដល់បងប្អូនប្រជាពលរដ្ឋដែលបានប្រាស្រ័យទាក់ទងជាមួយអ្នកជំងឺកូវីដ-១៩ទាំងនេះ ត្រូវរាយការណ៍ជូនអាជ្ញាធរមូលដ្ឋានជាបន្ទាន់ និងរួសរាន់ទៅយកសំណាកនៅតាមទីតាំងដែលបានកំណត់ក្នុងភូមិសាស្ត្ររាជធានីភ្នំពេញ ។
សូមបញ្ជាក់ថា រាជធានីភ្នំពេញក្នុងរយៈពេលចុងក្រោយនេះ ស្ថានភាពជំងឺកូវីដ១៩ ហាក់បីមានភាពធូរស្បើយបន្តិច រដ្ឋបាលរាជធានីភ្នំពេញ ក៏បានប្រកាសគ្មានតំបន់ក្រហមទៀតនោះទេ គឺមានតែតំបន់លឿងទុំមួយចំនួននៅក្នុងខណ្ឌច្បារអំពៅ ប្ញស្សីកែវ ខណ្ឌទួលគោក ខណ្ឌមានជ័យ និងខណ្ឌពោធិ៍សែនជ័យ ។ ប៉ុន្តែស្ថានភាពជំងឺកូវីដ-១៩ នៅក្នុងសហគមន៍រាជធានីភ្នំពេញ នៅតែគំរាមកំហែងនៅឡើយនោះទេ គ្រូពេទ្យនៅតែបន្តរកឃើញអ្នកឆ្លងកូវីដ-១៩ជាបន្តបន្ទាប់ជារៀងរាល់ថ្ងៃ ។ ស្របជាមួយគ្នានោះ ក្រសួងសុខាភិបាល ក៏បានអំពាវនាវឱ្យប្រជាពលរដ្ឋបន្តចូលរួមការពារទប់ស្កាត់ជំងឺកូវីដ-១៩នេះឱ្យបានមុតមាំបំផុតផងដែរ ៕
