ស្នើដល់ប្រទេសសឹង្ហបុរី បន្តជួយពង្រឹងសមត្ថភាពធនធានមនុស្សនៅកម្ពុជាបន្តទៀត លេីជំនាញប្រេីប្រាស់ភាសាអង់គ្លេស
ភ្នំពេញ ៖ នៅរសៀលថ្ងៃទី ២៩ ខែមិថុនា ឆ្នាំ ២០២១ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តីរដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបលោកជំទាវ Teo Lay Cheng ឯកអគ្គរដ្ឋទូតសាធារណរដ្ឋសឹង្ហបុរីទេីបតែងតាំងថ្មីប្រចាំកម្ពុជា ដើម្បីសម្ដែងការគួរសមនិងពិភាក្សាការងារ នៅទីស្តីការក្រសួង ។
នៅក្នុងជំនួបនោះ ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានសម្តែងនូវការស្វាគមន៍ និងវាយតម្លៃខ្ពស់ចំពោះទំនាក់ទំនងកិច្ចសហប្រតិបត្តិការដ៏ល្អរវាងកម្ពុជា និងសឹង្ហបុរី ក្នុងក្របខណ្ឌទ្វេភាគី និងអាស៊ាន ក៏ដូចជាការគាំទ្រគ្នាទៅវិញទៅមក ទាំងក្នុងក្របខណ្ឌតំបន់និងអន្តជាតិផងដែរ ។
ទន្ទឹមនឹងនេះ ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ក៏បានថ្លែងអំណរគុណយ៉ាងជ្រាលជ្រៅចំពោះប្រទេសសឹង្ហបុរី ដែលបានដេីរតួរយ៉ាងសំខាន់ក្នុងការផ្ដល់ជំនួយបច្ចេកទេស និងការបណ្តុះបណ្តាលធនធានមនុស្សដល់មន្ត្រី និងនិស្សិតកម្ពុជារាប់មុឺននាក់ ទាំងការបណ្តុះបណ្តាលក្នុងស្រុក និងនៅប្រទេសសឹង្ហបុរីផ្ទាល់ ។ ក្នុងនោះ ក៏មានមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ផងដែរ ។
ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានស្នើដល់ប្រទេសសឹង្ហបុរី តាមរយៈលោកជំទាវឯកអគ្គរដ្ឋទូត បន្តជួយពង្រឹងសមត្ថភាពធនធានមនុស្សនៅកម្ពុជាបន្តទៀត ជាពិសេសលេីជំនាញប្រេីប្រាស់ភាសាអង់គ្លេស ពីព្រោះជាយានដេីម្បីឲ្យមន្ត្រីក៏ដូចជានិស្សិតងាយចាប់បាននិងស្វែងយល់ចំពោះការសិក្សាជំនាញបច្ចេកទេសផ្សេងៗទៀត ។
លោកជំទាវ Teo Lay Cheng ឯកអគ្គរដ្ឋទូតសាធារណរដ្ឋសឹង្ហបុរីទេីបតែងតាំងថ្មីប្រចាំកម្ពុជា បានសម្តែងនូវទឹកចិត្តរីករាយចំពោះការមកបំពេញបេសកកម្មកាទូតនៅកម្ពុជា ។ ក្នុងបេសកកម្មនេះ លោកជំទាវនឹងខិតខំជំរុញទំនាក់ទំនង និងកិច្ចសហប្រត្តិការ កម្ពុជា-សឹង្ហបុរី ឲ្យកាន់តែប្រសេីរថែមទៀត ។
លោកជំទាវឯកអគ្គរដ្ឋទូត បានផ្តល់សារ:សំខាន់ ទៅលេីការបណ្តុះបណ្តាលធនធានមនុស្ស ពង្រឹងវិស័យសហគ្រាសធនតូចនិងមធ្យម ការទាក់ទាញការវិនិយោគ និងកិច្ចសហការប្រតិបត្តិការលើវិស័យ វិទ្យាសាស្ត្រ បច្ចេកវិទ្យា និងនវានុវត្តន៍ ជាដេីម។ ក្នុងនោះ លោកជំទាវឯកអគ្គរដ្ឋទូតក៏បានចាប់អារម្មណ៍លេីវិស័យ សិប្បកម្មបែបបុរាណនៅកម្ពុជាផងដែរ ។
ជាចុងក្រោយដៃគូសន្ទនា បានវាយតម្លៃខ្ពស់ចំពោះភាពរីកចម្រេីន នៃកិច្ចសហប្រតិបត្តិការលេីវិស័យកម្មសិទ្ធិបញ្ញា ។ ជាពិសេសអនុស្សរណៈយោគយល់គ្នានៃការចុះបញ្ជីទទួលស្គាល់សុពលភាពប្រកាសនីយបត្រតក្កកម្ម(Patent) នៃប្រទេសសិង្ហបុរី នៅកម្ពុជា ។
សមិទ្ធផលនេះ ធ្វើឲ្យកម្ពុជា ឈានទៅចុះអនុស្សារណ:នៃការយោគយល់គ្នាជាបន្ដបន្ទាប់ទៀតជាមួយប្រទេសដៃគូជាច្រេីនទៀតលេីពិភពលោក រួមមានជាមួយប្រទេស កូរ៉េ ចិន ជប៉ុន សហគមន៍អឺរ៉ុប និងសហរដ្ឋអាមេរិក ដែលជាឧបករណ៌ដ៏សំខាន់ក្នុងការផ្តល់ទំនុកចិត្តនិងជួយទាក់ទាញការវិនិយោគថ្មីៗបន្ថែមទៀត ។
ទាក់ទងនឹងការបណ្តុះបណ្តាលធនធានមនុស្ស គឺត្រូវទទួលបានការយកចិត្តទុកដាក់ ហេីយក្នុងបរិបទបច្ចុប្បន្នដោយសារវិបត្តិកូវីដ១៩ ការបណ្តុះបណ្តាលតាមប្រព័ន្ធអនឡាញ គឺជាជម្រេីសដ៏ល្អ ហេីយយេីងមានលទ្ធភាពបណ្តុះបណ្តាលសិក្ខាកាមបានចំនួនច្រេីនជាងមុនទៀតផង ៕
