ឆក់កាបូបយួរបានសម្រេច តែរត់មិនរួចត្រូវប៉ូលីសចាប់ដាក់ខ្នោះ

ភ្នំពេញ៖ ជនសង្ស័យម្នាក់ត្រូវបានកំលាំងនគរបាលប៉ុស្តិ៍រដ្ឋបាលទឹកល្អក់ទី១ សហការជាមួយកំលាំងនគរបាលប៉ុស្តិ៍រដ្ឋបាលបឹងកក់ទី១ នៃអធិការដ្ឋាន នគរបាលខណ្ឌទួលគោកធ្វើការឃាត់ខ្លួនបានជាក់ស្តែង ខណៈដែលជនសង្ស័យម្នាក់នេះធ្វើសម្មភាពឆក់កាបូបយួរបានសម្រេច តែរត់មិនរួចក៏ត្រូវប៉ូលីសចាប់ដាក់ខ្នោះតែម្តង។

   ជនសង្ស័យត្រូវបានឃាត់ខ្លួនកាលពី ថ្ងៃសុក្រ ១៣កើត ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ២៤ ខែសីហា ឆ្នាំ២០១៨ វេលាម៉ោងប្រហែល ១២និង៥០នាទីរសៀល នៅចំណុចផ្លូវលេខ២៨១ កែងផ្លូវលេខ៥១៦ ក្រុមទី៥២ ភូមិ១៣ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ក្រោយពីបានប្រព្រឹត្តនៅចំណុចមុខសាលាតិចណូ ផ្លូវលេខ ២៨៩ ក្រុមទី៥៥ ភូមិ១៥ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ កាលពីថ្ងៃទី២៤ ខែសីហា ឆ្នាំ២០១៨ វេលាម៉ោងប្រហែល ១២និង៣០នាទី ។

   ជនសង្ស័យ ឈ្មោះ សុខ សាន ហៅ សាន ភេទប្រុស អាយុ១៧ឆ្នាំ ជនជាតិខ្មែរ មុខរបរ សិស្សថ្នាក់ ទី១១A វិទ្យាល័យឥន្រ្ទទេវី  ស្នាក់នៅផ្ទះលេខ ១៧ ផ្លូវលំ សង្កាត់ភ្នំពេញថ្មី ខណ្ឌ សែនសុខ រាជធានីភ្នំពេញ ។

  វត្ថុតាងចាប់យកមាន កាបូបយួរដៃមួយពណ៌ប្រផេះ ក្នុងនោះមាន ឯកសាររបស់ក្រុមហ៊ុន Manu life មួយចំនួន , ទូរស័ព្ទដៃមួយគ្រឿងម៉ាក Nokia ពណ៌ក្រហម ប្រើស៊ីមពីរ ( 071 5570808 , 088 884808 ) , កូនកាបូបដៃមួយ ពណ៌ប្រផេះ (ជារបស់ជនរងគ្រោះដែលជនសង្ស័យឆក់) , ម៉ូតូមួយគ្រឿងម៉ាក Honda C125 ស៊េរី 2018 ពណ៌ខ្មៅ ពាក់ស្លាកលេខ ភ្នំពេញ 1GR-1617. ដែល មានលេខតួ និងលេខម៉ាស៊ីន: 5100748 (ជារបស់ជនសង្ស័យជិះធ្វើសកម្មភាពឆក់ ) ។

    ជនរងគ្រោះ ឈ្មោះ  ម៉ែន ចាន់នី ភេទស្រី អាយុ៣៩ឆ្នាំ ជនជាតិខ្មែរ មុខរបរ បុគ្គលិក ក្រុមហ៊ុនធានារ៉ាប់រង Manulife  ស្នាក់នៅផ្ទះលេខ ១១៧ ផ្លូវលំ ក្រុមទី១៥ ភូមិទួលសង្កែរ សង្កាត់ ទួលសង្កែរ ខណ្ឌឬស្សីកែវ រាជធានីភ្នំពេញ ។

     មន្ត្រីប៉ូលីសខណ្ឌទួលគោកបានអោយដឹងថា នៅថ្ងៃទី២៤ ខែសីហា ឆ្នាំ២០១៨ វេលាម៉ោងប្រហែល ១២និង១០នាទីរសៀល ជនរងគ្រោះឈ្មោះ  ម៉ែន ចាន់នី  ភេទស្រី អាយុ៣៩ឆ្នាំ ជនជាតិខ្មែរ បានជិះម៉ូតូមួយគ្រឿងម៉ាក Suzuki Nex ពណ៌ស ចេញពីផ្ទះក្នុងគោលបំណងទៅធ្វើការនៅក្រុមហ៊ុនធានារ៉ាប់រង Manulife នៅខាង លិចមន្ទីរពេទ្យកុមារជាតិ  លុះពេលជនរងគ្រោះជិះម៉ូតូមកដល់ចំណុចមុខសាលាតិចណូ ផ្លូវលេខ២៨៩ ក្រុមទី៥៥ ភូមិ១៥ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញស្រាប់តែមានជនសង្ស័យឈ្មោះ សុខ សាន ភេទប្រុស អាយុ១៧ឆ្នាំ ជនជាតិខ្មែរ បានជិះម៉ូតូមួយគ្រឿងម៉ាក Honda C125 ស៊េរី 2018 ពណ៌ខ្មៅ ពាក់ស្លាក លេខ ភ្នំពេញ 1GR-1617 ជិះមកពីខាងក្រោយខាងស្ដាំដៃរបស់ជនរងគ្រោះរួចធ្វើសកម្មភាពឆក់កាបូបយួរដៃ ដែលថ្ពួកនៅខាងមុខ ម៉ូតូរបស់ ជនរងគ្រោះ។ ពេលឆក់ បានសម្រេចហើយជនសង្ស័យក៏ជិះម៉ូតូគេចខ្លួន  ភ្លាមនោះជនរងគ្រោះឈ្មោះ  ម៉ែន ចាន់នី បានស្រែកថាចោរៗ ឲ្យអ្នកដំណើរជួយ  ភ្លាមនោះក៏មានអ្នកដំណើរតាមផ្លូវក៏ជិះម៉ូតូដេញតាមពីក្រោយហើយស្រែកថាចោរៗ   លុះពេលជនសង្ស័យជិះគេចខ្លួនមកដល់ចំណុចផ្លូវលេខ២៨១ កែងផ្លូវលេខ៥១៦ ក្រុម ទី៥២ ភូមិ១៣ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ក៏ត្រូវបានកំលាំងនគរបាលប៉ុស្តិ៍រដ្ឋបាលបឹងកក់ទី១ អន្តរាគមន៍ ឃាត់ខ្លួនជនសង្ស័យរូបនេះរួមនិងវត្ថុតាង រួចបញ្ជូនយកមកកាន់អធិការដ្ឋាន នគរបាលខណ្ឌទួលគោក ចាត់ការតាមផ្លូវច្បាប់តែម្ដង ។

     បន្ទាប់ពីឃាត់ខ្លួនជនសង្ស័យឈ្មោះ សុខ សាន ហៅ សាន សមត្ថកិច្ចយើងបាន យកទឹកនោមជនសង្ស័យរូបនេះមកធ្វើតេស្តិ៍ស្វែងរកសារធាតុញៀនក្នុងទឹកនោម ជាលទ្ធផល មានភាព អវិជ្ជមាន ។

    ក្រោយពេលលើតហេតុកាបូបយួរដៃមួយពណ៌ប្រផេះ ដែលជនសង្ស័យឆក់យកនោះ សមត្ថកិច្ចយើងបានធ្វើការប្រគល់ជូនជនរងគ្រោះវិញ តាមការស្នើសុំ ដោយមានការឯកភាពពីលោក តុប ឈុនឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។

        បច្ចុប្បន្នជនសង្ស័យខាងលើកំពុងឃាត់ខ្លួនជាបណ្ដោះអាសន្ន នៅអធិការដ្ឋាន នគរបាលខណ្ឌទួលគោក ដើម្បីធ្វើការ សាកសួរ កសាងសំណុំរឿង និងបញ្ជូនជនសង្ស័យទៅសាលាដំបូង រាជធានីភ្នំពេញ ចាត់ការតាមនីតិវីធីច្បាប់៕