អាជ្ញាធរខេត្ដត្បូងឃ្មុំ ចុះពិនិត្យជំរុញការដាំដុះបន្លែ របស់ប្រជាកសិករនៅស្រុកអូររាំងឳ ក្នុងបរិបទកូវីដ.១៩ ដោយផ្តល់នូវម៉ូទ័របូមទឹកចំនួន ១៣គ្រឿង និងគ្រាប់ពូជបន្លែ

ត្បូងឃ្មុំ មន្ដ្រីជំនាញកសិកម្ម និងអាជ្ញាធរខេត្ដត្បូងឃ្មុំ ដឹកនាំដោយលោក ជាម ច័ន្ទសោភ័ណ អភិបាលខេត្តត្បូងឃ្មុំ បានចុះពិនិត្យការងារដាំដុះ ការប្រមូលផលបន្លែ និងសួរសុខទុក្ខ បងប្អូនប្រជាកសិករដែលកំពុងដាំដុះបន្លែនៅក្នុងឃុំគងជ័យ ស្រុកអូររាំងឪ ខេត្តត្បូងឃ្មុំ នាព្រឹកថ្ងៃទី១៧ ខែសីហា ឆ្នាំ២០២១ នេះ ក្នុងគោលបំណង ជំរុញឲ្យប្រជាកសិករ ទាំងអស់ ខិតខំបង្កើនដាំដំណាំ គ្រប់ប្រភេទ ដើម្បីផនគត់ផ្គង់ជីវភាព គ្រួសារ និងបាននាំចេញ ទៅលក់លើទីផ្សារ ក្នុងសមយ័កូវិដ.១៩ នេះ ។
ក្នុងឱកាសនោះលោក ជាម ច័ន្ទសោភ័ណ បានចុះជួបជាមួយបងស្រី ងន់ ស្រីហ៊ា ដែលរស់នៅក្នុងភូមិទួលតាហោ ឃុំគងជ័យ ស្រុកអូររាំងឪ បានដាំជីរណាលើផ្ទៃដី ៣.០០០ម៉ែត្រការ៉េ ពីដើមខែឧសភា ហើយប្រមូលផលបាន១.៥០០ គ.ក្រ មកហើយ អាចប្រមូលផលបានពី ៦០គ.ក្រ ទៅ ៨០គ.ក្រក្នុងមួយថ្ងៃ ហើយលក់បោះដុំបានតម្លៃ១ ៨០០រៀល/គ.ក្រ ទៅឲ្យឈ្នួញមកពីក្រុងសួង និងក្នុងស្រុកអូររាំងឪ។ ជីរណា អាចប្រមូលផលពេញមួយឆ្នាំតែម្តង តាមរយៈការដករំលោះដើម។
លោក អភិបាលខេត្ត បានបន្តជួបសំណេះសំណាលជាមួយបងប្អូនប្រជាកសិករ ១២គ្រួសារ ដែលបានប្រកបមុខរបរដាំបន្លែលើផ្ទៃដីសរុប ១ហិកតា ៣០អារ មានដំណាំដូចជា ស្ពៃតឿ ស្ពៃក្រញ៉ាញ់ សាលាដ ស្លឹកខ្ទឹម ដែលដាំដុះពេញមួយឆ្នាំ ស្ថិតនៅភូមិចង្វារ ឃុំគងជ័យ ស្រុកអូររាំងឪ។
មានប្រសាសន៍សំណេះសំណាលសួរសុខទុក្ខ ជាមួយបងប្អូនប្រជាកសិករទាំង១៣គ្រួសារ នាឱកាសនោះលោក អភិបាលខេត្ត បានពាំនាំការសាកសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រី ដែលតែងតែបារម្មណ៍ពីសុខភាពរបស់បងប្អូន ជាពិសេសក្នុងវិបត្តិនៃការឆ្លងរាលដាលជំងឺកូវីដ ១៩ ក្នុងសហគមន៍ និងបានសំណូមពរឲ្យមានការប្រុងប្រយ័ត្នជានិច្ច ដោយចូលរួមអនុវត្ត ឲ្យបានតាមវិធានសុខាភិបាល ៣ការពារ ពាក់ម៉ាស់ លាងដៃនឹងសាប៊ូ រក្សាគន្លាត និង ៣កុំ ៣ការពារ ។
ក្នុងវិបត្តិកូវីដ.១៩នេះ រាជរដ្ឋាភិបាល បានចាត់ ទុកកសិកម្មជាវិស័យអាទិភាព ក្នុងការរក្សាចំណូល គ្រួសារកសិករ និងរក្សាស្ថិរភាពសេដ្ឋកិច្ចជាតិ។ ដូច្នេះការដាំដុះបន្លែរបស់បងប្អូន មិនត្រឹមតែបានជាប្រភពចំណូលគ្រួសារប៉ុណ្ណោះទេ តែវាថែមទាំងបានរួមចំណែកជាធាតុផ្សំ នៃស្បៀងក្នុងរបបអាហាររបស់ប្រជាពលរដ្ឋនៅទូទាំងប្រទេសផងដែរ។
ក្នុងឱកាសនោះដែរ លោកក៏បាននាំយកអំណោយជាម៉ូទ័របូមទឹកចំនួន ១៣គ្រឿង ជូនដល់កសិករ ១៣គ្រួសារ ដោយក្នុង១គ្រួសារ ទទួលបានម៉ូទ័របូមទឹកចំនួន ១គ្រឿង សារុង ១ និងថវិកាមួយចំនួន សម្រាប់បូមទឹកស្រោចស្រព បន្លែ ជាមួយតម្លៃអគ្គិសនីទាប ព្រមទាំងទទួល យកសំណូមពរ ដាក់បង្គោលបន្ថែម៣ដើម និងដីក្រហម ១០ឡានផងដែរ ៕ សំរិត