ចាប់ជនជាតិចិនពីរនាក់លួច គាស់ទ្វាររថយន្ត លួចយកកាបូបលុយ

ខេត្តព្រះសីហនុ-ករណីជនជាតិចិនពីរនាក់លួច គាស់ទ្វាររថយន្ត លួចយកកាបូបលុយ របស់ជនជាតិខ្មែរ ពេលដែលជនរងគ្រោះចតរថយន្តទុក នៅលើផ្លូវ ហើយទៅញាំបង្អែម ពេលនោះជនសង្ស័យបានគាស់ទ្វាររថយន្តរបស់ជនរងគ្រោះ ហើយចូលទៅក្នុងរថយន្តដើម្បីលួចលុយ តែត្រូវជនរងគ្រោះឃើញទាន់ ពេលក៏រត់សំដៅមករថយន្ត ពេលជនសង្ស័យឃើញម្ចាស់រថយន្តមក គេក៏ចុះពីរថយន្តរត់គេចខ្លួនបាត់ ។ ហេតុការណ៍កើតឡើង នៅថ្ងៃទី ២៨ ខែសីហា ឆ្នាំ២០១៨ វេលាម៉ោង ២០ និង ៤៥នាទី នៅចំណុច ភូមិ២ សង្កាត់៤ ក្រុងព្រះសីហនុ។ លោកឧត្តមសេនីយ៍ទោស្នងការនគរបាលខេត្ត បានឲ្យដឹងថា បន្ទាប់ពីទទួលបានបណ្តឹងរបស់ជនរងគ្រោះ កម្លាំងជំនាញផែននគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលក្រុង បានធ្វើការស្រាវជ្រាវស៊ើបអង្កេតយ៉ាងយកចិត្តទុកដាក់ រហូតចាប់បានជនសង្ស័យ និងបក្ខពួកសរុប ២នាក់ ។
ជនរងគ្រោះឈ្មោះ រុន រដ្ឋា ភេទប្រុស អាយុ ៣០ឆ្នាំ មុខរបរ អាជីវករ មានទីលំនៅ ភូមិ៥ សង្កាត់៤ ក្រុង-ខេត្តព្រះសីហនុ ។
ជនសង្ស័យចំនួន ២នាក់៖១-ឈ្មោះ XU MENG JIE ភេទប្រុស អាយុ ២៦ឆ្នាំ ជនជាតិចិន មុខរបរ មិនពិតប្រាកដ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ ( ជនដៃដល់ ) ។២-ឈ្មោះ CHEN WEI JIAN ភេទប្រុស អាយុ ២៨ឆ្នាំ ជនជាតិចិន មុខរបរ អ្នកដូរលុយតាមទូរស័ព្ទដៃ លិខិតឆ្លងដែនលេខៈ EC៩០៧៤៦០១ មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ ( បក្ខពួក ) ។
វត្ថុតាងចាប់យកបាន៖កាបូបយួរដៃ ១ ពណ៌សូកូឡា ( ផលនៃអំពើលួចថ្ងៃទី ២៧សីហា២០១៨ ) ទូរស័ព្ទដៃ ២គ្រឿង ( ម៉ាក IPHONE X ពណ៌ខ្មៅ និងម៉ាក NOKAI ពណ៌ស ) ។

បន្ទាប់ពីធ្វើការសាកសួរ ជនសង្ស័យបានសារភាពប្រាប់សមត្ថកិច្ចថា កន្លងមកពួកគេបានធ្វើសកម្មភាព គាស់ទ្វាររថយន្តលួចយកលុយ ចំនួន ៣លើក៖លើកទី១ នៅថ្ងៃទី ២០ ខែឧសភា ឆ្នាំ២០១៨ នៅចំណុច ភូមិ២ សង្កាត់៤ ក្រុង-ខេត្តព្រះសីហនុ បានកាបូប ១ មានលុយចំនួន ៣៩.០០០ដុលារ ( បីម៉ឺនប្រាំបួនពាន់ដុល្លារ ) ។លើកទី២ នៅថ្ងៃទី ២៧ ខែសីហា ឆ្នាំ២០១៨ នៅមុខក្រុមហ៊ុន L.G ភូមិ២ សង្កាត់៤ ក្រុង-ខេត្តព្រះសីហនុ បានកាបូប ១ មានលុយជាង ១.០០០ដុល្លារ ( មួយពាន់ដុល្លារ ) ។លើកទី៣ នៅថ្ងៃទី ២៨ ខែសីហា ឆ្នាំ២០១៨ នៅ ភូមិ២ សង្កាត់៤ ក្រុង-ខេត្តព្រះសីហនុ មិនបានសម្រេច ព្រោះក្នុងពេលធ្វើសកម្មភាពត្រូវម្ចាស់រថយន្តមកទាន់ ។
ចំពោះជនសង្ស័យខាងលើនេះ ការិយាល័យនគរបាលព្រហ្មទណ្ឌកម្រិតស្រាល កំពុងកសាងសំណុំរឿងបញ្ជូនទៅសាលាដំបូងខេត្តព្រះសីហនុ ៕