ទេសរដ្ឋមន្រ្តី ចម ប្រសិទ្ធ ផ្តល់អនុសាសន៍ស្តីពីការផ្គត់ផ្គង់ទឹកស្អាត ទៅកាន់អាកាសយានដ្ឋានអន្តរជាតិខេត្តសៀមរាបថ្មី
ភ្នំពេញ ៖ ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធក្នុងន័យដេីម្បីចូលរួមការពារប្រាសាទអង្គរវត្តក៏ដូចជាប្រាសាទនានានៅជុំវិញខេត្តសៀមរាបដែលជាបេតិកភ័ណ្ឌដ៏មានតម្លៃរបស់ជាតិនិងពិភពលោក ។
ក្នុងនោះ អាកាសយានដ្ឋានអន្តរជាតិខេត្តសៀមរាបចាស់ ក៏ត្រូវរាជរដ្ឋាភិបាលសម្រេចឲ្យមានការប្តូរទីតាំង និងតម្រូវឲ្យមានការវិនិយោគនូវព្រលានយន្តហោះថ្មី ឲ្យមានលក្ខណៈឆ្ងាយពីទីរួមខេត្ត និងពីប្រាសាទអង្គរវត្តផងដែរ ។
ជាក់ស្តែងបន្ទាប់ពីចុះអនុស្សរណៈយោគយល់គ្នាកាលពីឆ្នាំ២០១៦ រវាងរាជរដ្ឋាភិបាលកម្ពុជា និងភាគីចិនមកពីខេត្តយូណានស្តីពីការវិនិយោគអាកាសយានដ្ឋានអន្តរជាតិខេត្តសៀមរាបថ្មីរួចមក ដំណេីរការសាងសង់មកដល់បច្ចុប្បន្នបានចំនួន៤៥%ហេីយ នឹងគ្រោងសម្រេចរួចរាល់នៅចុងឆ្នាំ២០២២ខាងមុខនេះ ។ ប៉ុន្តែចំពោះមុខគឺមានបញ្ហាប្រឈមផ្នែកផ្គត់ផ្គង់ទឹកស្អាតពីព្រោះអាកាសយានដ្ឋានអន្តរជាតិសៀមរាបថ្មីត្រូវបានប្តូរទីតាំងនៅក្នុងស្រុកសូត្រនិគម មានចម្ងាយប្រមាណ៥០គីឡូម៉ែត្រពីក្រុងសៀមរាប និង៤០ គីឡូម៉ែត្រពីព្រលានចាស់ ដែលព្រលានថ្មីនេះមានផ្ទៃដីសរុបប្រមាណ៧០០ហិចតា វិនិយោគជាលក្ខណៈ BOT រយៈពេល ៥៥ឆ្នាំ ។
ដេីម្បីចូលរួមដោះស្រាយបញ្ហានេះ នៅព្រឹកថ្ងៃទី ២១ ខែកញ្ញា ឆ្នាំ២០២១ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបពិភាក្សាការងារជាមួយ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុកអាកាសចរណ៍សុីវិល និងតំណាងក្រុមហ៊ុនវិនិយោគឈ្មោះ AIAI នៅទីស្តីការក្រសួង និងតាមប្រព័ន្ធអនឡាញផងដែរ។
បន្ទាប់ពីស្តាប់របាយការណ៍ពីឯកឧត្តមរដ្ឋមន្រ្តី ម៉ៅ ហាវណ្ណាល់ និងបទបង្ហាញពីតំណាងក្រុមហ៊ុន AIAI វិនិយោគព្រលានយន្តហោះថ្មីសៀមរាប ដូចរៀបរាប់ខាងលេីរួចមក ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានបញ្ជាក់ថា៖ទោះបីកាលពីចុះអនុស្សរណៈយោគយល់គ្នា តំណាងក្រសួងរបស់ខ្ញុំ មិនបានចូលរួមក៏ដោយ តែពេលនេះខ្ញុំនឹងខិតខំដោះស្រាយជូន ក្នុងជម្រេីសមួយដេីម្បីយកទៅពិចារណា ។ គឺលទ្ធភាពល្អតែមួយគត់ ដោយក្រុមហ៊ុនត្រូវវិនិយោគលេីការតបណ្តាញចែកចាយទឹក របស់រដ្ឋាករទឹកស្វយ័តខេត្តសៀមរាបពីព្រំប្រទល់នៃទីក្រុងសៀមរាបទៅ ដល់ព្រលានថ្មីប្រមាណជិត២៥គីឡូម៉ែត្រ ដោយប្រេីបំពង់ទុយោពីដេីមទីទំហំ៦០០ម.ម រួមជាមួយការសាងសង់អាងស្តុក និងស្ថានីយ៍ចែកចាយបន្ត ដេីម្បីឲ្យការងារនេះ ដេីរទាន់នឹងការដ្ឋានសាងសង់ ។ ក្នុងនោះទឹកប្រាក់ចំណាយប្រមាណ១២ទៅ១៣លានដុល្លារអាមេរិក ។ ការចំណាយនេះគឺយេីងគិតការផ្គត់ផ្គង់ក្នុងមួយថ្ងៃ៥ពាន់ម៉ែតគូប ទៅ១ម៉ឺនម៉ែត្រគូប លេីសពីគម្រោងរបស់ក្រុមហ៊ុនសុំតែ២ពាន់ម៉ែតគូប ។ ពីព្រោះឯកឧត្តមកិត្តិសេដ្ឋាបណ្ឌិត គិតថាមិនគ្រប់គ្រាន់ទេ បេីមេីលពីគម្រោងវិនិយោគរបស់ក្រុមហ៊ុន មានទឹកប្រាក់ហូតដល់១៥០០លានដុល្លារឯណោះ ដោយរួមបញ្ចូលទាំងមូលដ្ឋានអាជីវកម្ម រោងចក្រសហគ្រាស និងហេដ្ឋារចនាសម្ព័ន្ធផ្សេងៗទៀត ។
ក្នុងឱកាសនោះ តំណាងក្រុមហ៊ុនចិន បានថ្លែងអំណរគុណចំពោះអនុសាសន៍ណែនាំ និងកិច្ចសហការជួយគាំទ្រយ៉ាងល្អ របស់ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ ហេីយនឹងពាំនាំព័ត៌មាននេះ ជូនទៅថ្នាក់លេីរបស់ខ្លួន ដេីម្បីពិចារណានិងសម្រេច ៕
