ទាព្រៃ ស្លាប ស បក្សីព្រៃកម្រនៅលើពិភព លោកមានវត្តមានតិចតួច នៅក្នុងប្រទេសកម្ពុជា

ភ្នំពេញ៖ លោក នេត ភក្ត្រា អ្នកនាំពាក្យនិងជារដ្ឋលេខាធិការក្រសួងបរិស្ថាន បានលើកឡើងថា, សូមកុំច្រឡំថាជាទាស្រុក តែនេះជាទាព្រៃស្លាបស ដែលជាប្រភេទសត្វកម្ររងគ្រោះថ្នាក់ជិតផុតពូជ! កម្ពុជាគឺជាប្រទេសមួយក្នុងចំណោមប្រទេសចំនួន ៩ ក្នុងទ្វីបអាស៊ីដែលមានវត្តមានទាព្រៃស្លាបស រស់នៅ ហើយ ។ តែកម្របំផុត នេះបើតាមការបញ្ជាក់ឲ្យ ដឹង ពីមន្រ្ដីជាន់ខ្ពស់ ក្រសួងបរិស្ថាន កាលពីថ្ងៃទី២៥ តុលានេះ ។

លោកបានបញ្ជាក់ថា, យោងតាមរបាយការណ៍សិក្សា ទាព្រៃស្លាបសមានចំនួនចន្លោះ ២៥០-១០០០ ក្បាលនៅលើសាកលលោក និងមានវត្តមានតិចតួចរស់នៅ ក្នុងប្រទេសកម្ពុជា។ ទាព្រៃស្លាបស ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទ រងគ្រោះជិតផុតពូជនៅលើសាកលលោក ពីព្រោះចំនួនរបស់ពួកវានៅបន្ត ធ្លាក់ចុះយ៉ាងខ្លាំងដោយសារតែការបាត់បង់ទីជម្រក ការរំខាននៅតាមដង ព្រែក និងការបរបាញ់ជាដើម។ កាលពីខែកក្កដាឆ្នាំ ២០១៧ ក្រុមអ្នកអភិរក្សបានរកឃើញ សំបុកទាព្រៃស្លាបស ស្ថិតនៅក្នុងប្រហោងដើមគគីរ ដែលមានកម្ពស់ ប្រមាណ ១២ម៉ែត្រពីដី និងមានទីតាំងស្ថិតនៅ ក្នុងដែនជម្រកសត្វព្រៃគូ លែន ព្រហ្មទេព ភូមិសាស្ត្រខេត្តព្រះវិហារ៕. . សំរិត