ដៃគូសន្យាផ្តល់ប្រាក់ចំនួន ៦៦៥ លានដុល្លារ ជួយដល់ការស្ដារឡើងវិញបៃតងក្នុងតំបន់អាស៊ាន
ទីក្រុង Glasgow នៃចក្រភពអង់គ្លេស (២ វិច្ឆិកា ២០២១) ៖ ដៃគូចំនួនបួនបានរួមគ្នាសន្យា ផ្តល់ប្រាក់ចំនួន ៦៦៥ លានដុល្លារ សម្រាប់វេទិកាគ្រប់គ្រងដោយធនាគារអភិវឌ្ឍន៍អាស៊ី (ADB) ដែល មានគោលបំណងប្រមូលប្រាក់ចំនួន ៤ ពាន់លានដុល្លារ សម្រាប់គម្រោងហេដ្ឋារចនាសម្ព័ន្ធ ដែលមាន កាបូនទាប និង ធន់នឹងអាកាសធាតុ នៅក្នុងតំបន់អាស៊ីអាគ្នេយ៍ និងបង្កើនល្បឿននៃការងើបឡើងវិញក្នុង តំបន់ពីជំងឺកូវីដ១៩។
មូលនិធិខាងលើដែលត្រូវបានប្រកាសនៅក្នុងសន្និសីទភាគីលើកទី ២៦ (the 26th Conference of the Parties — COP26) នៅទីក្រុង Glasgow រួមមាន ១១០ លានផោន (១៥១ លានដុល្លារ) ពីរដ្ឋាភិបាលនៃចក្រភពអង់គ្លេស ១៣២ លានអឺរ៉ូ (១៥៥ លានដុល្លារ) ពី Cassa Depositi e Prestiti (CDP) ដែលជាក្រុមផ្តល់កម្ចីរដ្ឋរបស់ប្រទេសអ៊ីតាលី ៥០ លានអឺរ៉ូ ពីសហភាពអឺរ៉ុប និង ៣០០ លាន ដុល្លារ ពីមូលនិធិអាកាសធាតុបៃតង (Green Climate Fund)។ ភាពជាដៃគូទាំងនេះ នឹងក្លាយជាផ្នែក មួយនៃវេទិកាសម្រាប់ការងើបឡើងវិញបៃតង (Green Recovery Platform) ថ្មី ដើម្បីគាំទ្រដល់កិច្ច សម្របសម្រួលហិរញ្ញវត្ថុបៃតងជាកាតាលីករ នៃសមាគមប្រជាជាតិអាស៊ីអាគ្នេយ៍ (ASEAN Catalytic Green Finance Facility — ACGF) ដែលត្រូវបានបង្កើតឡើងដោយមូលនិធិហេដ្ឋារចនាសម្ព័ន្ធអាស៊ាន (ASEAN Infrustructure Fund) និង គ្រប់គ្រងដោយ ADB ។
ប្រធាន ធនាគារអភិវឌ្ឍន៍អាស៊ី លោក Masatsugu Asakawa ដែលបានចូលរួមព្រឹត្តិការណ៍ខាងលើ ជាមួយរដ្ឋមន្ត្រី និង មន្ត្រីជាន់ខ្ពស់មកពីបណ្តាប្រទេសអាស៊ាននិងដៃគូ មានប្រសាសន៍ថា “បណ្តា ប្រទេសអាស៊ានមានឱកាសពិសេស ក្នុងការកសាងអនាគតបៃតង និង ប្រកបដោយបរិយាប័ន្ន បន្ទាប់ពី ជំងឺរាតត្បាតកូវីដ១៩។ វេទិកាសម្រាប់ការងើបឡើងវិញបៃតងថ្មីរបស់អាស៊ាន នឹងជួយពន្លឿនលំហូរ វិនិយោគ ដើម្បីគាំទ្រដល់គម្រោងហេដ្ឋារចនាសម្ព័ន្ធធន់នឹងអាកាសធាតុ ប្រកបដោយនិរន្តរភាពបរិស្ថាន នៅក្នុងតំបន់អាស៊ីអាគ្នេយ៍ និងជំរុញការអភិវឌ្ឍប្រកបដោយចីរភាព និង សមធម៌”។
ការផ្តល់មូលនិធិថ្មី នឹងបន្ថែមទៅលើការសន្យាផ្តល់ហិរញ្ញប្បទានចំនួន ១,៤ ពាន់លានដុល្លារ អាមេរិក ដែលបានតៀមរួចសម្រាប់ ACGF តាំងពីឆ្នាំ ២០១៩ ដោយនឹងនាំមកនូវកញ្ចប់សន្យាសរុប ២ ពាន់លានដុល្លារ សម្រាប់ ACGF។ ដៃគូផ្តល់ហិរញ្ញប្បទានដំបូងដែលគាំទ្រដល់ ACGF រួមមាន ADB ទីភ្នាក់ងារអភិវឌ្ឍន៍បារាំង (Agence Française de Développement — AFD) ធនាគារវិនិយោគអឺរ៉ុប (European Investment Bank) ធនាគារអភិវឌ្ឍន៍រដ្ឋអាល្លឺម៉ង់ KfW និង រដ្ឋាភិបាលនៃសាធារណរដ្ឋកូរ៉េ។ អគ្គនាយក ភាពជាដៃគូអន្តរជាតិនៃគណៈកម្មការអឺរ៉ុប លោក Koen Doens នាយកប្រតិបត្តិ នៃមូលនិធិអាកាសធាតុបៃតង (GCF) លោក Yannick Glemarec និង នាយក ប្រតិបត្តិ AFD លោក Remy Rioux ក៏បានផ្តល់សន្ទរកថាក្នុងពិធីខាងលើដែរ។
លោកជំទាវ Elizabeth Truss រដ្ឋមន្រ្តីការបរទេសចក្រភពអង់គ្លេសមានប្រសាសន៍ថា “ឆ្នាំនេះ ចក្រភពអង់គ្លេសបានក្លាយជាដៃគូសន្ទនាថ្មីដំបូងគេរបស់អាស៊ានក្នុងរយៈពេល ២៥ ឆ្នាំ។ ឥឡូវនេះ យើងកំពុងធ្វើការរួមគ្នាដើម្បីកសាងទំនាក់ទំនងសេដ្ឋកិច្ច និងការវិនិយោគឱ្យកាន់តែរឹងមាំ និងដោះស្រាយការ ប្រែប្រួលអាកាសធាតុ។ ការផ្តល់មូលនិធិចំនួន ១១០ លានផោន របស់ចក្រភពអង់គ្លេសសម្រាប់មូលនិធិ កិច្ចសម្របសម្រួលហិរញ្ញវត្ថុបៃតង ជាកាតាលីករនៃចក្រភពអង់គ្លេស និង អាស៊ាន (UK-ASEAN Catalytic Green Finance Facility Trust Fund) នឹងជួយផ្តល់នូវហេដ្ឋារចនាសម្ព័ន្ធ ស្អាត ស្មោះត្រង់ និង អាចទុកចិត្តបាន ដល់ប្រទេសដែលត្រូវការវាបន្ទាន់ ដោយផ្តោតលើជំនាញរបស់ចក្រភពអង់គ្លេស លើបច្ចេកវិទ្យាបៃតង និង បង្កើតការងារនៅទូទាំងចក្រភពអង់គ្លេស។”
ជំងឺរាតត្បាតកូវីដ១៩ បានជះឥទ្ធិពលយ៉ាងខ្លាំងដល់សេដ្ឋកិច្ច សុខភាព និង សង្គម នៅក្នុងតំបន់ អាស៊ីអាគ្នេយ៍។ វេទិកានេះនឹងផ្តល់ហិរញ្ញប្បទាន និងជំនួយបច្ចេកទេស ដើម្បីកាត់បន្ថយហានិភ័យនៃការ វិនិយោគ និងជំរុញការផ្តល់ហិរញ្ញប្បទានសាធារណៈ និងឯកជន សម្រាប់គម្រោងហេដ្ឋារចនាសម្ព័ន្ធបៃតង ដែលបង្កើតការងារ និង ជំរុញកំណើន។ វាក៏នឹងគាំទ្រដល់កិច្ចខិតខំប្រឹងប្រែងរបស់ប្រទេសសមាជិក អាស៊ានដែលកំពុងអភិវឌ្ឍ ដើម្បីសម្រេចបាន នូវគោលដៅអាកាសធាតុរបស់ពួកគេ ក្រោមកិច្ចព្រមព្រៀង ទីក្រុងប៉ារីស និង ជួយពួកគេពង្រឹងទីផ្សារមូលធនបៃតង ដូចជាតាមរយៈការពង្រីកការចេញសញ្ញាបណ្ណ បៃតង និង អាកាសធាតុជាដើម។
នាយកប្រតិបត្តិ CDP លោក Dario Scannapieco មានប្រសាសន៍ថា “នៅពេលដែលយើង កសាងសេដ្ឋកិច្ចរបស់យើងឡើងវិញ ការប្តេជ្ញាចិត្តរបស់យើងចំពោះកិច្ចព្រមព្រៀងទីក្រុងប៉ារីស (Paris Agreement) និង គោលដៅអភិវឌ្ឍន៍ប្រកបដោយចីរភាព មិនត្រូវធ្លាក់ចុះឡើយ។ CDP ត្រៀមខ្លួន ជាស្រេច ដើម្បីដើរតួនាទីយ៉ាងសកម្ម ក្នុងការផ្តល់ហិរញ្ញប្បទានហេដ្ឋារចនាសម្ព័ន្ធប្រកបដោយនិរន្តរភាព និង បរិយាប័ន្ន តាមរយៈការលើកកម្ពស់ភាពជាដៃគូស្ថាបនា ដូចជាការគាំទ្ររបស់យើងចំពោះ ACGF ដើម្បីផ្តល់ហិរញ្ញប្បទាន ដល់ការងើបឡើងវិញសេដ្ឋកិច្ចប្រកបដោយនិរន្តរភាព និង បៃតងនៅក្នុងតំបន់ អាស៊ី អាគ្នេយ៍ និងដើម្បីរួមកម្លាំងជាមួយធនាគារអភិវឌ្ឍន៍ជាតិផ្សេងទៀតដោះស្រាយ បញ្ហាប្រឈម បច្ចុប្បន្ន សម្រាប់មនុស្សជំនាន់នេះ និង មនុស្សជំនាន់ក្រោយ។”
វេទិកាសម្រាប់ការងើបឡើងវិញបៃតងរបស់អាស៊ាន (ASEAN Green Recovery Platform) គឺជាផ្នែកមួយនៃការប្តេជ្ញាចិត្តរបស់ ADB ក្នុងការបង្កើនមហិច្ឆិតារបស់ខ្លួនសម្រាប់ការផ្តល់ហិរញ្ញប្បទាន អាកាសធាតុឆ្នាំ ២០១៩-២០៣០ រហូតដល់ ១០០ ពាន់លានដុល្លារ ដោយធានាថាយ៉ាងហោចណាស់ ៧៥% នៃគម្រោងនឹងដោះស្រាយការកាត់បន្ថយ និង ការបន្ស៊ាំទៅនឹងការប្រែប្រួលអាកាសធាតុអំឡុងឆ្នាំ ២០៣០។
ធនាគារអភិវឌ្ឍន៍អាស៊ី ប្តេជ្ញាថានឹងសម្រេចឱ្យបាននូវ វិបុលភាព បរិយាប័ន្ន ភាពធន់និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង។ បង្កើត ឡើងនៅឆ្នាំ ១៩៦៦ ធនាគារនេះគ្រប់គ្រងដោយសមាជិកចំនួន ៦៨ ប្រទេស ដែលក្នុងនោះមាន ៤៩ ប្រទេស មកពីតំបន់ខាងលើនេះ៕
