ជនជាតិកូរ៉េខាងត្បូងម្នាក់ គាំងបេះដូងស្លាប់
បាត់ដំបង ៖ ជនជាតិកូរ៉េខាងត្បូងម្នាក់ បានស្លាប់បាត់បង់ជីវិត ក្រោយពីបានដឹកទៅមន្ទីរពេទ្យបានប៉ុន្មានម៉ោង ដោយសាររោគប្រចាំកាយ ត្រង់ចំណុចបុរីរំចេក ស្ថិតក្នុងផ្ទះលេខ១៤១ ក្រុមទី១១ ភូមិរំចេក៤ សង្កាត់រតនៈ ក្រុងបាត់ដំបង នៅថ្ងៃទី០៧ ខែវិច្ឆិកា ឆ្នាំ២០២១។
សាកសពឈ្មោះ ផាក់ ផុងស៊ុន (PARK JONGSEONG) ភេទប្រុស អាយុ ៤៦ឆ្នាំ ជនជាតិកូរ៉េខាងត្បូង ស្នាក់នៅចំណុចកើតហេតុខាងលើ។
តាមការបំភ្លឺរបស់ឈ្មោះ ញ៉ាន ប៊ុនវាសនា ភេទប្រុស អាយុ២៤ឆ្នាំ មុខរបរជាងគំនូរ មានទីលំនៅភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង បានបញ្ជាក់ឲ្យដឹងថា នៅថ្ងៃទី០៦ ខែវិច្ឆិកា ឆ្នាំ២០២១ វេលាម៉ោងប្រហែល១៧និង៤០នាទី ជនរងគ្រោះខាងលើ មានមុខរបរជាងគំនូរ បានហៅខ្លួនឲ្យជូនទៅទិញភីហ្សា ខ្លួនបានយកម៉ូតូឌុបទៅទិញរួចត្រឡប់មកផ្ទះវិញ ស្រាប់តែគាត់ប្រាប់ខ្លួនថាគាត់ឈឺពោះរាគ ក្អួត និងថប់ដង្ហើម រួចគាត់ប្រាប់ថា គាត់មានជំងឺទឹកនោមផ្អែម និងមិនបានចាក់វ៉ាក់សាំងការពារកូវីដ-១៩ទេ គាត់បានអោយខ្លួនទៅទិញថ្នាំអោយលេប ហើយបានតាមពេទ្យអោយមកចាក់ថ្នាំអោយគាត់ ពេលគ្រូពេទ្យមកដល់បានដាក់ស៊ឺរ៉ូមអោយគាត់ តែគាត់បានអោយគ្រូពេទ្យដោះចេញវិញ រួចគ្រូពេទ្យបានហៅឡានពេទ្យយីគក់មកដឹកយកទៅព្យាបាល លុះដឹកជិតដល់មន្ទីរពេទ្យ នៅវេលាម៉ោងប្រហែល២០និង១០នាទី ពេទ្យបានប្រាប់ថា គាត់បានស្លាប់បាត់ហើយ។
ក្រោយពីពិនិត្យសាកសព និងសាកសួរបំភ្លឺជុំវិញទីកន្លែងកើតហេតុ ក្រុមការងារសន្និដ្ឋានបានថា ជនរងគ្រោះឈ្មោះ ផាក់ ផុងស៊ុន (PARK JONGSEONG) ភេទប្រុស ស្លាប់ដោយគាំងបេះដូង (មានជំងឺលើសឈាម និងជំងឺទឹកនោមផ្អែម)។
បច្ចុប្បន្ន សពតម្កល់ទុកនៅទីកន្លែងកើតហេតុ រង់ចាំចំណាត់ការបន្តតាមផ្លូវច្បាប់៕
