មជ្ឈមណ្ឌល VBC គឺជាថ្នាលផ្តល់ចំណេះជំនាញពិត ដល់និស្សិត និងកសិករផ្នែកចិញ្ចឹមជ្រូក

កណ្តាល ៖ មជ្ឈមណ្ឌល VBC គឺជាកន្លែងផ្តល់ចំណេះជំនាញពិតប្រាកដ និងច្បាស់លាស់មួយជូនដល់និស្សិត កសិកម្មផ្នែកពេទ្យសត្វ និងកសិករតាមសហគមន៏ បានយល់ពីការចិញ្ចឹមជ្រូក គោ មាន់ ទា ទទួលបានជោគជ័យ តាមរយៈបង្រៀនបញ្ចាំងស្លាយ និងចាប់ដៃសិស្សចុះអនុវត្ត ជាក់ស្តែងនៅតាមកសិដ្ឋាន ដូចជាចាប់លឹង្គជ្រូកយកស្ពែម បង្កាត់បែបសិប្បនិម្មិត ការលាយចំណី ទៅតាមរូបមន្តឱ្យជ្រូក គោមាន់ ទាស៊ីឆាប់ធំធាត់ និងមានកូនច្រើន។

មានកសិដ្ឋានជ្រូកច្រើនកន្លែង មានស្រះត្រី សម្រាប់សិស្ស និងកសិករ ស្រាវជ្រាវ និងការប្រើប្រាស់ថ្នាំសម្រាប់សិស្សអនុវត្ត ដើម្បី ងាយយល់ ងាយចាំ យកទៅប្រកបរបរផ្ទាល់ខ្លួន បន្ទាប់ពីពួកគេរៀនចប់។ មួយវិញទៀត VBC មានថ្នាំ គ្រប់ប្រភេទសម្រាប់ឱ្យសិស្ស ក៏ដូចកសិករ ចាក់វ៉ាក់ ចាក់ការពារជ្រូកគោ មាន់ទា ឆ្កែ ឆ្មានៅពេលពួកវាឈឺ និងមានចំណីអាហារសត្វ បង្ហាញជូនសិស្ស និងកសិករផងដែរ។

លោក ធឿន ថន ហៅគ្រូម៉ៅ ប្រធានមជ្ឈមណ្ឌល VBC បានលើកឡើងថា បន្ទាប់ពីបញ្ចប់ការសិក្សា នៅសាកលវិទ្យាល័យភូមិន្ទកសិកម្មចំការដូង រួចមក លោកបានចូលបំរើការងារជាមួយ គម្រោងអង្គការ EU គម្រោង អង្គការ World vision ផ្នែកឥណទាន ផ្នែកកសិកម្ម ជួយកសិករតាមសហគមន៏ និង ក្រុមហ៊ុនម៉ុង ឬទ្ធីបានជាង ១០ឆ្នាំផ្នែកការងារចិញ្ចឹមជ្រូកនេះ ។

ដោយមានបទពិសោធន៏គ្រប់គ្រាន់ លើផ្នែកការងារចិញ្ចឹកជ្រូកនេះ លោកក៏បានបញ្ជាក់ថា លោកមានបទពិសោធន៏ជិត២០ឆ្នាំហើយ ទាំងជាមួយអង្គការ និងក្រុមហ៊ុន ដោយទទួលបានជោគជ័យ លោកចង់ចែករំលែក ចំណេះជំនាញនេះ ដល់សិស្សផ្នែកពេទ្យសត្វ ផ្នែកកសិកម្ម និងកសិករ ដែលចិញ្ចឹមនៅតាមសហគមន៏ ឱ្យពួកគាត់ ទទួលយកនូវចំណេះជំនាញនេះ ទៅប្រកបរបរផ្ទាល់ខ្លួន ដើម្បី បង្កើនចំណូលជីវភាពគ្រួសារ ក៏ដូចបង្កើនផលិតផលសាច់ ក្នុងស្រុកឱ្យសំបូរ ចូលរួមកាត់បន្ថយការនាំចូល ពីប្រទេសជិតខាងផងដែរ។

លោកគ្រូម៉ៅបន្តថា មជ្ឈមណ្ឌលលោកមិនត្រឹម តែសិស្សផ្នែកកសិកម្មចំការដូង មករៀនទេ សូម្បីកសិករចិញ្ចឹមជ្រូមនៅតាមបណ្តាខេត្ត ក៏មកទទួលចំណេះ ជំនាញពីមជ្ឈមណ្ឌលVBCនេះដែរ។ លោកថា សិស្សនិងកសិករ ដែលមករៀនជាមួយលោកនេះ ភាគច្រើនទទួលបានជោគជ័យ ដោយពួកគាត់ចេះចាក់ថ្នាំ ចេះប្រើថ្នាំ ចេះលាយនិងផលិតចំណី ចេះព្យាបាល ចេះគ្រៀវ និងចេះយកស្ពែម ដោយមានឧបការណ៏ មីក្រូទស្សន៏ពិនិត្យមេជីវិតស្តែងៗជាដើម ពិសេសបានមើល សកម្មភាពវះជ្រូកទាំងរស់ ដើម្បី បានសិក្សាស្វែងយល់ និងស្គាល់ពីគ្រឿងក្នុង នៃសរីរាង្គនីមួយៗ នៅពេលសត្វឈឺជាដើម ខុសប្លែកពួកគេរៀននៅសាលា មានតែទ្រឹស្តី មិនដែលមាន កន្លែងអនុវត្តផ្ទាល់ដូចនៅVBC ។

សូមបញ្ជាក់ថា៖ មជ្ឈមណ្ឌលVBC ដំណើរការតាំងពីឆ្នាំ ២០១០ ដែលទទួលសិស្ស កសិកម្មផ្នែកពេទ្យសត្វ និងកសិករពីបណ្តាខេត្តបាន ជាង៥០០នាក់មកហើយ បច្ចុប្បន្នមានទីតាំង ស្ថិតនៅភូមិអញ្ចាញ សង្កាត់ព្រែកឬស្សីក្រុងតាខ្មៅ ខេត្តកណ្តាល៕ សាវុធ