បុរសម្នាក់ចាប់ឆ្កែ មាន់ និងគីង្គក់ជាច្រើនក្បាលខាំក បឺតឈាមស៊ីយ៉ាងសាហាវ នៅស្រុកកោះសូទិន
ខេត្តកំពង់ចាម៖ ភាពភ្ញាក់ផ្អើលមួយបានកើតឡើង ខណៈដែលបុរសម្នាក់ចាប់សត្វឆ្កែ មាន់ និងគីង្គក់ជាច្រើនក្បាលខាំក បឺតឈាមស៊ីយ៉ាងសាហាវ បង្កអោយប្រជាពលរដ្ឋភ័យខ្លាចយ៉ាងខ្លាំង នៅស្រុកកោះសូទិន។
ហេតុការណ៍នេះបានកើតឡើងនៅម៉ោង១៩និង៣០នាទីយប់ថ្ងៃទី៨ ខែកញ្ញា ឆ្នាំ២០១៨ បានបង្កឲ្យភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះទៅតាមឃ្លាំមើលផងដែរ។
យុវជនខាងលើនេះឈ្មោះ រុន រាជ អាយុ២៤ឆ្នាំ រស់នៅក្នុងភូមិកោះចិន ឃុំកំពង់រាប ស្រុកកោះសូទិន ដោយបានចាប់កូនឆ្កែហែកស៊ីទាំងរស់ចំនួន៣ក្បាល ស៊ីគីង្គក់អស់១ក្បាល និងស៊ីកូនឆ្មាទាំងរស់១ក្បាលថែមទៀតផង។
លោកវរសេនីយ៍ឯក អ៊ឹម ខឿន អធិការនគរបាលស្រុកកោះសូទិន បានប្រាប់ថា មួយរយៈនេះយុវជនខាងលើបានចេញពីផ្ទះទៅលេងម្តាយនៅភ្នំពេញជាច្រើនថ្ងៃហើយ?ផ្ទះនៅភូមិកោះចិនបានបិទទ្វារចាក់សោចោល លុះត្រឡប់មកវិញទើបតែ៤ទៅ៥ថ្ងៃ នៅព្រឹកថ្ងៃទី៨ កញ្ញា បានចេញទៅច្រូតស្មៅជាមួយនឹងអ្នកជិតខាង ពេលមកវិញក៏ទិញស្រាផឹកម្នាក់ឯងនៅលើផ្ទះឈើរបស់ខ្លួន។
អធិការនគរបាលស្រុកប្រាប់បន្តថា យុវជននោះមុនផឹកបានប្រាប់ទៅអ្នកជិតខាងថា សូមឲ្យជួយប្រាប់ដល់សាច់ញាតិរបស់ខ្លួនថា «ល្ងាចនេះរូបគេដូចមិនស្រួលខ្លួនទេ សូមជួយប្រាប់ទៅបងប្អូនឲ្យបានដឹង ព្រោះក្នុងខ្លួនដូចមានមនុស្សប៉ុន្មាននាក់អញ្ចឹង»។ លុះដល់ម៉ោង១៩:៣០នាទីយប់ស្រាប់តែឮសូរសម្លេងឆ្កែស្រែក ពលរដ្ឋក៏នាំគ្នាបញ្ចាំងភ្លើងពិលមើលក៏ឃើញយុវជននេះហែកកូនឆ្កែស៊ីទាំងរស់ពិតជាគួរឲ្យខ្លាច។
សូមបញ្ជាក់ថា កូនឆ្កែដែលហែកស៊ីទាំងរស់ចំនួន៣ក្បាល ស៊ីអស់២ក្បាល ក្នុងនោះ១ក្បាលហែកខាំស៊ីត្រង់បំពង់កហុតឈាម ស៊ីគីង្គក់ទាំងរស់ចំនួន១ក្បាល និងស៊ីកូនឆ្មាទាំងរស់១ក្បាលសត្វទាំងនេះជារបស់ខ្លួន។
ដោយឃើញសភាពបែបនេះប្រជាពលរដ្ឋបានរាយការណ៍មករូបលោក(ដមត្ថកិច្ច)ហើយក៏ចាត់ឲ្យនាយរងប៉ុស្តិ៍រដ្ឋបាលកំពង់រាប និងប្រជាការពារចុះទៅដល់ផ្ទះនោះ តែមិនឃើញយុវជននោះនៅផ្ទះទេ រហូតម៉ោង២១;១៥នាទីយប់យុវជននោះត្រឡប់មកលើផ្ទះវិញព្រមទាំងបិទទ្វារដេក។ ដោយបារម្ភប្រជាពលរដ្ឋក្នុងភូមិគ្រោះថ្នាក់?សមត្ថកិច្ចនៅឃ្លាំមើលរហូតដល់ម៉ោង៨ព្រឹកថ្ងៃទី៩ ក៏ទៅគោះទ្វារឲ្យបើក ប៉ុន្តែយុវជននោះមិនព្រមបើកទេ ថែមទាំងឆ្លើយថានៅដេក។
លោកអធិការបញ្ជាក់ថា ដោយយុវជននោះមិនទាន់ប្រព្រឹត្តនូវទង្វើអ្វីមួយក្នុងបទល្មើសព្រហ្មទណ្ឌ គ្រាន់តែឲ្យនៅតាមឃ្លាំមើលរហូត ស្រាប់តែម៉ោងប្រមាណ១១:០០ព្រឹកថ្ងៃទី៩ ខែកញ្ញា ឆ្នាំ២០១៨ យុវជននោះក៏លើកពាងប្រហុកបើកស៊ីនៅមាត់ច្រកចូលផ្ទះឈើ ចំណែកសមត្ថកិច្ចមិនហ៊ានឡើងទៅទេដោយខ្លាចគ្រោះថ្នាក់ដោយប្រការណាមួយអាចខ្លាចជននេះមានកាំបិត ទោះជាបែបណាសមត្ថកិច្ចនូវបន្តឃ្លាំមើលបន្តទៀតរហូតឃាត់ខ្លួនបាន៕
