ជនជាតិវៀតណាមម្នាក់ ត្រូវប៉ូលីសចាប់ខ្លួន ក្នុងករណីលួចរថយន្តស៊េរីទំនើប

ភ្នំពេញ ៖ ជនសង្ស័យម្នាក់ត្រូវបានសមត្ថកិច្ចស្ទាក់ ឃាត់ខ្លួនបាន ក្រោយធ្វើសកម្មភាពលួច រថយន្តមួយគ្រឿង ចេញពីក្រុមហ៊ុន ឆៃណាថោន ដោយបានបើករថយន្តបុក បំបាក់ប៉ារាស់សន្តិសុខ ដែលដាក់ត្រួតពិនិត្យនៅច្រកចេញ-ចូល រួចជិះគេចខ្លួនតែម្តង ។

សមត្ថកិច្ចបានឲ្យដឹងថា ជនសង្ស័យ ជាជនជាតិវៀតណាម ភេទប្រុស បានធ្វើសកម្មភាពលួចរថយន្ត ០១គ្រឿង ម៉ាក AUDI Q7 ពណ៌ទឹកមាស ពាក់ស្លាកលេខ ភ្នំពេញ 2BM-6235 កាលពីវេលាម៉ោង ១២ និង ៤០នាទីថ្ងៃត្រង់ ថ្ងៃទី ១៥ ខែ កុម្ភៈ ឆ្នាំ ២០២២ នៅចំណុចក្រុមហ៊ុន ឆៃណាថោន ស្ថិតនៅ ភូមិ៦ សង្កាត់៤ ក្រុងព្រះសីហនុ ខេត្តព្រះសីហនុ ។

ក្រោយធ្វើសកម្មភាពលួចរថយន្តបានសម្រេច ជនសង្ស័យបានបើករថយន្តបុកបំបាក់ប៉ារាស់សន្តិសុខ ដែលដាក់ត្រួតពិនិត្យនៅច្រកចេញ-ចូល រួចជិះគេចខ្លួនតែម្តង ។

សមត្ថកិច្ចបានឲ្យដឹងទៀតថា បន្ទាប់ពីទទួលបាន ព័ត៌មាននេះភ្លាម កម្លាំងផែនការងារ នគរបាលព្រហ្មទណ្ឌ បានសហការណ៍ ជាមួយកម្លាំងអធិការដ្ឋាននគរបាលក្រុងព្រះសីហនុ កម្លាំងអធិការដ្ឋាននគរបាលស្រុកព្រៃនប់ និងកម្លាំងអធិការដ្ឋាននគរបាលស្រុកកំពង់សីលា បានដាក់កម្លាំងចាំស្ទាក់ចាប់ជនសង្ស័យនៅតាមបណ្តោយផ្លូវជាតិលេខ ៤ លុះរហូតដល់វេលាម៉ោង ១៣ និង ៣០ នាទី ជនសង្ស័យបាន ជិះរថយន្តដែលលួចបាន ឆ្លងកាត់ប៉ារាស់ កម្លាំងសមត្ថកិច្ចយើង ដែលដាក់ចាំស្ទាក់ចាប់ ជនសង្ស័យនៅចំណុចឃុំវាលរេញ តែជនសង្ស័យមិនព្រមឈប់ ថែមទាំងបានជិះបំបុក ប៉ារាស់កម្លាំងសមត្ថកិច្ចយើង រួចបន្តជិះគេចខ្លួន លុះដល់ចំណុចឃុំស្ទឹកឆាយ ជនសង្ស័យបាន ជិះបំបុកប៉ារាស់របស់កម្លាំងសមត្ថកិច្ចយើងទៀត ហើយជនសង្ស័យបាន បន្តជិះគេចខ្លួនរហូត ដល់ស្រុកកំពុងសីលា ទើបកម្លាំងសមត្ថកិច្ចយើង ស្ទាក់ចាប់ឃាត់ខ្លួនបានជនសង្ស័យ ។

បច្ចុប្បន្ន ជនសង្ស័យ ការិយាល័យ នគរបាលព្រហ្មទណ្ឌកម្រិតស្រាល កំពុងធ្វើការសាកសួរ ៕