ឃាត់ខ្លួនជនជាតិ៤នាក់ ចាប់បង្ខាំង ធ្វើទារុណកម្មជនជាតិដូចគ្នារឿងជំពាក់លុយលេងល្បែងកាស៊ីណូ
ព្រះសីហនុ៖ ជនរងគ្រោះជាជនជាតិចិន២នាក់ ត្រូវបានកម្លាំងនគរបាលខេត្តព្រះសីហនុ បានបើកប្រតិបត្តិការចុះទៅជួយអន្តរាគមន៍ នៅជាន់ទី៤សណ្ឋាគារ នៃកាស៊ីណូឆាយយូ ទីដែលជនរងគ្រោះ ត្រូវបានជនដៃដល់ដែលជនជាតិចិនដូចគ្នា បានចាប់បង្ខាំងធ្វើទារុណកម្មយ៉ាងធ្ងន់ធ្ងរពាក់ព័ន្ធរឿងលុយ ហើយជនជាតិ៤នាក់ ត្រូវនគរបាលខេត្តព្រះសីហនុឃាត់ខ្លួន ។
ករណីនេះកើតឡើងដោយសារ ជនរងគ្រោះបានធានាលុយចំនួន១០០.០០០យ័ន ពីក្រុមជនសង្ស័យ ដើម្បីឲ្យមិត្តភក្តិយកទៅលេងល្បែង នៅកាស៊ីណូ ឆាងយូ ពេលលេងចាញ់ មិត្តភក្តិរបស់ជនរងគ្រោះគ្មានលុយសង ក្រុមជនសង្ស័យ បានចាប់ជនរងគ្រោះឃុំឃាំងក្នុងបន្ទប់ ហើយធ្វើទារុណកម្ម វាយធ្វើបាប ប្រើពិលឆក់ បង្ខំឲ្យជនរងគ្រោះសរសេរលិខិតជំពាក់ប្រាក់។ ជនសង្ស័យ ត្រូវបានការិយាល័យនគរបាលព្រហ្មទណ្ឌកម្រិតស្រាល កំពុងបន្តនីតិវិធី។
មន្ត្រីនគរបាលខេត្តព្រះសីហនុ បានឱ្យដឹងថា កាលពីថ្ងៃទី១០ ខែកញ្ញា ឆ្នាំ២០១៨ វេលាម៉ោង១៥ និង២០នាទី ស្នងការដ្ឋាននគរបាលខេត្តព្រះសីហនុ បានទទួលព័ត៌មានថា នៅជាន់ទី៤សណ្ឋាគារ នៃកាស៊ីណូឆាងយូ ក្នុងបន្ទប់លេខៈ៤០៩ ស្ថិតនៅក្រុមទី១៥ ភូមិ៤ សង្កាត់៤ ក្រុង-ខេត្តព្រះសីហនុ មានករណី ចាប់ឃុំឃាំង បង្ខាំងមនុស្សខុសច្បាប់ ធ្វើទារុណកម្ម។ ដោយបានទទួលបញ្ជារពីលោកឧត្តមសេនីយ៍ស្នងការ កម្លាំងផែននគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលក្រុង និងកម្លាំងប៉ុស្តិ៍សង្កាត់៤ បានប្រតិបត្តិការបង្ក្រាប។
មន្ត្រីនគរបាលដដែលបន្តថា ក្នុងប្រតិបត្តិការខាងលើ កម្លាំងសមត្ថកិច្ច បានរំដោះជនរងគ្រោះជាជនជាតិចិនចំនួន២នាក់ (ស្រីម្នាក់) និងឃាត់ខ្លួនបានជនសង្ស័យ ជាជនជាតិចិនចំនួន ៤នាក់។ ជនរងគ្រោះ ២នាក់ រួមមាន ទី១-ឈ្មោះ CHEN TI ភេទប្រុស អាយុ ៣៦ឆ្នាំ ជនជាតិចិន លេខិតឆ្លងដែនលេខៈ ED៦៦៨០៨៤២ ស្នាក់នៅសណ្ឋាគារដើមត្នោត ក្រុម១៥ ភូមិ៤ សង្កាត់៤ ក្រុង-ខេត្តព្រះសីហនុ រងរបួសបែកមាត់ និងស្នាមដាច់រលាត់ខ្នង(រងរបួសមធ្យម) ទី២-ឈ្មោះ DAI YANYING ភេទស្រី អាយុ ៤៤ឆ្នាំ ជនជាតិចិន លិខិតឆ្លងដែនលេខៈ ED៦៦៨៩៣៨២ ស្នាក់នៅសណ្ឋាគារដើមត្នោត ក្រុម១៥ ភូមិ៤ សង្កាត់៤ ក្រុង-ខេត្តព្រះសីហនុ ។
ជនសង្ស័យ ៤នាក់ទី១-ឈ្មោះ WU TAOTAO ភេទប្រុស អាយុ ៣០ឆ្នាំ ជនជាតិចិន មុខរបរ មិនពិតប្រាកដ លិខិតឆ្លងដែនលេខៈ E៤៧១១០៧៨៣ ស្នាក់នៅ នៅជាន់ទី៤ នៃកាស៊ីណូខ្សាច់មាស បន្ទប់លេខៈ ៤០៩ ស្ថិតនៅក្រុមទី១៥ ភូមិ៤ សង្កាត់៤ ក្រុង-ខេត្តព្រះសីហនុ, ទី២-ឈ្មោះ WU XIONGBO ភេទប្រុស អាយុ ៣៣ឆ្នាំ ជនជាតិចិន មុខរបរ មិនពិតប្រាកដ លិខិតឆ្លងដែនលេខៈ E១៨៤៨៥៥៨៨ ស្នាក់នៅ នៅជាន់ទី៤ នៃកាស៊ីណូខ្សាច់មាស បន្ទប់លេខៈ៤០៩ ស្ថិតនៅក្រុមទី១៥ ភូមិ៤ សង្កាត់៤ ក្រុង-ខេត្តព្រះសីហនុ, ទី៣-ឈ្មោះ WU XUXIANG ភេទប្រុស អាយុ ២៧ឆ្នាំ ជនជាតិចិន មុខរបរ មិនពិតប្រាកដ លិខិតឆ្លងដែនលេខៈ E៨៩៦៨៤៣២៧ ស្នាក់នៅ នៅជាន់ទី៤ នៃកាស៊ីណូខ្សាច់មាស បន្ទប់លេខៈ ៤០៩ ស្ថិតនៅក្រុមទី១៥ ភូមិ៤ សង្កាត់៤ ក្រុង-ខេត្តព្រះសីហនុ និងទី៤-ឈ្មោះ REN JIHU ភេទប្រុស អាយុ ២៩ឆ្នាំ ជនជាតិចិន មុខរបរមិនពិតប្រាកដ លិខិតឆ្លងដែនលេខៈ E៤៥៣៧០៣៤៨ ស្នាក់នៅជាន់ទី៤ នៃកាស៊ីណូខ្សាច់មាស បន្ទប់លេខៈ៤០៩ ស្ថិតនៅក្រុមទី១៥ ភូមិ៤ សង្កាត់៤ ក្រុង-ខេត្តព្រះសីហនុ។
វត្ថុតាងចាប់យកបាន៖ពិលឆក់ចំនួន ២គ្រឿង រថយន្ត ១គ្រឿង ម៉ាក LEXUS RX៣០០ ពណ៌ស ស្លាកលេខៈ ភ្នំពេញ 2AL-5010។ករណីនេះកើតឡើងដោយសារ ជនរងគ្រោះបានធានារលុយចំនួន ១០០.០០០យ័ន ពីក្រុមជនសង្ស័យ ដើម្បីឲ្យមិត្តភក្តិយកទៅលេងល្បែងនៅកាស៊ីណូ ឆាងយូ ពេលលេងចាញ់មិត្តភក្តិរបស់ជនរងគ្រោះ គ្មានលុយសងក្រុមជនសង្ស័យ បានចាប់ជនរងគ្រោះឃុំឃាំងក្នុងបន្ទប់ ហើយធ្វើទារុណកម្ម វាយធ្វើបាប ប្រើពិលឆក់ បង្ខំឲ្យជនរងគ្រោះសរសេរលិខិតជំពាក់ប្រាក់។ បច្ចុប្បន្នជនសង្ស័យខាងលើនេះ ការិយាល័យនគរបាលព្រហ្មទណ្ឌកម្រិតស្រាល កំពុងបន្តនីតិវិធី ៕
