នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ អញ្ជើញជួបប្រជុំទ្វេភាគីជាមួយ ឯកឧត្តម Reece Philip Kershaw អគ្គស្នងការនគរបាលសហព័ន្ធអូស្រ្តាលី

ភ្នំពេញ ៖ ព្រឹកថ្ងៃអង្គារ ១៣រោច ខែមាឃ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០១ ខែមីនា ឆ្នាំ២០២២ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញជួបប្រជុំទ្វេភាគីជាមួយអគ្គស្នងការនគរបាលសហពន្ធ័អូស្រ្តាលីដឹកនាំដោយឯកឧត្តម Reece Philip Kershaw នៅអគ្គស្នងការដ្ឋាននគរបាលជាតិ ។

ជាកិច្ចចាប់ផ្តើម​ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបានសម្តែងនូវការស្វាគមន៍ចំពោះ ឯកឧត្តមអគ្គស្នងការនគរបាលសហព័ន្ធអូស្រ្តាលី ដោយបានចាត់ទុកដំណើរទស្សនកិច្ចរបស់ឯកឧត្តមអគ្គស្នងការនគរបាលសហព័ន្ធអូស្រ្តាលីនៅពេលនេះ គឺជាដំណើរទស្សនកិច្ចដ៏ពិសេសមួយដែលបានចូលរួមប្រជុំជាទ្វេភាគីជាមួយនគរបាលជាតិកម្ពុជាផង និងក្នុងនាមជាដៃគូរបស់អាស៊ានណាប៉ូលផង​។ ក្នុងឱកាស​នោះដែរ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ក៏បានវាយតម្លៃខ្ពស់ចំពោះលទ្ធផល នៃកិច្ចសហប្រតិបត្តិការរវាងនគរបាលប្រទេសទាំងពីរ ជាពិសេសការអនុវត្តMOU ដែលភាគីទាំងពីរបានចុះហត្ដលេខានៅពេលកន្លងមក។ ក្រៅពីនោះភាគីអូស្ត្រាលីក៏បានជួយគាំទ្រទាំងឧបករណ៍ និងសម្ភារៈព្រមទាំងជួយដល់ការបណ្តុះបណ្តាល រួមទាំងពង្រឹងក្រុមការងារប្រយុទ្ធប្រឆាំងឧក្រិដ្ឋកម្មឆ្លងដែន ដែលមានការិយាល័យនៅក្នុងទីតាំងអគ្គស្នងការដ្ឋាននគរបាលជាតិនេះផ្ទាល់ហើយ ការិយាល័យនេះ ក៏បានក្លាយជាមជ្ឍមណ្ឌលបណ្តុះបណ្តាលកងកម្លាំងនគរបាលកម្ពុជា ពាក់ព័ន្ធនិងការប្រឆាំងឧក្រិដ្ឋកម្មឆ្លងដែនទៀតផង។ ក្រៅពីនោះភាគីទាំងពីរក៏បានផ្លាស់ប្តូរព័តមានពីគ្នាទៅវិញទៅមកជាច្រើនរួមមាន៖ សកម្មភាពបទល្មើសគ្រឿងញៀន និងការជួញដូរមនុស្ស ដែលក្នុងខណៈនោះ ឯកឧត្តម នេត សាវឿន ក៏បានរំលឹកឡើងវិញពីជំនួយរបស់ភាគីអូស្រ្តាលីក្នុងការពង្រឹងនគរបាលសហគមនៅកម្ពុជាដែលបច្ចុប្បន្ននេះបើទោះបីជានគរបាលអូស្ត្រាលីបានបញ្ចប់គម្រោងនិងដកមន្ត្រីជំនាញ ព្រមទាំងថវិកាក្នុងការជួយក្តី ក៏នគរបាលកម្ពុជានៅតែបន្តស្មារតីនេះ ដេីម្បីធានានិរន្តភាពនៃការអនុវត្តគម្រោងនេះ​។ ក្រៅពីនោះកម្ពុជា និងអូស្ត្រាលី ក៏បានសហការគ្នាក្នុងការបង្ក្រាបអង្គការចាត់តាំងម៉ូតូធំ មិនអោយកើតមាននៅកម្ពុជា ទៀតផង​។
​ជាកិច្ច្ចឆ្លេីយតបក្នុងជំនួប ឯកឧត្តម Reece Philip Kershaw អគ្គស្នងការនគរបាលសហព័ន្ធអូស្រ្តាលីបានថ្លែងអំណរគុណចំពោះបដិសណ្ឋាកិច្ចយ៉ាងកក់ក្តៅ ដែលបានទទួលរាក់ទាក់ប្រកបដោយភាពស្និទស្នាល ហើយបានថ្លែងអំណរគុណចំពោះកិច្ចសហប្រតិបត្តការទ្វេភាគីរបស់នគរបាលប្រទេសទាំងពីរ។
ឯកឧត្តម Reece Philip Kershaw បានបញ្ជាក់ថាក្នុងកិច្ចសហប្រតិបត្តការជាង២០ឆ្នាំ រវាងនគរបាលកម្ពុជា និងអូស្ត្រាលី ដែលបន្សល់ទុកនៅសមិទ្ធិផលជាច្រើន ព្រមទាំងបានធ្វើអោយចំណងមិត្តភាពនេះក្លាយទៅជាមិត្តភាពជាប្រពៃណី។ ក្នុងឱកាសនោះ ឯកឧត្តមអគ្គស្នងការនគរបាលសហព័ន្ធអូស្រ្តាលី បានថ្លែងអំណរគុណយ៉ាងជ្រាលជ្រៅចំពោះកិច្ចសហការរបស់នគរបាលកម្ពុជាពាក់ព័ន្ធនិងការប្រយុទ្ធប្រឆាំងគ្រឿងញៀន និងការបង្ការទប់ស្កាត់ពីចំងាយគ្រឿងញៀនទៅអូស្រ្តលី ក៏ដូចជាក្រុមម៉ូតូធំ។ ពាក់ព័ន្ធកិច្ចនេះ ឯកឧត្តម បានប្តេជ្ញាស្មាគៀកស្មាជាមួយកម្លាំងនគរបាលជាតិកម្ពុជា ដើម្បីប្រយុទ្ធប្រឆាំងជាមួយបទឧក្រិដ្ឋ ដែលមានអង្គការចាត់តាំងអោយបានជោគជ័យ។
ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបាន ក៏បានឯកភាពចំពោះការប្តេជ្ញាចិត្តរបស់ ឯកឧត្តមអគ្គស្នងការនគរបាលសហព័ន្ធអូស្រ្តាលី និងបានលើកសំណូមពរមួយចំនួនដើម្បីអោយភាគីអូស្រ្តាលី ធ្វើការពិចារណា៖ ទី១-ស្នើសុំអោយមានការគាំទ្រពាក់ព័ន្ធនិងការផ្លាស់ប្តូរព័តមាននានា ដែលពាក់ព័ន្ធដល់ព្រឹត្តិការណ៍នយោបាល ក៏ដូចជាព្រឹត្តិការណ៍តំបន់ដែលពាក់ព័ន្ធជាមួយកម្ពុជា ដែលឆ្នាំ២០២២-២០២៣នេះ កម្ពុជានឹងមានការបោះឆ្នោតឃុំ សង្កាត់ ការបោះឆ្នោតសភាជាតិ ដោយឡែកកម្ពុជានឹងធ្វើជាម្ចាស់នៃកិច្ចប្រជុំកំពូលអាស៊ាន និងវេទិកាសំខាន់មួយទៀតគឺការប្រកួតកីឡាស៊ីហ្គេម ដែលជាព្រឹត្តការណ៍ទី១ សម្រាប់កម្ពុជា ដែលត្រូវទទួលរ៉ាប់រងជាម្ចាស់ផ្ទះ ជាពិសេសគឺការផ្តល់ជាបទពិសោធន៍មកដល់នគរបាលកម្ពុជា ចំពោះកិច្ចការពារព្រឹត្តការណ៍ទាំងអស់នេះ តាមរយៈការប្រជុំតាមវីដេអូពីចម្ងាយ រឺក៏អាចចាត់បញ្ជូនផ្លាស់ប្តូរគណៈប្រតិភូក្នុងក្របខណ្ឌពាក់ព័ន្ធនិងកិច្ចការពារនេះ។ ក្រៅពីនោះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ក៏បានស្នើសុំអោយភាគិអូស្រ្តាលី ជួយពង្រឹងធនធានមនុស្សពាក់ព័ន្ធបទល្មើសសម្អាតប្រាក់ បទល្មើសសេដ្ឋកិច្ច បទល្មើសពាក់ព័ន្ធបច្ចេកវិទ្យា ដែលចាត់ទុកជាបញ្ហាថ្មីសំរាប់កម្ពុជា។ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ក្នុងជំនួបក៏បានថ្លែងគាំទ្រខ្ពស់ចំពោះការលើកឡើងរបស់ភាគីអូស្រ្តាលី អំពីលទ្ធផលដ៏ល្អប្រសើរក្នុងការពង្រឹងកិច្ចសហប្រតិបត្តការរយៈពេល២០ឆ្នាំ ជាលក្ខណប្រពៃណីនេះ ហើយបានឯកភាពដើរទៅមុខរួមគ្នាក្នុងការប្រយុទ្ធប្រឆាំងបទល្មើសគ្រប់ប្រភេទ គ្រប់ទម្រង់ ដើម្បីធានាសន្តិសុខ សុវត្ថិភាពក្នុងប្រទេសក៏ដូចជាក្នុងតំបន់ផងដែរ ។
បន្ថែមពីនេះ ឯកឧត្តម នាយឧត្តមសេនីយ៍ នេត សាវឿន ក៏បានបញ្ជាក់អំពីបញ្ហាប្រឈមជាសត្យានុម័តមួយចំនួនពាក់ព័ន្ធដល់និន្នាការគ្រឿងញៀននៅកម្ពុជា រួមទាំងការគ្រប់គ្រងសារធាតុគីមីផ្សំសំរាប់សំយោគកែរច្នៃផលិតគ្រឿងញៀនផងដែរ ដែលបញ្ហានេះបានផ្លាស់ប្តូរយោបល់ និងពិសោធន៍ទៅវិញទៅមក និងប្តេជ្ញារួមគ្នាផ្លាស់ប្តូរព័ត៌មាន ក្នុងន័យពង្រឹងកិច្ចសហប្រតិបត្តការ ការបណ្តុះបណ្តាល ដើម្បីទប់ស្កាត់នូវបទឧក្រិដ្ឋ ពិសេសទប់ស្កាត់គ្រឿងញៀនអោយបានពីចម្ងាយ។
ជាការឆ្លើយតបភាគីអូស្រ្តាលី ពេញចិត្តក្នុងការធ្វើកិច្ចសហប្រតិបត្តការ ដែលជាសំណូមពររបស់ភាគីកម្ពុជា និងសន្យាជួយជ្រោមជ្រែងដល់ភាគីកម្ពុជា ទាំងពិសោធន៍ និងកិច្ចការផ្សេងៗទៀតដែលអាចធ្វើទៅបាន៕