ឯកអគ្គរដ្ឋទូតចិន ប្រគល់រង្វាន់ការប្រកួតស្នាដៃ រូបថតដោយទូរស័ព្ទដៃ ក្នុងប្រទេសកម្ពុជា ស្តីពីការអបអរសាទរ ពិធីបុណ្យចូលឆ្នាំប្រពៃណីចិន របស់ប្រជាជនជាប់សែស្រឡាយចិន លើសកលលោក ប្រចាំឆ្នាំ២០២២
ភ្នំពេញ ៖ នាថ្ងៃទី២៤ខែមីនា ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា អញ្ជើញ ជាអធិបតីនិងថ្លែងសុន្ទរកថាក្នុងពិធីប្រគល់រង្វាន់ ការប្រកួតស្នាដៃរូបថត ដោយទូរស័ព្ទដៃក្នុងប្រទេសកម្ពុជា ស្តីពីការអបអរសាទរ ពិធីបុណ្យចូលឆ្នាំប្រពៃណីចិន របស់ប្រជាជនជាប់សែស្រឡាយចិនលើសកលលោកប្រចាំឆ្នាំ២០២២។
លោក Chen Lujun ប្រធានទីភ្នាក់ងារសារព័ត៌មានចិន(China News Service), លោក Wu Xingli ប្រធានប្ដូរវេន នៃសមាគមសម្ព័ន្ធខ្មែរចិននៅកម្ពុជា, លោក Zhao Jinhui ប្រធានស្តីទីសភាពាណិជ្ជកម្មចិន នៅកម្ពុជា និងលោកស្រី Jiang Xin នាយិកាផ្នែកបញ្ហាហានិភ័យ នៃធនាគារចិន(ហុងកុង)Co.,Ltdបានចូលរួមក្នុងពិធីខាងលើ។
ឯកឧត្តម Wang Wentian មានប្រសាសន៍ថា ចិននិងកម្ពុជាមានវប្បធម៌ ល្អប្រពៃយ៉ាងយូរអង្វែង ហើយការផ្លាស់ប្ដូរវប្បធម៌ និងការសិក្សាពីគ្នាទៅវិញទៅមក តែងជាខ្លឹមសារដ៏សំខាន់ នៃកិច្ចសហប្រតិបត្តិការទ្វេភាគី។ ការប្រកួតលើកនេះ បានផ្តិតយករូបភាពដ៏អស្ចារ្យ នៃពិធីបុណ្យចូលឆ្នាំប្រពៃណីចិន នៅក្នុងប្រទេសកម្ពុជា ដែលបង្ហាញពីភាពទាក់ទាញ ដ៏ពិសេសនៃវប្បធម៌ចិន ដើម្បីឱ្យប្រជាជន ជាប់សែស្រឡាយចិន នៅកម្ពុជា មានភាពសប្បាយរីករាយជាមួយគ្នា ក្នុងពិធីបុណ្យមួយនេះ នៅក្នុងប្រទេសកម្ពុជា។
ឯកឧត្តមបានលើកទឹកចិត្ត ដល់បេក្ខជនទាំងអស់ បន្តធ្វើជាស្ពាននិង ជាអ្នកតភ្ជាប់ចំណង មិត្តភាពចិន-កម្ពុជា និងបង្ហាញពីរូបរាងដ៏ល្អប្រពៃដែលប្រកប ដោយលក្ខណៈរួសរាយ រាក់ទាក់ មានចិត្តទូលាយ តស៊ូ ក្លាហានរបស់ប្រជាជន ជាប់សែស្រឡាយចិន។
លោក Chen Lujun មានប្រសាសន៍ថា ការប្រកួតលើកនេះបាន ផ្ដល់នូវច្រកបណ្តាញ ដែលប្រកបដោយ ភាពងាយស្រួល សម្រាប់ការផ្សព្វផ្សាយ សម្លេងប្រជាជនចិននិងកម្ពុជា និងបង្ហាញពីរឿងនិទាន នៃចំណងមិត្តភាពចិន-កម្ពុជា និងបានផ្តល់ជាវេទិកា ដ៏មានឥទ្ធិពលមួយ សម្រាប់ការលើកកម្ពស់ ចំណងមិត្តភាពចិន-កម្ពុជា បង្កើនទំនាក់ទំនង មនោសញ្ចេតនារវាងប្រជាជនទាំងពីរ នឹងចាក់ឫសកាន់តែមុតមាំ សម្រាប់កិច្ចការជំរុញ គំនិតផ្តួចផ្ដើម “ខ្សែក្រវាត់និងផ្លូវ” ក៏ដូចជាការពង្រីកស្ថានភាពថ្មីសម្រាប់កិច្ចសហប្រតិបត្តិការ ទំនាក់ទំនងអន្តរជាតិ។
កម្មវិធីខាងលើនេះត្រូវបានរួមគ្នារៀបចំ ដោយបណ្តាញរូបភាពសារព័ត៌មានចិន (Newsphoto), សមាគមសម័្ពន្ធខ្មែរចិននៅកម្ពុជា និងសភាពាណិជ្ជកម្មចិននៅកម្ពុជា។ រៀបចំជាក់ស្តែងដោយសាខាសារព័ត៌មានចិនក្នុងប្រទេសកម្ពុជា និងសាខាធនាគារចិន (ហុងកុង) នៅរាជធានីភ្នំពេញ៕
