នាយឧត្តមសេនីយ៍ មាស វិរិទ្ធ ប្រាប់គណគ្រប់គ្រង មជ្ឈមណ្ឌលជាតិ ឱ្យដឹកនាំ និងពង្រឹងឯកភាពផ្ទៃក្នុង ដេីម្បីការផ្តល់សេវា ប្រកបដោយប្រសិទ្ធភាពនិងភាពជឿជាក់
ខេត្តព្រះសីហនុ: ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍ណែនាំបែបនេះក្នុងឱកាសអញ្ជេីញបិទពិធីបណ្តុះបណ្តាលស្តីពីការព្យាបាលនិងស្តារនីតិសម្បទាអ្នកញៀនគ្រឿងញៀនដោយផ្អែកលេីសហគមន៍សម្រាប់មន្រ្តីបម្រេីការងារនៅមជ្ឈមណ្ឌលជាតិព្យាបាលនិងស្តារនីតិសម្បទាអ្នកញៀនគ្រឿងញៀនដោយស្មគ្រ័ចិត្តនិងផ្អែកលេីសហគមន៍និងប្រគល់វិញ្ញាបនបត្រជូនសិក្ខាកាមដែលបានបញ្ចប់ការសិក្សាចំនួន៥១រូប នាល្ងាចថ្ងៃទី៧ ខែមេសា ឆ្នាំ២០២២នេះ ក្រោមវត្តមានចូលរួមពីតំណាងក្រសួង ស្ថាប័ន អង្គភាពពាក់ព័ន្ធ។
ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា បានធ្វេីការរាយការណ៍ពីលទ្ធផលនៃការបណ្តុះបណ្តាលថាពិតជាបានផ្ទេរចំណេះដឹងបទពិសោធន៍ដល់មន្រ្តីយេីងយ៉ាងពិតប្រាកដនិងមានប្រសិទ្ធភាពតាមរយ:ការវាស់ស្ទង់ចំណេះដឹងរបស់សិក្ខាកាមមុនវគ្គនិងក្រោយវគ្គសិក្សា ១-មុនវគ្គខ្សោយ ៨នាក់ មធ្យម១៣នាក់ ល្អបង្គួរ២០នាក់ ល្អណាស់១០នាក់ ២-ក្រោយវគ្គ០នាក់ មធ្យម០នាក់ ល្អបង្គួរ៦នាក់ ល្អណាស់៤៥នាក់។
ថ្លែងក្នុងនាមឯកឧត្តម ឧបនាយករដ្ឋមន្រ្តី កែ គឹមយ៉ាន ប្រធាន នាឱកាសនោះ ឯកឧត្ដម នាយឧត្ដមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀនបានមានប្រសាសន៍ដោយថ្លែងអំណរគុណនិងកោតសសេីរដល់ក្រសួងសុខាភិបាល ក្រសួងសង្គមកិច្ច អតីតយុទ្ធជន និងយុវនីតិសម្បទា និងអ្នកពាក់ព័ន្ធដែលបានខិតខំបណ្តុះបណ្តាលផ្ទេរចំណេះដឹងដល់សិក្ខាកាមទាំងអស់ប្រកបដោយគុណភាព ប្រសិទ្ធភាព។
ក្នុងឱកាសនោះដែរ ឯកឧត្តម នាយឧត្តមសេនីយ៍ មាស វិរិទ្ធ បានបន្ថែមទៀតថា ខណៈកម្ពុជា ក៏ដូចជាបណ្តាប្រទេសនានាក្នុងតំបន់ និងពិភពលោកបាន និងកំពុងទទួលរងនូវការឆ្លងរីករាលដាលនៃជម្ងឺកូវីដ-១៩ ស្ថានភាពនៃការកែច្នៃ ផលិត ការចរាចរ និងការប្រើប្រាស់គ្រឿងញៀនខុសច្បាប់ ពុំមានការថយចុះនោះទេ ផ្ទុយទៅវិញហាក់ដូចជាមានកំណើនកាន់តែច្រើនឡើងគួរឲ្យព្រួយបារម្ភ។ ទន្ទឹមនោះការងារព្យាបាល និងស្តារនីតិសម្បទាការរៀបចំគោលនយោបាយសម្រាប់ព្យាបាល និងស្តារនីតិសម្បទាអ្នកញៀនគ្រឿងញៀន នៅមិនទាន់ឆ្លើយតបបានទៅនឹងផលប៉ះពាល់ធ្ងន់ធ្ងរដល់សុខុមាលភាពសាធារណៈ និង បំណិនជីវិតនៅឡេីយ។
ជាមួយគ្នានេះ ឯកឧត្តម នាយឧត្តមសេនីយ៍ មាស វីរិទ្ធ បានប្រាប់ទៅគណ:គ្រប់គ្រងមជ្ឈមណ្ឌលជាតិឱ្យដឹកនាំនិងពង្រឹងឯកភាពផ្ទៃក្នុងដេីម្បីការផ្តល់សេវាប្រកបដោយប្រសិទ្ធភាពនិងភាពជឿជាក់ បណ្តុះបណ្តាលវិជ្ជាជីវ: កៀរគរ សហការគាំទ្រពីវិស័យឯកជន ពិសេសក្នុងខេត្តព្រះសីហនុ ដើម្បីជួយរកទីផ្សារការងារសម្រាប់ក្មួយៗ ដែលកំពុងសម្រាកព្យាបាល និងចាត់ចែងនូវសម្ភារបច្ចេកទេស ពេទ្យ បុគ្គលិកជំនាញដើម្បីធានាបាននូវនិរន្តភាពនៃការ ព្យាបាល និងស្តារនីតិសម្បទាអ្នកញៀនគ្រឿងញៀននៅមជ្ឈមណ្ឌលជាតិ។
ចុងបញ្ចប់នៃកម្មវិធី មានប្រគល់នូវប័ណ្ណសសេីរជូនគ្រូឧទ្ទេស អ្នកសម្របសម្រួលការងារកន្លងមក និងប្រគល់វិញ្ញាបនបត្របញ្ជាក់ការសិក្សាជូនសិក្ខាកាមទាំងអស់ផងដែរ៕
