ក្រុមការងារចំណាកស្រុក របស់ខេត្តព្រៃវែង ជួបប្រជុំដើម្បីរៀបចំការ ជួបសំណេះសំណាល ជាមួយកម្មករ ពលករចំណាកស្រុក អំឡុងពេលពិធីបុណ្យចូលឆ្នាំថ្មីប្រពៃណីជាតិ

ព្រៃវែង ៖ ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារកម្មករ ពលករចំណាកស្រុករបស់ខេត្តព្រៃវែង បានដឹកនាំកិច្ចប្រជុំក្រុមការងារ ដើម្បីត្រួតពិនិត្យការងារកន្លងមក និងលើកទិសដៅការងារបន្ត ពិសេសការរៀបចំពិធីជួបសំណេះសំណាលផ្សេងៗ និងការជួបប្រាស្រ័យដោយផ្ទាល់ជាមួយបងប្អូនកម្មករ ពលករចំណាកស្រុកនៃខេត្តព្រៃវែងកំពុងធ្វើការនៅទីជិតឆ្ងាយដែលសំរាកពីការងារ និងវិលត្រឡប់មកជួបជុំក្រុមញាតិ គ្រួសារវិញក្នុងអំឡុងពេលពិធីបុណ្យចូលឆ្នាំថ្មីប្រពៃណីជាតិ ឆ្នាំខាល ត្រូវនឹងថ្ងៃទី១៤-១៥-និង១៦ ខែមេសា ខាងមុខ។

កិច្ចប្រជុំនេះ បានប្រព្រឹត្តទៅកាលពីព្រឹកថ្ងៃទី៧ ខែមេសា ឆ្នាំ២០២២ នៅសាលប្រជុំសាលាខេត្តព្រៃវែង ដោយមានការអញ្ជើញចូលរួមពីសំណាក់ ឯកឧត្តម លោកជំទាវ អស់លោក លោកស្រីជាអនុប្រធាន សមាជិកក្រុមការងារនៅថ្នាក់ជាតិនិងថ្នាក់ខេត្ត អភិបាល អភិបាលរងស្រុក-ក្រុង មន្រ្តីបង្គោលនៃក្រុមលេខាធិការដ្ឋាន និងមន្ត្រីពាក់ព័ន្ធ សរុបមានអ្នកចូលរួមចំនួនប្រមាណជិត ១០០នាក់។

បន្ទាប់ពីលោក អន ភារៈ អភិបាលរងខេត្តព្រៃវែង និងជាអនុប្រធានប្រចាំការក្រុមការងារចំណាកស្រុក បានធ្វើសេចក្តីរាយការណ៍ពីស្ថានភាពបច្ចុប្បន្នភាពចលនាចំណាកស្រុកក្នុងខេត្តព្រៃវែង និងអានសេចក្តីណែនាំស្តីពីពិធីសំណេះសំណាលជាមួយកម្មករ ពលករចំណាកស្រុករបស់ខេត្តព្រៃវែងក្នុងឱកាសពិធីបុណ្យចូលឆ្នាំថ្មីប្រពៃណីជាតិ និងការរួមយោបល់ពីអង្គប្រជុំរួចមក ឯកឧត្តមរដ្ឋមន្រ្តី ព្រុំ សុខា ប្រធានក្រុមការងារ បានថ្លែងកោតសរសើរ លើកទឹកចិត្ត និងវាយតម្លៃខ្ពស់ដល់ ក្រុមការងារកម្មករ ពលករចំណាកស្រុកនៅតាមស្រុក ក្រុងទាំង១៣ ក្នុងខេត្តព្រៃវែង ដែលបានពុះពារបំពេញការងារក្នុងអំឡុងពេលនៃការឆ្លងរាតត្បាតនៃជំងឺកូវីដ-១៩ ជាង២ឆ្នាំកន្លងទៅនេះ ដោយបានធ្វើជាជំនួយការឱ្យរដ្ឋបាលខេត្ត ស្រុក ក្រុង ចូលរួមយ៉ាងសកម្មក្នុងការប្រយុទ្ធ ទប់ស្កាត់ និងគ្រប់គ្រងកូវីដ-១៩ ជាអាទិ៍ៈ ការទទួលនិងរៀបចំដាក់ចត្តាឡីស័កចំពោះបងប្អូនចំណាកស្រុកដែលវិលត្រឡប់មកមូលដ្ឋានវិញពីប្រទេសថៃ ពីភ្នំពេញ ឬកន្លែងផ្សេងទៀត កិច្ចសហការជាមួយផ្នែកសុខាភិបាល ផ្នែកពាក់ព័ន្ធនានា ដើម្បីពិនិត្យព្យាបាលអ្នកជំងឺកូវីដ-១៩ ជាកម្មករ ពលករ ការចាក់វ៉ាក់សាំងបង្ការកូវីដ-១៩ និងការចូលរួមដោះស្រាយផលប៉ះពាល់នានាជាវិបត្តិបង្កដោយកូវីដ-១៩។ល។

ជារួមការងារចំណាកស្រុករបស់ខេត្តព្រៃវែង បានរួមចំណែកជាមួយក្រុមការងារដទៃទៀត ចូលរួមយ៉ាងសកម្មក្នុងចលនាជាតិក្រោមមគ្គុទេសក៍ដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ប្រយុទ្ធឈ្នះកូវីដ-១៩ ដែលបានផ្តល់ឱកាសដល់ការបើកឱ្យដំណើរការជាប្រក្រតីឡើងវិញនូវរាល់សកម្មភាពសង្គមជាតិលើគ្រប់វិស័យនាពេលបច្ចុប្បន្ននេះ។

ជាមតិសរុបកិច្ចប្រជុំ ឯកឧត្តមរដ្ឋមន្រ្តី ព្រុំ សុខា ប្រធានក្រុមការងារចំណាកស្រុកនៃខេត្តព្រៃវែង បានធ្វើការគូសបញ្ជាក់ពីការចាត់តាំងអនុវត្តឱ្យមានប្រសិទ្ធភាពនូវសេចក្តីណែនាំ ស្តីពីការរៀបចំការជួបសំណេះសំណាល និងការជួបប្រាស្រ័យដោយផ្ទាល់ជាមួយបងប្អូនកម្មករ ពលករចំណាកស្រុក ក្នុងឱកាសបុណ្យចូលឆ្នាំថ្មីប្រពៃណីជាតិខាងមុខ ដោយត្រូវខិតខំសំរេចបានខ្លឹមសារសំខាន់ពីរចំណុច៖

មួយ៖ ធ្វើឱ្យមហាជន ប្រជាជនទូទៅ ក៏ដូចជាកម្មករ ពលករចំណាកស្រុក មើលឃើញច្បាស់ពីសមិទ្ធផលដ៏ធំធេងមិនអាចកាត់ថ្លៃបាន ដែលរាជរដ្ឋាភិបាលរបស់គណបក្សប្រជាជនកម្ពុជា សំរេចបានរយៈពេលជាង២ឆ្នាំកន្លងទៅនេះ ក្នុងការដឹកនាំប្រជាជាតិប្រយុទ្ធឈ្នះកូវីដ-១៩ ដើម្បីរក្សាការពារអាយុជីវិតប្រជាជន និងនាំសង្គមជាតិទាំងមូលមកកាន់ប្រក្រតីភាពជាធម្មតាឡើងវិញដូចសព្វថ្ងៃ។

ពីរ៖ ឆ្លងតាមនោះ ត្រូវពង្រឹងជំនឿជឿជាក់របស់ប្រជាជន របស់កម្មករនិងប្រជាពលករ មកលើការដឹកនាំរបស់គណបក្សប្រជាជនកម្ពុជានិងរាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខ សំដៅពូនផ្តុំទៅជាកម្លាំងសរុបសាមគ្គីគាំទ្រដ៏មោះមុតចំពោះបុព្វហេតុ ឧត្តមគតិ និងកម្មវិធីនយោបាយរបស់គណបក្សប្រជាជនកម្ពុជា ដើម្បីទទួលបានជោគជ័យក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ នាពេលខាងមុខ។