កងទ័ពរុស្ស៉ី បើកការវាយលុកមកពីគ្រប់ទិស ដណ្ដើមបានទីក្រុងក្រេមីនណា ហើយកងទ័ពអ៊ុយក្រែន បានដកថយចេញពីទីក្រុងនេះ
អ៊ុយក្រែន ៖ កងទ័ពរុស្ស៉ីបានវាយដណ្ដើមបានទីក្រុង ក្រេមីនណា (Kreminna) នៃតំបន់ភាគខាងកើតប្រទេសអ៊ុយក្រែន ហើយកងទ័ពអ៊ុយក្រែនក៏បានដកថយចេញពីទីក្រុងនេះដែរ។ នេះបើតាមអភិបាលក្នុងតំបន់ដកស្រង់ចេញផ្សាយដោយទីភ្នាក់ងារ សារព័ត៌មាន Reuters នៅថ្ងៃពុធ ទី២០ ខែមេសា ឆ្នាំ២០២២។
ថ្លែងនៅក្នុងសន្និសីទសារព័ត៌មានខ្លីមួយ នៅថ្ងៃអង្គារសប្ដាហ៍នេះ អភិបាលអ៊ុយក្រែននៃតំបន់លូហាន (Luhansk) លោក ស៊ែរហ៊ី ហ្គៃដៃ (Serhiy Gaidai) បានបញ្ជាក់ដូច្នេះថា «ទីក្រុង Kreminna បានធ្លាក់ទៅក្រោមការគ្រប់គ្រងរបស់កងទ័ពរុស្ស៉ី ដោយពួកគេ បានចូលក្នុងទីក្រុងនេះ។ ចំណែកឯ កងទ័ពរបស់យើងបានដកថយ ដើម្បីត្រៀមខ្លួន និងបន្តប្រយុទ្ធជាមួយកងទ័ពរុស្ស៉ី»។
អភិបាលតំបន់ Luhansk លោក Serhiy Gaidai បានប្រាប់សន្និសីទសារព័ត៌មានកាលពីថ្ងៃអង្គារថា ទីក្រុង Kreminna បានស្ថិតក្រោមការគ្រប់គ្រងរបស់កងទ័ពរុស្ស៊ីហើយ។ ពួកគេបានចូលក្នុងទីក្រុងនេះ។ អ្នកការពាររបស់ពួកលោកត្រូវតែដកចេញ។ ពួកគេបានចូលកាន់កាប់ក្នុងទីតាំងថ្មីៗជាច្រើនកន្លែង និងបន្តវាយប្រយុទ្ធប្រឆាំងនឹងទាហានរុស្ស៊ី។ អភិបាលតំបន់រូបនេះ មិនបានបញ្ជាក់លម្អិតថាតើកងទ័ពរុស្ស៉ីវាយគ្រប់គ្រងទីក្រុង Kreminna តាំងពីពេលណាមកនោះទេ ដោយគ្រាន់តែឱ្យដឹងថាកងទ័ពរុស្ស៉ីបានបើកការវាយលុកមកពីគ្រប់ទិស។
អភិបាលតំបន់ Luhansk និយាយដោយពុំបានបញ្ជាក់ឲ្យច្បាស់លាស់ទេថា តើអាចមានចំនួនអ្នកស្លាប់សរុបប៉ុន្មាននាក់ ដោយលើកឡើងថា គេមិនអាចគណនាចំនួនអ្នកស្លាប់ក្នុងចំណោមប្រជាជនស៊ីវិលបានទេ។ យើងមានស្ថិតិផ្លូវការ មនុស្សប្រហែល ២០០នាក់បានស្លាប់ ប៉ុន្តែអ្នកស្លាប់ពិតប្រាកដអាចមានច្រើនជាងនេះទៀត។
គួរបញ្ជាក់ថា Kreminna ដែលមានប្រជាជនរស់នៅច្រើនជាង ១៨,០០០នាក់ នៅមុនសង្រ្គាមជាមួយរុស្ស៉ីផ្ទុះឡើង គឺជាទីក្រុងដំបូងគេបំផុត ដែលត្រូវកងទ័ពរុស្ស៉ីវាយយកបាន ចាប់តាំងពីម៉ូស្គូចាប់ផ្ដើមដំណាក់កាលពី២ នៃសង្រ្គាមដោយផ្ដោតលើតំបន់ដុនបាស់ នៃភាគខាងកើតអ៊ុយក្រែន៕
