សមត្ថកិច្ចនគរបាលឃាត់ខ្លួនបុរសម្នាក់តពីបទ ប្រើគ្រឿងចក្រឈូសឆាយព្រៃដីរដ្ឋ ដោយខុសច្បាប់
កោះកុង៖ នៅថ្ងៃអង្គារ៍ ទី៣ ខែឧសភា ឆ្នាំ២០២២ វេលាម៉ោង ១៤និង៣០ នាទី កម្លាំងអធិការដ្ឋាន និងកម្លាំងប៉ុស្តិ៍ដងពែងដឹកនាំដោយ លោក វរសេនីយ៍ត្រី ស៊ិន វណ្ឌីន អធិការង បានចុះជាមួយក្រុមការងារគណៈបញ្ជាការឯកភាពរដ្ឋបាលស្រុកស្រែអំបិល ដឹកនាំដោយលោក ហុង ប្រុស អភិបាលរងស្រុក ឃាត់ខ្លួនបុរសម្នាក់តពីបទ ប្រើគ្រឿងចក្រឈូសឆាយព្រៃដីរដ្ឋ ដោយខុសច្បាប់។
សមត្ថកិច្ចបានចុះធ្វើការឃាត់គ្រឿងចក្រ (អាអិច) ដែលឈួសឆាយព្រៃដីរដ្ឋខុសច្បាប់នៅចំណុច កំពង់ខ្លឹម ក្នុងភូមិ បាក់អង្រុតឃុំ ដងពែង ក្នុងនោះក្រុមការងារចម្រុះឃាត់បាន អាអិច ចំនួន១គ្រឿង និងមនុស្សចំនួន១នាក់ប្រុសឈ្មោះ លី សូហ៊ ភេទ ប្រុស អាយុ ៣០ឆ្នាំ មានទីលំនៅភូមិ ព្រះអង្គកែវ ឃុំដងពែង ស្រុកស្រែអំបិល ខេត្តកោះកុង ជាម្ចាស់គ្រឿងចក្រ។
បច្ចុប្បន្ន វត្ថុតាងនិងមនុស្សបានយកទៅអធិការដ្ឋានស្រុក ដើម្បីកសាងសំណុំរឿងតាមនីតិវិធី៕
