ជ្រើសរើសខេត្តព្រះសីហនុ ជាទីតាំងគោលដៅ នៃការសិក្សាវាយតម្លៃ តម្រូវការបច្ចេកវិទ្យា និងផែនការសកម្មភាព ការអនុវត្តបច្ចេកវិទ្យាមេត្រីភាពបរិស្ថាន

ព្រះសីហនុ៖ យោងតាមហ្វេសប៊ុកផ្លូវការរបស់ឯកឧត្ដមឡុង ឌីម៉ង នៅថ្ងៃទី១៥កក្ដដា២០២២នេះ​ឯកឧត្ដមអភិបាលរងខេត្តបានតាងនាម ឯកឧត្តមអភិបាលខេត្ត គួច ចំរើន សូមថ្លែងអំណរគុណចំពោះក្រសួងបរិស្ថាន និងអង្គការអភិវឌ្ឍន៍ឧស្សាហកម្មសហប្រជាជាតិ ដែលបានជ្រើសរើសខេត្តព្រះសីហនុ ជាទីតាំងគោលដៅនៃការសិក្សាវាយតម្លៃតម្រូវការបច្ចេកវិទ្យា និងផែនការសកម្មភាព ដើម្បីគាំទ្រដល់ការអនុវត្តបច្ចេកវិទ្យាមេត្រីភាពបរិស្ថាន ព្រមទាំងសូមថ្លែងអំណរគុណដល់មូលនិធិអាកាសធាតុបៃតង ដែលបានគាំទ្រហិរញ្ញវត្ថុដល់គម្រោងដ៏មានសារៈសំខាន់ និងមានតម្លៃផ្នែកសង្គម និងសេដ្ឋកិច្ចនេះ។

ឯកឧត្ដមអភិបាលរងបញ្ជាក់ទៀតថា៖ខេត្តព្រះសីហនុ ជាប៉ូលអភិវឌ្ឍជាតិប្រកបដោយចីរភាព នៅតំបន់ឆ្នេរសមុទ្រកម្ពុជា តាមរយៈការអភិវឌ្ឍទីក្រុងទំនើប រមណីយដ្ឋានឆ្នេរសមុទ្រដែលស្អាតបំផុតលើសកលលោក និងជាតំបន់សេដ្ឋកិច្ចពិសេសគំរូពហុបំណង ច្រកចេញចូលអន្តរជាតិ មជ្ឈមណ្ឌលកំណើនជាតិ មជ្ឈមណ្ឌលភស្តុភារធម្មជាតិ ដោយមានទំនាក់ទំនងជាមួយ ទីផ្សារអាស៊ាន និងទីផ្សារសកលលោក និងជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើប ដែលមានសុខដុមនីយកម្មជាមួយនឹងបរិស្ថានរស់នៅល្អប្រសើរ។

ឯកឧត្ដមបានលើកឡើងទៀតថា៖ស្របពេលនឹងមានការអភិវឌ្ឍយ៉ាងគំហុកនេះ ខេត្តព្រះសីហនុក៏បានជួបប្រទះបញ្ហាប្រឈមនានា ដែលបណ្តាលមកពីមនុស្ស និងធម្មជាផងដែរ។ ជាក់ស្តែង ខេត្តព្រះសីហនុតែងតែជួបប្រទះបញ្ហាប្រឈមដែលបណ្តាលមកពីការប្រែប្រួលអាកាសធាតុ មានដូចជា គ្រោះទឹកជំនន់ គ្រោះរាំងស្ងួត ខ្យល់ព្យុះ ការកើនឡើងកម្តៅ និងការឡើងកម្ពស់កម្រិតទឹកសមុទ្រ ដែលបណ្តាលឱ្យទឹកប្រៃហូរចូលស្រែចម្ការជាដើម។

ជាការពិតណាស់ ការប្រែប្រួលអាកាសធាតុ គឺជាការ គម្រាមកំហែងចំបងមួយដល់មនុស្សជាតិទាំងមូល ទាំងពេលបច្ចុប្បន្ន និងពេលអនាគត ជាពិសេសសម្រាប់ប្រទេសកំពុងអភិវឌ្ឍន៍ដូចប្រទេសកម្ពុជា។

ឯកឧត្ដម បន្ថែមថា៖ប្រទេសកម្ពុជា បានរួមចំណែកបំភាយឧស្ម័នផ្ទះកញ្ចក់តិចតួចប៉ុណ្ណោះ ប៉ុន្តែកម្ពុជាស្ថិតនៅក្នុងចំណោមប្រទេសដែលទទួលរងគ្រោះធ្ងន់ធ្ងរជាងគេពីការប្រែប្រួលអាកាសធាតុ ដោយសារប្រជាជនកម្ពុជាភាគច្រើនប្រកបរបរកសិកម្ម ដែលពឹងផ្អែកលើរបបទឹកភ្លៀង សមត្ថភាពឆ្លើយតបទាំងបច្ចេកទេស និងហិរញ្ញវត្ថុនៅមានកម្រិត។

យោងតាមការសិក្សារបស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ប្រសិនបើកម្ពុជាពុំចាត់វិធានការបានត្រឹមត្រូវទប់ទល់នឹងការប្រែប្រួលអាកាសធាតុនោះទេ ផលិតផលក្នុងស្រុកសរុបអាចនឹងធ្លាក់ចុះប្រមាណ១០ ភាគរយ ត្រឹមឆ្នាំ២០៥០។

ម្យ៉ាងទៀត បញ្ហាជំងឺរាតត្បាតកូវីដ១៩ បាននិងកំពុងតែបន្ថែមអំរែកយ៉ាងធ្ងន់ដល់រាជរដ្ឋាភិបាល ដែលរារាំងដល់ផែនការអភិវឌ្ឍន៍សេដ្ឋកិច្ច និងសង្គម រួមទាំងការអនុវត្តផែនការយុទ្ធសាស្រ្តសម្រាប់ឆ្លើយតបនឹងការប្រែប្រួលអាកាសធាតុ។

ទោះបីជាយើងមានភាពចាំបាច់ក្នុងការបង្វែរទិសដៅអាទិភាពគោលនយោបាយ និងធនធានដើម្បីប្រយុទ្ធប្រឆាំងនឹងជំងឺកូវីដ១៩ យើងទាំងអស់គ្នាគប្បីខិតខំផ្តល់អាទិភាព និងធានាឱ្យបាននិរន្តរភាពនៃការអនុវត្តវិធានការដោះស្រាយ និងទប់ទល់នឹងការប្រែប្រួលអាកាសធាតុ។

ឯកឧត្ដមអះអាងទៀតថា៖ឈរលើស្មារតីនេះ គម្រោងវាយតម្លៃតម្រូវការបច្ចេកវិទ្យា និងផែនការ ដើម្បីគាំទ្រដល់ការអនុវត្តបច្ចេកវិទ្យាមេត្រីភាពបរិស្ថាន សម្រាប់តំបន់សេដ្ឋកិច្ចពិសេសនៅខេត្តព្រះសីហនុ ពិតជាមានតម្លៃបន្ថែមដល់សេដ្ឋកិច្ច និងបរិស្ថាន ដែលនឹងរួមចំណែកកាត់បន្ថយការប្រែប្រួលអាកាសធាតុ តាមរយៈការអនុវត្តនូវផែនការសកម្មភាពដែលអង្កសិក្ខាសាលាបានចូលរួមយ៉ាងផុលផុស៕