លោក Xi Jinping ព្រមានអាមេរិក កុំប្រឡែងនឹងភ្លើងចំពោះបញ្ហាកោះតៃវ៉ាន់
បរទេស ៖ សារព័ត៌មាន Reutersបានចេញផ្សាយថា កាលពីថ្ងៃព្រហស្បតិ៍ មេដឹកនាំចិន លោក Xi Jinping បានព្រមានកុំប្រឡែងនឹងភ្លើងចំពោះបញ្ហាកោះតៃវ៉ាន់ នៅក្នុងការសន្ទនាតាមទូរស័ព្ទជាមួយប្រធានាធិបតីសហរដ្ឋអាមេរិកលោក Joe Biden ដោយបង្ហាញពីការព្រួយបារម្ភរបស់ទីក្រុងប៉េកាំង អំពីដំណើរទស្សនកិច្ចរបស់ប្រធានសភាសហរដ្ឋអាមេរិកលោកស្រី Nancy Pelosi ដែលអាចកើតមានទៅកាន់កោះដែលទាមទារដោយចិន។
ក្រសួងការបរទេសចិនបានដកស្រង់សម្តីលោក Xi Jinping ដែលបានប្រាប់លោក Biden នៅក្នុងការសន្ទនាលើកទី ០៥ ថា “អ្នកដែលប្រឡែងនឹងភ្លើងនឹងត្រូវវិនាសដោយសារវា”។ “ដោយសង្ឃឹមថា អាមេរិកនឹងយល់ឃើញច្បាស់អំពីរឿងនេះ”។
លោក Xi Jinping បាននិយាយថា ទីក្រុងវ៉ាស៊ីនតោនគួរតែគោរពតាម “នយោបាយចិនតែមួយ” ហើយបានសង្កត់ធ្ងន់ថា ប្រទេសចិនប្រឆាំងដាច់ខាតចំពោះឯករាជ្យភាពរបស់តៃវ៉ាន់ និងការជ្រៀតជ្រែកពីខាងក្រៅ។
សេតវិមានបាននិយាយថា លោក Biden បានប្រាប់លោក Xi Jinping ថា គោលនយោបាយរបស់សហរដ្ឋអាមេរិកចំពោះតៃវ៉ាន់មិនផ្លាស់ប្តូរទេ ហើយទីក្រុងវ៉ាស៊ីនតោនប្រឆាំងយ៉ាងខ្លាំងចំពោះកិច្ចខិតខំប្រឹងប្រែងឯកតោភាគីដើម្បីផ្លាស់ប្តូរស្ថានភាពបច្ចុប្បន្ន ឬធ្វើឲ្យខូចដល់សន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ៕
