ក្រុមបាល់បោះនារី ៣ទល់៣រកបានមេដាយមាស ១គ្រឿងហើយ

ភ្នំពេញ៖ម្សិលម៉ិញនេះក្រុមបាល់បោះរទេះនារី៣ទល់៣រកបានមេដាយមាសមួយគ្រឿងហើយបន្ទាប់ពីប្រកួតឈ្នះក្រុមថៃ៧ទល់៥នោះ ។
នេះជាមេដាយមាសទី១បន្ទាប់ពីបើកព្រឹត្តិការន៍អាស៊ានប៉រ់ាហ្គេមលើកទី១១នៅទីក្រុងសូឡូប្រទេសឥណ្ឌូនេស៊ី។
ឯកឧត្តម យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា និងជានាយបេសកកម្មអត្តពលិកជនពិការកម្ពុជាមកប្រទេសឥណ្ឌូនេស៊ី មានប្រសាសន៍ថា ៖«ថ្ងៃនេះគឺជាថ្ងៃដ៏សប្បាយរីករាយបំផុត។នេះជាថ្ងៃទី៣ហើយប្រតិភូយើងខំប្រឹងយ៉ាងសស្រាក់សស្រាំខ្លាំងណាស់។ដូចយើងបានសន្យាពីភ្នំពេញមកថាយើងបានកំណត់មេដាយមាសចំនួន៣គ្រឿង និងប្រាក់ សំរឹទ្ធជាច្រើនទៀត។ ឥឡូវនេះយើងបានមេដាយមាស១ហើយ។

ក្រុមបាល់បោះពិការជិះរទេះនារីកម្ពុជា៣ទល់៣យើងបានសម្រេចគឺបានមេដាយមាសហើយ។ ក្រុមនារីនៅមានប្រកួតវិញ្ញាសា៥ទល់៥ទៀត»។
ក្រៅពីនោះទៀតកីឡាខ្លះចាញ់កីឡាខ្លះក៏ឈ្នះរួមមានកីឡាបាល់ទះអង្គុយកាលពីព្រឹកមិញនេះទទួលបានជោគជ័យលើក្រុមហ្វីលីពីនគឺ៣សិត០តែម្តង។ថ្ងៃនេះក្រុមបាល់ទះអង្គុយកម្ពុជាយើងនឹងជួបដៃគូចាស់ សងសឹកគឺមីយ៉ាន់ម៉ា។ ប្រសិនបើថ្ងៃនេះឈ្នះក្នុងការប្រកួតវិលជុំ យើងនឹងឡើងទៅវគ្គផ្ដាច់ព្រ័ត្រ។

គណៈប្រតិភូយើងដែលដឹកនាំដោយឯកឧត្តម ម៉ានី ឯកឧត្តម វ៉ាត់ ចំរើន កំពុងចុះសិក្សាស្វែងយល់គ្រប់ទីកន្លែងប្រកួត។ ខ្ញុំជឿថា បទពិសោធន៍នេះនឹងចាប់យកបាន ហើយយកទៅវិញកែច្នៃយ៉ាងម៉េចឲ្យកម្ពុជាយើងមានកេរ្តិ៍ឈ្មោះល្បីល្បាញនៅក្នុងសហគមន៍អាស៊ាន។

អាស៊ានប៉ារ៉ាហ្គេម លើកទី១១ នៅឥណ្ឌូនេស៊ី ចាប់ពីថ្ងៃទី៣០ ខែកក្កដា ដល់ថ្ងៃទី០៦ ខែសីហា ឆ្នាំ២០២២ ក្នុងនោះកម្ពុជា បានបញ្ជូនអត្តពលិកសរុប ១១៥នាក់ លើ១១ប្រភេទកីឡាចូលរួម គឺមានកីឡាអត្តពលកម្ម ហែលទឹក បាល់ទះអង្គុយបុរស និងនារី បាល់បោះរទេះបុរស និងនារី បាល់បោះជនពិការភ្នែក បាល់ទាត់ចលករខួរក្បាល (៧ម្ខាង) វាយកូនឃ្លីលើតុ វាយសី លើកទម្ងន់ អុក និងប៊ូស្យា៕