ប្រទះឃើញសព ជនរងគ្រោះដែលបាត់ខ្លួន នៅទឹកជ្រោះតាតៃ

នៅថ្ងៃទី២៥ ខែកញ្ញា ឆ្នាំ២០១៨ វេលាម៉ោង ៨:០០ នាទីព្រឹក កំលាំងប៉ុស្តិ៍នគរបាលរដ្ឋបាលតាតៃក្រោម ដឹកនាំដោយលោក អនុសេនីយ៍ទោ រស់ វ៉ាន់ថន នាយប៉ុស្តិ៍ បានសហការជាមួយ ក្រុមប្រឹក្សាឃុំតាតៃក្រោម ស្រុកកោះកុង និងក្រុមគ្រួសារជនរងគ្រោះ បានរកឃើញសាកសពជនរងគ្រោះ ឈ្មោះ សម្បតិ ចាន់ចាវ ភេទប្រុស អាយុ ២៤ ឆ្នាំ មានទីលំនៅភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ដែលរអិលជើងធ្លាក់ចូលទៅក្នុងទឹកជ្រោះ ដែលកំពុងហូរគូច កាលពីថ្ងៃទី២៣ ខែកញ្ញា ឆ្នាំ២០១៨ វេលាម៉ោង ៣:៥៤ នាទីរសៀល។

ក្រោយពីបានរកឃើញសាកសព ជនរងគ្រោះខាងលើ តាមការពិនិត្យធ្វើកោសល្យវិច័យ កម្លាំងប៉ុស្តិ៍នគរបាលរដ្ឋបាលតាតៃក្រោម និងមានការចូលរួមពី ក្រុមប្រឹក្សាឃុំតាតៃក្រោម និងក្រុមគ្រួសារជនរងគ្រោះ ពិនិត្យឃើញថា ជនរងគ្រោះ ស្លាប់ដោយសាររអិលជើងធ្លាក់ ពីលើទឹកជ្រោះដែលកំពុងហូរគូច បណ្តាលឲ្យបោកប៉ះជាមួយថ្មត្រូវក្បាល និងដងខ្លួន ស្លាប់ពិតប្រាកដមែន។

បច្ចុប្បន្នសាកសពជនរងគ្រោះ កម្លាំងប៉ុស្តិ៍ និងក្រុមប្រឹក្សាឃុំ បានធ្វើការប្រគល់សាកសពជនរងគ្រោះ ឲ្យក្រុមគ្រួសារ ធ្វើបុណ្យតាមប្រពៃណី៕