នគរបាលស្រុកកំរៀងជួយសង្រ្គោះ និងដឹកនាំស្រ្តីសម្រាលកូនតាមដងផ្លូវ ទៅកាន់មណ្ឌលសុខភាព
នៅយប់ថ្ងៃទី ២៤ ខែ កញ្ញា ឆ្នាំ២០១៨ វេលាម៉ោង ៣ និង ៤៥នាទីទៀបភ្លឺឈានចូលថ្ងៃទី២៥ ខែ កញ្ញា ឆ្នាំ២០១៨ ក្នុងពេលដែលកម្លាំងនគរបាលនៃអធិការដ្ឋាននគរបាលស្រុកកំរៀង សហការណ៍ជាមួយកងប្រជាការពារ កំពុងល្បាតរក្សាសន្តិសុខ សណ្តាប់ធ្នាប់ក្នុងមូលដ្ឋានបានប្រទះឃើញ ស្រ្តីម្នាក់ ដែលគាត់មានអការឈឺពោះសម្រាលកូនតាមដងផ្លូវដោយពុំមានបងប្អូនឬញាតិមិត្តនៅជាមួយឡើយ ស្រ្តីរូបនោះមានឈ្មោះស៊ូ សម្បត្តិ អាយុ ២៩ ឆ្នាំ មានទីលំនៅភូមិ ភ្នំ១០០ ឃុំ ត្រាង ស្រុកកំរៀង ខេត្តបាត់ដំបង ។
ក្នុងស្ថានភាពបែបនេះកម្លាំងនគរបាលរួមជាមួយកងប្រជាការពារបានរាយការណ៍ទៅមន្រ្តីប្រចាំការនៅមណ្ឌលសុខភាពឃុំត្រាង ស្រុកកំរៀង ចុះមកដល់ទីកន្លែង ដើម្បីជួយសម្រួលដល់ការសម្រាលរបស់ស្ត្រីខាងលើទាំងម្តាយនិងកូនប្រកបដោយសុវត្ថិភាពហើយនគរបាលបានដឹកនាំពួកគាត់ ទៅកាន់មណ្ឌលសុខភាពត្រាងក្នុងពេលនោះផងដែរ៕
