អាជ្ញាធរខណ្ឌច្បារអំពៅ ចុះសួរសុខទុក្ខ និងនាំយកអំណោយទៅចែកជូនបងប្អូនប្រជាពលរដ្ឋរងគ្រោះដោយជំនន់ នៅភូមិកោះនរា ជាច្រើនគ្រួសារ
ភ្នំពេញ៖ លោក ចេង មុនីរ៉ា អភិបាលខណ្ឌច្បារអំពៅ និងលោក-លោកស្រីជាអភិបាលរងខណ្ឌ នៅរសៀលថ្ងៃទី២៥ខែកញ្ញា ឆ្នាំ២០១៨នេះ បានចុះសួរសុខទុក្ខ និងនាំយកអំណោយទៅចែកជូនបងប្អូនប្រជាពលរដ្ឋដែលរងគ្រោះដោយជំនន់ ស្ថិតនៅភូមិកោះនរា សង្កាត់និរោធ ចំនួន ១០៥គ្រួសារ ហើយលោកអភិបាលនិង
ក្រុមការងារក្រៅពីសំណេះសំណាលហើយ នូវបាននាំយកអំណោយទាំងនេះទៅប្រគល់ដល់ខ្នងផ្ទះផងដែរ។
មន្ត្រីរដ្ឋបាលខណ្ឌច្បារអំពៅបានអោយដឹងថា អំណោយដែលត្រូវផ្តល់ជូននេះ ក្នុងម្នាក់ៗ ទទួលបានអង្ករ ចំនួន ១០គីឡូ ទឹកត្រី០២ដប ទឹកស៊ីអ៊ីវ ០២ដប និងស្ករស ០,៥គីឡូ ។
ក្នុងឱកាសនោះ លោក ចេង មុនីរ៉ាក៏ បានពាំនាំនូវប្រសាសន៍ផ្ដាំផ្ញើ និងការសាកសួរសុខទុក្ខ ពីសំណាក់សម្ដេចអគ្គមហាសេនបតីតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋរងគ្រោះ ដោយគ្រោះធម្មជាតិ ទឹកជំនន់ទាំងអស់ ហើយ លោក ក៏បានផ្ដាំផ្ញើដល់ប្រជាពលរដ្ឋទាំងអស់ សូមយកចិត្តទុកដាក់ទៅលើសុខភាព ដោយរក្សាអនាម័យ និងពិសារទឹកឆ្អិន ជានិច្ច៕
