តៃកុងរថយន្តម្នាក់ស្លាប់ ក្នុងគ្រោះថ្នាក់រថយន្តពីរគ្រឿងបុកគ្នា
ព្រះសីហនុ៖ រថយន្តពីរគ្រឿងបុកគ្នា ក្នុងទិសដៅបញ្រ្ចាសគ្នា បណ្តាលឲ្យតៃកុងរថយន្តម្នាក់ស្លាប់ ចំណែកតៃកុងរថយន្តមួយគ្រឿងទៀត បានរបួសស្រាល រត់គេចខ្លួនបាត់។
របាយការណ៍ពីសមត្ថកិច្ចមូលដ្ឋាន នៅវេលាម៉ោង១៧:៣០នាទីថ្ងៃទី២៥ ខែកញ្ញា ឆ្នាំ២០១៨ នៅចន្លោះKm 142-143 ស្ថិតក្នុងភូមិ-ឃុំចំការហ្លួង ស្រុកកំពង់សីលា ខេត្តព្រះសីហនុ មានគ្រោះថ្នាក់ចរាចរណ៍មួយកើតឡើងលើផ្លូវជាតិលេខ 4 រវាងរថយន្តកូរ៉េពីរតោនកន្លៈក្បាលពណ៌ខៀវពាក់ស្លាកលេខ ភ្នំពេញ 3-C 5112 មានទិសដៅពីភ្នំពេញទៅខេត្តព្រះសីហនុ អ្នកបើកបរមិនស្គាល់អត្តសញ្ញាណ (រត់បាត់) បានប៉ះជាមួយនិងរថយន្តតូរីស ពណ៌សំបកឳឡឹក ពាក់ស្លាកលេខ ភ្នំពេញ 2AB-6106 មានទិសដៅបញ្ច្រាស់ទិសគ្នា បណ្តាលឲ្យអ្នកបើកបរ ឈ្មោះ ហេង បូរ៉ា ភេទប្រុស អាយុ ២៦ឆ្នាំ មានទីលំនៅភូមិ ចំការដី ឃុំពងទឹក ស្រុកដំណាក់ចង្អើរ ខេត្តកែប ស្លាប់នៅនឹងកន្លែង។ ចំពោះមុខកម្លាំង អាវុធហត្ថ ស្នាក់ការសន្តិសុខ ៤០២ សហការជាមួយកម្លាំង របស់អធិការដ្ឋាននគរបាលស្រុកកំពង់សិលា នៅការពារកន្លែងកើតហេតុនិង ជួយសម្រួលចរាចរណ៍។ ចំពោះសាកសពរង់ចាំក្រុមគ្រួសារធ្វើការប្រគល់ ទទួល យកទៅធ្វើបុណ្យតាមប្រពៃណី រីឯវត្ថុតាងទាំងពីរខាងលើរង់ចាំ រថយន្តស្ទូចយកទៅរក្សាទុក នៅអធិការដ្ឋាននគរបាលស្រុកកំពង់សិលា បន្តតាមនីតិវិធី ៕
