អន្តរក្រសួងណែនាំដល់ អគ្គនាយកផលិតកម្មមហាហង្ស ឲ្យស្វែងយល់គ្រប់ជ្រុងជ្រោយបន្ថែមទៀត ពីវប្បធម៌ ទំនៀមទំលាប់ ព្រមទាំងគុណតម្លៃនៃស្ត្រីខ្មែរ

ភ្នំពេញ ៖ ក្រសួងវប្បធម៌ និងវិចិត្រសិល្បៈ នៅថ្ងៃទី១ ខែកញ្ញា ឆ្នាំ២០២២ បានចេញសេចក្តីប្រកាសព័ត៌មាន ស្តីពីលទ្ធផលកិច្ចប្រជុំអន្តរក្រសួង ទាក់ទងនឹងលទ្ធផលកម្មវិធីប្រកួតបវរកញ្ញាឯកដ៏អស្ចារ្យ នៃកម្ពុជា ឆ្នាំ២០២២ (Miss Grand Cambodia 2022)។

ក្រសួងវប្បធម៌ និងវិចិត្រសិល្បៈ បានលើកឡើងថា គោរពតាមអនុសាសន៍ណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី១ ខែកញ្ញា ឆ្នាំ២០២២ វេលាម៉ោង ៨:៣០នាទីព្រឹក ក្រសួងវប្បធម៌ និងវិចិត្រសិល្បៈ បានរៀបចំកិច្ចប្រជុំអន្តរក្រសួង ដែលមានការ អញ្ជើញចូលរួមពីក្រសួងកិច្ចការនារី ក្រសួងព័ត៌មាន ព្រមទាំងលោក អ៊ិន សុភិន អគ្គនាយកផលិតកម្ម មហាហង្ស ដែលជាអ្នករៀបចំកម្មវិធី កញ្ញាឯកដ៏អស្ចារ្យនៃកម្ពុជាឆ្នាំ២០២២ (Miss Grand Cambodia 2022) និងអ្នកពាក់ព័ន្ធមួយចំនួនទៀត។

ក្នុងកិច្ចប្រជុំ ក្រុមការងារអន្តរក្រសួង បានពិភាក្សា និងស្តាប់របាយការណ៍នានាដែលបានលើកឡើង ដោយភាគីពាក់ព័ន្ធ ទាំងចំណុចវិជ្ជមានក្តី និង អវិជ្ជមានក្តី ក្នុងកម្មវិធីមួយចំនួនដែលកើតមានឡើងក្នុងដំណើរ ការរៀបចំកម្មវិធីប្រកួត កញ្ញាឯកដ៏អស្ចារ្យនៃកម្ពុជាឆ្នាំ២០២២ (Miss Grand Cambodia 2022) ហើយទទួល បានលទ្ធផលដូចខាងក្រោម៖

ស្ថាប័នពាក់ព័ន្ធ(ក្រសួងវប្បធម៌ និងវិចិត្រសិល្បៈ ក្រសួងកិច្ចការនារី និងក្រសួងព័ត៌មាន) បានធ្វើ ការណែនាំដល់អគ្គនាយកផលិតកម្មមហាហង្ស ឲ្យស្វែងយល់គ្រប់ជ្រុងជ្រោយបន្ថែមទៀតពី វប្បធម៌ ទំនៀមទំលាប់ ប្រពៃណី អត្តសញ្ញាណ ព្រមទាំងគុណតម្លៃនៃស្ត្រីខ្មែរ ហើយសហការឲ្យ បានស៊ីជម្រៅជាមួយស្ថាប័នពាក់ព័ន្ធដើម្បីចៀសវាងនូវកំហុសឆ្គងដោយចេតនា ឬអចេតនាណា មួយដែលនាំទៅដល់ការប៉ះពាល់ និងធ្វើឲ្យអាប់ឱននូវវប្បធម៌ជាតិ និងគុណតម្លៃរបស់ស្ត្រីខ្មែរ។ តាមរយៈកិច្ចប្រជុំនេះ ផលិតកម្មមហាហង្សក៏បានធ្វើការសូមអភ័យទោស ចំពោះសាធារណជន ទាំងអស់នូវកំហុសឆ្គងទាំងឡាយដែលបានកើតឡើងដោយអចេតនា ក្នុងដំណើរនៃកម្មវិធីប្រកួត កញ្ញាឯក Miss Grand Cambodia 2022 ហើយសន្យាថា នឹងបង្កើនកិច្ចសហការជាមួយស្ថាប័នពាក់ ព័ន្ធ ក្នុងការរៀបចំព្រឹត្តិការណ៍វប្បធម៌នានា នាពេលអនាគត ចៀសវាងនូវរាល់កំហុសឆ្គងនានាជា យថាហេតុដែលបានកើតឡើងក្នុងឆ្នាំនេះ ក្នុងស្មារតីបន្តរួមចំណែកលើកតម្លៃនូវកិត្យានុភាពជាតិ និងគុណតម្លៃស្ត្រីខ្មែរឲ្យបានខ្ពង់ខ្ពស់។

ក្រសួងវប្បធម៌ និងវិចិត្រសិល្បៈ សូមថ្លែងអំណរគុណយ៉ាងជ្រាលជ្រៅបំផុតចំពោះបងប្អូនប្រជា ពលរដ្ឋ ដែលតែងយកចិត្តទុកដាក់ការពារវប្បធម៌ ប្រពៃណី អត្តសញ្ញាណជាតិ ព្រមទាំងសិល្បៈវប្បធម៌ដ៏ថ្លៃថ្លា របស់ជាតិយើង និងសូមស្មារតីជាតិនេះ មានជារៀងរហូតក្នុងដួងចិត្តប្រជាពលរដ្ឋកម្ពុជាគ្រប់រូប ដើម្បីថែរក្សា ការពារ លើកតម្កើងកិត្យានុភាពជាតិយើង៕