យុទ្ធនាការជិះ ដើម្បីមិត្តយើង ជួយដល់អ្នកខ្វះខាត ជនទីទ័លក្រ និង អ្នកធ្វើការងារក្រៅប្រព័ន្ធ

ភ្នំពេញ៖ ក្នុងសកម្មភាពដ៏មានសារៈសំខាន់ និងមានចក្ខុវិស័យវែងឆ្ងាយ ដើម្បីបង្ហាញពីទឹកចិត្តសប្បុរសធម៌ ដោយផ្តើមចេញពីការចែករំលែក ធនធានតាមលទ្ធភាព ពីសមាជិកសមាគមមិត្តយើង ដល់អ្នកដែលខ្វះខាត និង អ្នកធ្វើការងារក្រៅប្រព័ន្ធ នៅព្រឹកថ្ងៃទី០៦ ខែកញ្ញា ឆ្នាំ២០២២ បានបើកយុទ្ធនាការដោយឆន្ទៈក្រោមវត្តមាន ឯកឧត្តម ហេង សួរ រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ និងមានការចូលរួមពីសប្បុរសជននានា ក្នុងរាជធានីភ្នំពេញ និងប្រជាពលរដ្ឋក្រីក្រី អ្នកធ្វើការតាមកន្លែងកំសាន្ត និងអ្នកធ្វើការក្រៅប្រព័ន្ធប្រមាណជាង៥០០នាក់ នៅកោះពេជ្រ។
បើតាមលោក គឹម កែវរស្មី ប្រធានសមាគមមិត្តយើង បានឱ្យដឹងថា កម្មវិធីនេះចាប់ផ្តើមពីថ្ងៃទី០៦ ខែកញ្ញា ឆ្នាំ២០២២ ដល់ ខែធ្នូ ឆ្នាំ២០២៣ ដោយសហការជាមួយ ក្រុមដឹកជញ្ជូន ក្រុមហ៊ុនដៃគូមិត្តយើង និងយុវជនស្ម័គ្រចិត្តមិត្តយើង ដើម្បីចែក“កញ្ចប់ជំនួយមិត្តយើង” ដែលរួមមាន គ្រឿងឧបភោគបរិភោគ សម្លៀកបំពាក់ និងសម្ភារប្រើប្រាស់ផ្សេងៗ ចំនួន ២៧ ម៉ឺនកញ្ចប់ ទៅដល់អ្នកខ្វះខាត អ្នកដែលទីទ័លក្រ និងអ្នកធ្វើការងារក្រៅប្រព័ន្ធ ដូចជា អ្នករត់ស៊ីក្លូ អ្នកលក់តាមរទេះ អ្នករត់ម៉ូតូឌុប អ្នករត់កង់បី កម្មករសំណង់ អ្នករត់តុ ចុងភៅ អនាម័យ សេវាកម្សាន្ត។ល។ នៅទូទាំង២៥ រាជធានី-ខេត្ត។
នាឱកាសនោះ ឯកឧត្តម ហេង សួរ បានថ្លែងកោតសរសើរ និងវាយតម្លៃខ្ពស់ ចំពោះចក្ខុវិស័យរបស់ សមាគមមិត្តយើង ដែលបានចូលរួមចំណែក ក្នុងការលើកកម្ពស់ជីវភាព ដល់អ្នកខ្វះខាត អ្នកទីទ័លក្រ និង អ្នកធ្វើការងារក្រៅប្រព័ន្ធ តាមរយៈការផ្តល់ឱកាសទទួលបានចំណេះដឹង, ការប្រឹក្សា, ចែករំលែកបទពិសោធន៍ ពីអ្នកជំនាញ ផ្តោតលើអាជីវកម្ម និងមុខរបរចិញ្ចឹមជីវិត។
ក្រៅពីនេះ ឯកឧត្តមក៏បានបង្ហាញពីការគិតគូររបស់ប្រមុខរាជរដ្ឋាភិបាល ក្នុងការរិះរកមធ្យោបាយដើម្បីផ្តល់លទ្ធភាព ដល់ក្រុមអ្នកធ្វើការក្រៅប្រព័ន្ធ ឱ្យមានប័ណ្ណបេឡាជាតិ របបសន្តិសុខសង្គម (ប.ស.ស.) សម្រាប់អ្នកមានប័ណ្ណសមធម៌ ឱ្យដូចគ្នាទៅនឹងអ្នកធ្វើការក្រោមច្បាប់ ស្តីពី ការងារផងដែរ។
យ៉ាងណា ឯកឧត្តមរដ្ឋលេខាធិការ បានជំរុញដល់សមាគមមិត្តយើង បន្តចាប់ដៃជាមួយបណ្តាញដៃគូក្នុងវិស័យក្រៅប្រព័ន្ធ  និងសហគ្រាសធុនតូច និងមធ្យម ដើម្បីបន្តធ្វើការងារសង្គម និងការងារសប្បុរសធម៌ និងមនុស្សធម៌នានា ក្នុងការបន្តរួមចំណែកអភិវឌ្ឍន៍ប្រទេសជាតិឱ្យកាន់តែរីកចម្រើន សម្បូរបែប និងលើកកម្ពស់កម្រិតជីវភាពរស់នៅរបស់ពលរដ្ឋបន្ថែមទៀត៕