អគ្គិភ័យក្នុងបារ karaoke បានសម្លាប់មនុស្សចំនួន ១២នាក់ ក្នុងប្រទេសវៀតណាម
វៀតណាម ៖ កាលពីថ្ងៃពុធ ប្រព័ន្ធផ្សព្វផ្សាយរបស់រដ្ឋាភិបាលបានរាយការណ៍ថា យ៉ាងហោចណាស់មានមនុស្សចំនួន ១២នាក់បានស្លាប់ និង៤០នាក់ផ្សេងទៀតរងរបួសក្នុងអគ្គិភ័យក្នុងបារ karaoke មួយ នៅភាគខាងត្បូងប្រទេសវៀតណាម។
យោងទៅតាមភ្នាក់ងារសារព័ត៌មានវៀតណាមដែលបានរាយការណ៍ជាផ្លូវការថា កាលពីយប់ថ្ងៃអង្គារ
មានអគ្គិភ័យមួយកើតឡើង នៅបារមួយកន្លែងក្នុងខេត្ត Binh Duong ជាតំបន់ផលិតផលឧស្សាហកម្ម ជិតទីក្រុងហូជីមិញ។
របាយការណ៍នោះក៏បាននិយាយទៀតថា ក្នុងចំណោមអ្នករបួស មានមនុស្សចំនួន ១១នាក់ស្ថិតក្នុង ស្ថានភាពធ្ងន់ធ្ងរ។
តាមការដកស្រង់សម្តីរបស់សាក្សីម្នាក់ដែលមានឈ្មោះ Quynh បានឲ្យដឹងថា “នៅពេលដែលអគ្គិភ័យ ចាប់ផ្តើម ខ្ញុំតក់ស្លុត និងរត់រកកន្លែងសុវត្ថិភាព ប៉ុន្តែមិនបានចងចាំមូលហេតុបង្កនោះទេ”។
កាលពីថ្ងៃពុធ នាយករដ្ឋមន្ត្រីលោក Pham Minh Chinh បានបញ្ជាទៅក្រសួងការពារសុវត្ថិភាព សាធារណៈ និងអាជ្ញាធរខេត្តឲ្យស៊ើបអង្កេតពីមូលហេតុនៃអគ្គិភ័យនោះ។
លោក Chinh ក៏បានបញ្ជាឲ្យទីក្រុង និងខេត្តទាំងអស់ដែលស្ថិតនៅក្នុងប្រទេសវៀតណាម ដាក់ចេញនូវ ស្តង់ដារសុវត្ថិភាព នៅកន្លែងដែលងាយនឹងបង្កអគ្គ័យ រួមទាំងបារ karaoke ផងដែរ។
បារ karaoke មានប្រជាប្រិយភាពនៅប្រទេសវៀតណាម ប៉ុន្តែមានការព្រួយបារម្មណ៍អំពីស្តង់ដារ សុវត្ថិភាព។
ហើយកាលពីខែមុន មានអ្នកពន្លត់អគ្គិភ័យចំនួន ០៣នាក់ បានបាត់បង់ជីវិត នៅក្នុងអគ្គិភ័យក្នុងបារ karaoke មួយកន្លែងផ្សេងទៀត ៕
