ព្រះអង្គម្ចាស់ឆាល ព្រះមហាក្សត្រថ្មី នៃចក្រភពអង់គ្លេស
បរទេស៖ អង្គម្ចាស់ Charles ព្រះជន្ម៧៣ព្រះវស្សា គឺជាអ្នកឡើងស្នងរាជ្យ ហើយបានក្លាយជាព្រះមហាក្សត្រ Charles ទី៣ ក្រោយព្រះមហាក្សត្រី Elizabeth ទី២ បានសោយទិវង្គត ក្នុងព្រះជន្ម៩៦ព្រះវស្សា បន្ទាប់ពីបានឡើងសោយរាជ្យអស់រយៈពេល៧០ឆ្នាំ ។
ព្រះអង្គម្ចាស់ Charles ទី៣ ដែលជាបុត្រាច្បងរបស់ព្រះមហាក្សត្រី Elizabeth ទី២ បានមានបន្ទូលថា ការសោយទិវង្គតរបស់ព្រះមាតាជាទីស្រឡាញ់របស់ទ្រង់ គឺជាទុក្ខសោកដ៏ធំធេង សម្រាប់ទ្រង់ និងរាជវង្ស ហើយថា នេះគឺការបាត់បង់មិនអាចកាត់ថ្លៃបាន នៅជុំវិញពិភពលោក ។
ទង់សហភាពនឹងត្រូវបង្ហូតត្រឹមពាក់កណ្តាលដងនៅលើព្រះរាជដំណាក់ អគាររដ្ឋាភិបាល និងទូទាំងបន្ទាយកងកម្លាំងប្រដាប់អាវុធ ព្រមទាំងនៅលើប៉ុស្តិ៍ចក្រភពអង់គ្លេសនៅក្រៅប្រទេស។ ជាមួយគ្នានេះ នឹងមានការគោះជួងព្រះវិហារ និងការបាញ់កាំភ្លើង ខណៈអង្គការក្នុងស្រុក និងថ្នាក់ជាតិ ព្រមទាំងអង្គការសប្បុរសធម៌នានា ត្រូវរៀបចំវិធីគោរពវិញ្ញាណក្ខន្ធ ។
ផ្កា និងទៀនរាប់រយរាប់ពាន់ត្រូវបាន ប្រជាជនយកទៅដាក់នៅមាត់ច្រកចូល នៃវិមាន Buckingham នៅកណ្តាលទីក្រុងឡុងដ៍ នៅពេលផ្ទាំងប៉ាណូបញ្ចេញពន្លឺភ្លើងបង្ហាញការគោរពដឹងគុណនៅទូទាំងរដ្ឋធានី ជាមួយនឹងព្រះឆាយាល័ក្ខណ៍របស់ទ្រង់ ។
សូមជម្រាបថា ពិធីបុណ្យសពថ្នាក់រដ្ឋ សម្រាប់ព្រះមហាក្សត្រី Elizabeth ទី២ នឹងធ្វើឡើងក្នុងរយៈពេលពីរសប្តាហ៍ខាងមុខ ។
ព្រះអង្គម្ចាស់ឆាល Charles (Charles Philip Arthur George) បានក្លាយជាព្រះមហាក្សត្រថ្មីនៃចក្រភពអង់គ្លេស និងប្រទេសក្នុងវិសាលភាពចំនួន១៤ទៀត ដោយព្រះអង្គនឹងមានព្រះនាមថា Charles III ។ នៅព្រឹកថ្ងៃស្អែកនេះ ព្រះមហាក្សត្រថ្មី នឹងព្រះមហេសី និងយាងទៅកាន់ទីក្រុង ឡុងដ៍ ដើម្បីអោយនាយរដ្ឋមន្ត្រីចូលក្រាបបង្គំគាល់។
ព្រះមហាក្សត្រីយានី Elizabeth ទី ២ របស់ចក្រភពអង់គ្លេស បានសោយទីវង្គតក្នុងព្រះជន្មាយុ ៩៦ ព្រះវស្សានៅព្រះរាជដំណាក់ Balmoral របស់ព្រះមហាក្សត្រី ដែលស្ថិតនៅប្រទេសស្កុតលែន កាលពីថ្ងៃទី៨ ខែកញ្ញា ឆ្នាំ២០២២។ នេះបើតាមសេចក្តីប្រកាសរបស់ព្រះបរមរាជវាំង Buckingham។ តទៅនេះជាពីខ្លះពីដំណើរជីវិតរបស់ព្រះមហាក្សត្រីយានីក្នុងប៉ុន្មានឆ្នាំចុងក្រោយនេះ។
