អគ្គិភ័យឆេះអគារកម្ពស់ ៤២ជាន់មួយ នៅប្រទេសចិន

ប៉េកាំង: នៅល្ងាចថ្ងៃសុក្រទី១៦ ខែកញ្ញានេះ អគ្គិភ័យដ៏ធំសម្បើមមួយបានឆាបឆេះអគារខ្ពស់កប់ពពកមួយកន្លែង ដែលមានកម្ពស់ ៤២ជាន់នៅក្នុងទីក្រុង Changsha ខេត្ត Hunan ភាគខាងត្បូងប្រទេសចិន ខណៈដែលពុំទាន់មានសេចក្តី​រាយ​ការណ៍ពីមនុស្សស្លាប់ និងរបួសក្នុងហេតុការណ៍​នេះនៅឡើយទេ។

នាយកដ្ឋានពន្លត់អគ្គីភ័យរបស់ខេត្ត Hunan បាន​រាយការណ៍ថា ការស៊ើបអង្កេតបឋមបានបង្ហាញ​ថា ជញ្ជាំងខាងក្រៅនៃអគារកម្ពស់ ៤២ជាន់នេះត្រូវបានអគ្គិភ័យឆាបឆេះយ៉ាងសន្ធោសន្ធៅ ហើយថា ពេលនេះ អគ្គិភ័យត្រូវបានពន្លត់ហើយ តែមិនមានអ្នកស្លាប់ ឬរងរបួសត្រូវបានរកឃើញទេ។ ភ្លាមៗ រថយន្តពន្លត់អគ្គិភ័យចំនួន ៣៦គ្រឿង និងអ្នកពន្លត់អគ្គិភ័យចំនួន ២៨០នាក់ត្រូវបានអាជ្ញាធរបញ្ជូនទៅកាន់កន្លែងកើតហេតុ។

បើតាមប្រព័ន្ធផ្សព្វផ្សាយរដ្ឋ CCTV របស់ចិន ការិយាល័យរាប់សិបជាន់នៃអគារទូរគមនាគមន៍ចិន ដែលមានកម្ពស់ ២០០ម៉ែត្រត្រូវបានអគ្គិភ័យលេបត្របាក់យ៉ាងសន្ធោសន្ធៅ ធ្វើឱ្យមានផ្សែងខ្មៅយ៉ាងក្រាស់សាយភាយទៅលើផ្ទៃមេឃ។

ជាមួយគ្នានេះ ខ្សែអាតិ៍វីដេអូដែលថតបានដោយសាក្សីនៅនឹងកន្លែងកើតហេតុជាច្រើន ត្រូវបានបង្ហោះនៅលើបណ្តាញសង្គម ហើយត្រូវបានចែករំលែកបន្តយ៉ាងច្រើន ដែលបង្ហាញពីទិដ្ឋាភាពនៅខាងក្រៅអគារត្រូវបានអគ្គិភ័យឆាបឆេះសន្ធោសន្ធៅ៕