ផឹកស៊ីស្រវឹង យក កាំភ្លើងខ្លីភ្ជង់គំរាមប្រពន្ធ
រាជធានីភ្នំពេញ ៖ បុរសម្នាក់ ត្រឡប់មកពីផឹកស៊ីជាមួយមិត្តភក្ដិខាងក្រៅ មកដល់ផ្ទះវិញ បានជេរប្រមាថប្រពន្ធ រួចយកកាំភ្លើងដែលមិត្តភក្តិជាមន្ត្រីនគរបាលម្នាក់ផ្ញើទុក យកគំរាមបាញ់សម្លាប់ប្រពន្ធ ។ ដោយសារតែមានការភិតភ័យខ្លាចប្ដីខ្លាំងពេក ទើបស្ត្រីជាប្រពន្ធរត់ទៅប្ដឹងសុំការអន្តរាគមន៍ពីកម្លាំងនគរបាល ប៉ុស្តិ៍ចោមចៅ៣ ឱ្យជួយអនហតរាគមន៍ ចុះឃាត់ខ្លួនប្តី កាលពីវេលាម៉ោង២ និង៥០នាទីទៀបភ្លឺថ្ងៃទី២៧ កញ្ញា ស្ថិតនៅចំណុចមុខផ្ទះលេខ១១០ ក្នុងភូមិព្រៃព្រីងខាងជើង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
បុរសជាប្តី ឈ្មោះអ៊ិន សារិត អាយុ៣៥ឆ្នាំ ជាលក់ដូរ ត្រូវកម្លាំងឃាត់ខ្លួននិងដកហូតបានកាំភ្លើងខ្លី១ដើម ម៉ាកឡុកផលិតនៅប្រទេសអូទ្រីស បង់១ និងគ្រាប់ចំនួន១៥គ្រាប់។ រីឯប្រពន្ធឈ្មោះលី អៀង អាយុ៤៨ឆ្នាំ ជាអ្នកលក់ដូរដែរ។ អ្នកទាំង២នាក់នេះមានទីលំនៅក្នុងភូមិកើតហេតុខាងលើ។ កន្លងមក ប្ដីប្រពន្ធនេះ តែងតែឈ្លោះប្រកែកគ្នាជាញឹកញាប់ ខណៈពេលប្ដីផឹកស៊ីស្រវឹង ។ បច្ចុប្បន្ន នគរបាលប៉ុស្តិ៍ចោមចៅ៣ បានឃាត់ខ្លួនបុរសជាប្ដីនាំទៅសាកសួរ ដើម្បីកសាងសំណុំរឿងនៅប៉ុស្តិ៍តែម្ដង ។
បុរសជាប្តីបានសារភាពប្រាប់នគរបាលថា ពិតជាបានរករឿងជេរប្រមាថ និងគំរាមសម្លាប់ប្រពន្ធមែន ហើយចំពោះកាំភ្លើងដែលខ្លួនប្រើនេះ គឺជារបស់មិត្តភក្តិម្នាក់ ដែលជាមន្ត្រីនគរបាលនៅស្រុកសំពៅលូន ដែលជាប់រវល់ទៅប្រទេសថៃ បានយកមកផ្ញើឱ្យខ្លួនរក្សាទុកបណ្ដោះអាសន្ន ៕
