កម្លាំងអាវុធហត្ថខេត្តបន្ទាយមានជ័យ បញ្ជូនខ្លួនជនសង្ស័យម្នាក់ ករណីលួចIphone 12 pro max ទៅសាលាដំបូងខេត្ត
បនបន្ទាយមានជ័យ៖ កម្លាំងមូលដ្ឋានកងរាជអាវុធហត្ថក្រុងសិរីសោភ័ណ ដឹកនាំដោយលោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុង ចុះឃាត់ខ្លួនជនសង្ស័យម្នាក់ឈ្មោះ ហូរ សសុវណ្ណ ភេទប្រុស អាយុ២៩ឆ្នាំ ករណីលួចទូរស័ព្ទដៃ ដែលប្រព្រឹត្តកាលពីវេលាម៉ោង២២និង០០នាទី ថ្ងៃទី២១ ខែកញ្ញា ឆ្នាំ២០២២ នៅចំណុចផ្ទះសំណាក់នាគ២ ស្ថិតនៅសង្កាត់បឹងសាឡាង ខណ្ឌទួលគោក រាជធានីភ្នំពេញ ហើយរត់មកសម្ងំលាក់ខ្លួននៅក្នុងក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ត្រី យ៉ាន់ សុវណ្ណ បានឱ្យដឹងថា ការឃាត់ខ្លួនជនសង្ស័យខាងលើធ្វើឡើងតាមពាក្យបណ្តឹង របស់ជនរងគ្រោះឈ្មោះ នាគ រ៉ូម៉ានិន ភេទប្រុស អាយុ ៣០ឆ្នាំ មានទីលំនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ ។
លោករវសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានអាវុធហត្ថក្រុងសិរីសោភ័ណបានឲ្យដឹងទៀតថា កម្លាំងរបស់លោកសហការជាមួយកម្លាំងជំនាញការិយាល័យព្រហ្មទណ្ឌចុះប្រតិបត្តិការស្រាវជ្រាវ និងឈានដល់ការឃាត់ខ្លួនជនសង្ស័យឈ្មោះ ហូរ សសុវណ្ណ នៅចំណុចបេនឡានចាស់ ស្ថិតនៅភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ព្រមទាំងដកហូតវត្ថុតាងរួមមាន ១/.ទូស័ព្ទម៉ាកអាយហ្វូន (Iphone 12 pro max) ពណ៍ខៀវ ចំនួន ០១គ្រឿង (បានប្រគល់ជូនម្ចាស់ដើមវិញ) ២.ទូរស័ព្ទម៉ាក ស្មាត ពណ៌ខ្មៅ ចំនួន០១គ្រឿង ហើយនាំខ្លួនមកកាន់បញ្ជាការដ្ឋានកងរាជអាវុធហត្ថខេត្ត ដើម្បីធ្វើការសួរនាំនិងចំណាត់ការតាមនីតិវិធី ។
ជនសង្ស័យក្រោយពីសមត្ថកិច្ចជំនាញសួរនាំរួច បានឆ្លេីយសារភាពថា ខ្លួនពិតជាបានធ្វើសកម្មភាពលួចយកទូរសព្ទ័ដៃចំនួន០២គ្រឿង របស់ឈ្មោះ នាគ រ៉ូមាំនិន ពិតប្រាកដមែន ។
លោកវរសេនីយ៍ទោ ព្រហ្ម ថេង ប្រធានមន្ទីរស្រាជ្រាវ និងបង្ក្រាបបទល្មេីស កងរាជអាវុធហត្ថខេត្តបន្ទាយមានជ័យបានប្រាប់ឱ្យដឹងថា ការឃាត់ខ្លួនជនសង្ស័យខាងលើ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ ។
ដោយផ្អែកតាមចម្លេីយសារភាព រួមនឹងមានវត្ថុតាងផងនោះ ជនសង្ស័យត្រូវបានកម្លាំងការិយាល័យព្រហ្មទណ្ឌកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីហើយនៅព្រឹកថ្ងៃព្រហស្បតិ៍ ទី២២ ខែកញ្ញា ឆ្នាំ២០២២នេះ ។
