អង់គ្លេស បន្តពង្រីកកិច្ចសហប្រតិបត្តិការ ជាមួយកម្ពុជា ជាច្រើនវិស័យ

ញូវយ៉ក៖ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងថា នៅថ្ងៃទី២៨ ខែកញ្ញា ឆ្នាំ២០១៨នេះ រូបលោក បានជួបពិភាក្សាការងារជាថ្មីជាមួយលោក ម៉ាក ហ្វៀល អនុរដ្ឋមន្ត្រីក្រសួងការបរទេសចក្រភពអង់គ្លេស ទទួលបន្ទុកកិច្ចការអាស៊ី និងប៉ាស៊ីហ្វិក។

ឧបនាយករដ្ឋមន្ត្រី ប្រាក់ សុខុន តាមរយៈហ្វេសប៊ុក បានថ្លែថា”
ថ្ងៃនេះខ្ញុំបានជួបពិភាក្សាការងារជាថ្មីម្តងទៀត ជាមួយឯកឧត្តម ម៉ាក ហ្វៀល អនុរដ្ឋមន្រ្តីក្រសួងការបរទេសចក្រភពអង់គ្លេស ទទួលបន្ទុកកិច្ចការអាស៊ី និងប៉ាស៊ីហ្វីក ។ យើងបានធ្វើការផ្លាស់ប្តូរទស្សនៈ ស្តីពីបញ្ហាផលប្រយោជន៍រួម និងបានអះអាងជាថ្មីពីការតាំងចិត្តបន្តពង្រីក កិច្ចសហប្រតិបត្តិការជាក់ស្តែងលើវិស័យជាច្រើន”។

លោក ប្រាក់ សុខុន ដែលកំពុងមានបេសកកម្មនៅទឹកដីទីក្រុងញូវយ៉ក សហរដ្ឋមន្ត្រី ដើម្បីចូលរួមមហាសន្និបាតអង្គការសហប្រជាជាតិនោះ បានគូសរំលេចថា ក្នុងជំនួបជាមួយអនុរដ្ឋមន្ត្រីការបរទេសអង់គ្លេសនេះ សមភាគីទាំងពីរបានផ្លាស់ប្តូរទស្សនៈលើបញ្ហាដែលជាប្រយោជន៍រួម និងបានអះអាងជាថ្មីពីការតាំងចិត្តបន្តពង្រីកកិច្ចសហប្រតិបត្តិការជាក់ស្តែងលើវិស័យជាច្រើនផ្សេងទៀត។