ស្លាប់៤នាក់របួសធ្ងន់១នាក់ ក្នុងគ្រោះថ្នាក់ចរាចរណ៍ ៣ករណីក្នុងថ្ងៃតែមួយ

ស្នងការដ្ឋាននគរបាលខេត្តក្រចេះ បានឲ្យដឹងថា មនុស្សយ៉ាងហោច៤នាក់ ត្រូវបានស្លាប់និងមានម្នាក់ត្រូវរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍៣ករណី ដាច់ដោយឡែកពីគ្នា​ក្នុងថ្ងៃតែមួយទី២៨ កញ្ញា។

ករណីគ្រោះថ្នាក់ចរាចរណ៍លើកទី១​ បានកើតឡើងនៅព្រឹកថ្ងៃទី២៨ កញ្ញា ដោយសារជិះម៉ូតូដឹកឈើដួលដោយខ្លួនឯង បណ្តាលឲ្យបុរសជាអ្នកជិះម៉ូតូម្នាក់ ត្រូវបានស្លាប់ដោយសារម៉ូតូសង្កត់លើ នៅពេលជិះ ដួលនៅលើផ្លូវលំមួយកន្លែងនៅស្រុកចិត្របុរី។

ករណីគ្រោះថ្នាក់លើកទី២​ បានកើតឡើងនៅរសៀលថ្ងៃទី២៨ កញ្ញា នៅលើផ្លូវជាតិលេខ៧ ក្នុងឃុំដារ ស្រុកចិត្របុរី រវាងម៉ូតូបុកជាមួយម៉ូតូបណ្តាលឲ្យបុរស២នាក់ ត្រូវបានស្លាប់ភ្លាមៗ ខណៈបុរសម្នាក់ទៀតត្រូវរងរបួសធ្ងន់។

ករណីគ្រោះថ្នាក់ចរាចរណ៍លើកទី៣ បានកើតឡើងកាលពីវេលេា ម៉ោង៨យប់ថ្ងៃទី២៨ កញ្ញា នៅចំនុចភូមិថ្មី ឃុំសណ្តាន់ ស្រុកសំបូរ រវាងម៉ូតូបុកជាមួយនិងគោយន្ត បណ្តាលឲ្យបុរជាអ្នកជិះម៉ូតូម្នាក់ ត្រូវបានស្លាប់បាត់បង់ជីវិតភ្លាមៗនៅនិងកន្លែងកើតហេតុ។

ករណីគ្រោះថ្នាក់ចរាចរណ៍ដែលបានកើត មានទាំង៣ករណីខាងលើ ត្រូវបាននគរបាលជំនាញ​ វាយតម្លៃថា​កើតឡើងបណ្តាលមកពីការ បើកបរលើសល្បឿន ការបើកបរមិនគោរពសឹទ្ឋិ និងការបើកមិនមានការប្រុងប្រយ័ត្ន៕