ផ្ដល់ប្រាក់រង្វាន់ដល់កីឡាករជនពិការ ដែលបាបនមេដាយប្រាក់ ក្នុងការប្រកួតកីឡាជនពិការអាស៊ី

ភ្នំពេញ៖កីឡាជនពិការថុលរ៉ាដែតបានទទួលប្រាក់រង្វាន់លើកទឹកចិត្តពីរាជរដ្ឋាភិបាលកម្ពុជាក្រោយឈ្នះមេដាយប្រាក់១គ្រឿងក្នុងព្រឹត្តិការណ៍ប្រកួតកីឡាជនពិការយុវជន អាស៊ី នៅប្រទេសបារ៉ែន កាលពីឆ្នាំ២០២១ កន្លងទៅ។
ពិធីប្រគល់ប្រាក់រង្វាន់ក្រោមអធិបតីភាពលោកអ៊ុកសិទ្ធិជាតិអគ្គនាយកនៃអគ្គនាយក
ដ្ឋានកីឡានិងលោកយីវាសនាអគ្គលេខាគណៈកម្មាធិការជាតិប៉ារ៉ាឡាំពិកកម្ពុជានិងអត្តពលិកជនពិការជាច្រើនរូបទៀត នាថ្ងៃទី០១ ខែធ្នូ ឆ្នាំ២០២២ម្សិលម៉ិញនេះ។

លោកយីសុភក្រ្តាប្រតិភូដឹកនាំក្រុមអត្តពលិកបានអោយដឹងថាការប្រកួតកីឡាប៉ារ៉ាឡាំពិកយុវជន អាស៊ី នៅប្រទេសបារ៉ែន ឆ្នាំ២០២១ បានប្រព្រឹត្តទៅ កាលពីថ្ងៃទី២៧ ខែវិច្ឆិកា ដល់ថ្ងៃទី៨ ខែធ្នូ ឆ្នាំ២០២១ ដែលកម្ពុជាបានបញ្ជូនអត្តពលិក ១រូប និងប្រតិភូមួយក្រុម ចូលរួមក្នុងចំណោមអត្តពលិក មកពី៤៥ប្រទេសចូលរួម។
ជាលទ្ធផលអត្តពលិកជនពិការកម្ពុជា ថុល រ៉ាដែត ដណ្តើមបានមេដាយប្រាក់១គ្រឿង លើវិញ្ញាសា រត់១,៥០០ម៉ែត្រ លើប្រភេទពិការT៤៦។ ចំណែកឯ វិញ្ញាសា ២០០ម៉ែត្រ និង៤០០ម៉ែត្រ មិនទទួលបានមេដាយឡើយ។
លោកអ៊ុកសិទ្ធិជាតិអគ្គនាយកនៃអគ្គនាយកដ្ឋានកីឡាបានមានប្រសាសន៍ថាប្រាក់
រង្វាន់នេះគឺផ្តល់ជូនតាមគោលការណ៍ដែលបានស្នើសុំទៅចូលរួមប្រកួតច្បាស់លាស់ពីគណៈកម្មាធិការជាតិប៉ារ៉ាឡាំពិកកម្ពុជា ក្រសួងអប់រំយុវជន និងកីឡា បានរៀបចំទៅរាជរដ្ឋាភិបាល ហើយរាជរដ្ឋាភិបាល បានផ្តល់ថវិកាតាមគោលការណ៍កំណត់។

លោកបន្តថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន បានធ្វើអោយប្រទេសមានសន្តិភាព មានស្ថេរភាពនយោបាយ សេដ្ឋកិច្ចរីកចំរើន និងការអភិវឌ្ឍលើគ្រប់វិស័យ និងបានផ្តល់អាទិភាពដល់វិស័យកីឡា ផ្តល់ប្រាក់ឧបត្ថម្ភ តាមរយៈក្រសួងអប់រំ យុវជន និងកីឡា ដូចកីឡាករ កីឡាការិនីជម្រើសរើសជាតិ ស៊ីហ្គេម។

ការចូលរួមព្រឹត្តិការណ៍អាស៊ានប៉ារ៉ាហ្គេម លើកទី១១ នៅប្រទេសឥណ្ឌូនេស៊ី សម្តេចតេជោ បានចាត់ឯកឧត្តម ហ៊ុន ម៉ានី ដឹកនាំប្រតិភូ ជាមួយនឹងជោគជ័យគួរជាទីមោទន សម្រាប់ប្រទេសកម្ពុជាយើង។ សមិទ្ធផលនេះ ទទួលបានដោយសារកីឡាករកីឡាការិនីយើង មានសក្តានុពល បានបង្ហាញនូវសមត្ថភាព ទេពកោសល្យទោះបីយើងមានពិការភាពរាង្គកាយ តែចិត្តមិនពិការទេដោយបាននាំមកនូវកិត្យានុភាពជូនជាតិតាមរយៈការដណ្តើមបានមេដាយជាច្រើនគ្រឿង ក្នុងនោះ មេដាយមាស៧គ្រឿង ប្រាក់១០ និងសំរិទ្ធ១១គ្រឿង សរុប ២៨គ្រឿង៕