អាជ្ញាធរខេត្តកោះកុង ជូនដំណឹងអំពីការបិទនេសាទត្រីកាម៉ុង ដែនជម្រកសុវត្ថិភាពត្រីកាម៉ុង នៅពាមក្រសោប រយៈពេល ៤ខែ

កោះកុង ៖ បើយោងតាមលិខិតជូនដំណឹងរបស់រដ្ឋបាលខេត្តកោះកុង បានឱ្យដឹងថា ការធ្វើនេសាទត្រីកាម៉ុង នៅក្នុងដែនជម្រកសុវត្ថិភាពត្រីកាម៉ុង ពាមក្រសោប ដែលមានផ្ទៃក្រឡាទំហំ ១២៨៣ ហិកតា ស្ថិតនៅភូមិសាស្រ្តឃុំពាមក្រសោប ស្រុកមណ្ឌលសីមា និងឃុំកោះកាពិ ស្រុកកោះកុង ត្រូវបានហាមឃាត់ការនេសាទ ចាប់ពីថ្ងៃទី ០១ ធ្នូ ឆ្នាំ ២០២២ រហូតដល់ថ្ងៃទី ៣០ ខែ មីនា ឆ្នាំ ២០២៣។

រដ្ឋបាលខេត្តកោះកុង បានណែនាំប្រជាពលរដ្ឋ ដែលប្រកបរបរនេសាទត្រីកាម៉ុង នៅក្នុងតំបន់គ្រប់គ្រងដែនជម្រកសុវត្ថិភាពត្រីកាម៉ុងពាមក្រសោបទាំងអស់ ត្រូវបញ្ឈប់សកម្មភាពនេសាទជាកំហិត។

រដ្ឋបាលខេត្តកោះកុង សង្ឃឹមថា ពលរដ្ឋដែលប្រកបរបរនេសាទ នឹងចូលរួមអនុវត្ត ដើម្បីរួមចំណែកគ្រប់គ្រងផលស្តុកត្រីកាម៉ុង ឱ្យមាននិរន្តរភាពស្របតាមគោលនយោបាយវិស័យជលផលជាតិ និងធានាបាននូវប្រព័ន្ធអេកូឡូស៊ីដែនជម្រកសុវត្ថិភាព ត្រីកាម៉ុង ឱ្យល្អប្រសើរ លើកកម្ពុស់ជីវភាពរស់នៅរបស់ប្រជាពលរដ្ឋ និងសហគមន៍មូលដ្ឋាន។

ប្រជាពលរដ្ឋទាំងអស់ នឹងអាចនេសាទធម្មតាឡើងវិញ នៅពេលផុតរយៈពេលនៃការបិទនេសាទនេះ៕