នគរបាលជាតិ និងនគរបាលហុងកុង ផ្លាស់ប្ដូរយោបល់ និងដកពិសោធន៍ពីគ្នាទៅវិញទៅមក ពាក់ព័ន្ធកិច្ចសហប្រតិបត្តិការរក្សាស្ថិរភាពសន្តិសុខ និងបង្ក្រាបបទល្មើស
ភ្នំពេញ ៖ ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានទទួលជួបពិភាក្សាការងារ ជាមួយលោក Wong Wai ប្រធានអង្គភាពប្រឆាំងឧក្រិដ្ឋកម្មឆ្លងដែន និងបណ្ដាញសង្គមងងឹត នៃកងកម្លាំងនគរបាលតំបន់រដ្ឋបាលពិសេសទីក្រុងហុងកុង ដើម្បីផ្លាស់ប្ដូរយោបល់ និងដកពិសោធន៍ពីគ្នាទៅវិញទៅមក ពាក់ព័ន្ធកិច្ចសហប្រតិបត្តិការរក្សាស្ថិរភាពសន្តិសុខ និងបង្ក្រាបបទល្មើស ។ ជំនួបនេះបានធ្វើឡើងនៅអគ្គស្នងការដ្ឋាននគរបាលជាតិ នារសៀលថ្ងៃសុក្រ ទី១៧ ខែកុម្ភៈ ឆ្នាំ២០២៣។
បើតាមការចេញផ្សាយរបស់អគ្គស្នងការដ្ឋាននគរបាលជាតិ , នៅក្នុងជំនួបនេះផងដែរ ភាគីទាំងពីរបានយល់ស្របគ្នាពាក់ព័ន្ធស្ថានភាពបទល្មើសឆ្លងដែនដែលកំពុងមានការកើនឡើង គឺបទល្មើសឆបោកតាមប្រព័ន្ធបច្ចេកវិទ្យា ទូរគមនាគមន៍ និងបទល្មើសជួញដូរមនុស្សឆ្លងដែន ជ្រកក្រោមរូបភាពហត្ថពលករបរទេស ។
ឆ្លើយតបចំពោះបញ្ហាប្រឈមរួមគ្នានេះ ទាំងនគរបាលជាតិកម្ពុជា និងនគរបាលហុងកុង បានឯកភាពគ្នាបង្កើនការផ្សព្វផ្សាយលើកកម្ពស់ការយល់ដឹងប្រជាពលរដ្ឋ និងពង្រឹងវិសាលភាពសហប្រតិបត្តិការ ក្នុងការទប់ស្កាត់ និងស្រាវជ្រាវមុខសញ្ញាប្រព្រឹត្តបទល្មើសមានការចាត់តាំងទាំងនេះអោយមានប្រសិទ្ធភាព ៕
