បើកបរខ្វះការប្រុងប្រយ័ត្ន ថយរថយន្តទៅបុកលោកយាយម្នាក់ បណ្តាលឲ្យស្លាប់នឹងកន្លែង

កណ្តាល៖ លោកយាយម្នាក់​ ត្រូវបានស្លាប់គួរឲ្យអណោចអាធម នៅនឹងកន្លែង បន្ទាប់ពីមានរថយន្តមួយ ថយក្រោយដោយខ្វះការប្រុងប្រយ័ត្ន បានកិនជនរងគ្រោះ បណ្តាលឲ្យស្លាប់នៅនឹងកន្លែង ហេតុការនេះកើតឡើង កាលពីម៉ោងជាង៦ព្រឹក​ ថ្ងៃទី៨ខែតុលា ឆ្នាំ២០១៨ ស្ថិតនៅចំណុចផ្លូវលេខ34 ភូមិបាង ឃុំដើមឫស ស្រុកកណ្ដាលស្ទឹង ខេត្តកណ្ដាល។

នគរបាលបានឲ្យដឹងថា លោកយាយរងគ្រោះឈ្មោះ ផូ តុប អាយុ 83 ឆ្នាំ រស់នៅភូមិ ឃុំកើតហេតុខាងលើ ។ ចំណែករថយន្តបង្កម៉ាកហ៊ីយ៉ាន់ដាយ ដឹកទឹកកក ពណ៌សពាក់ស្លាក លេខភ្នំពេញ2N-2631 ។

នគរបាលបានបន្តទៀតថា មុនពេលកើតហេតុរថយន្តបង្កបើកបរ ក្នុងទិសដៅពីកើតទៅលិច លុះមកដល់ចំណុចកើតហេតុ បានឈប់រួចថយក្រោយ។ ចំណែកលោក យាយរងគ្រោះកំពុងដើរឆ្លងផ្លូវ ពីត្បូងទៅជើង ស្របពេលរថយន្ត ថយក្រោយមើលមិនទាន់ ជ្រុលទៅបុកលោកយាយ កំពុងដើរឆ្លងផ្លូវនោះស្លាប់ នៅនិងកន្លែង ភ្លាមនោះអ្នកបើកបររថយន្ត ព្យាយាមបើកររត់គេខ្លួនបាត់។ ក្រោយពេលកើតហេតុ នគរបាលបានបានកសាងសំណុំរឿង ដើម្បីចាត់ការទៅតាមនីតិវិច្បាប់៕