យន្តហោះ Boeing 747 នៃអាកាសចរណ៍ថៃ រអិលចេញពីផ្លូវ ក្នុងព្រលានយន្តហោះសុវណ្ណភូមិ
បាងកក៖ យន្តហោះខ្នាតធំប្រភេទ Boeing 747-400 មួយគ្រឿង នៃអាកាសចរណ៍ថៃ ដឹកមនុស្សសរុប ១១៦នាក់ (សហសេវិក ១៨នាក់) បានរអិលចេញពីផ្លូវចុះចត នៅក្នុងព្រលានយន្តហោះសុវណ្ណភូមិ នាក្រុងបាងកក កាលពីយប់ថ្ងៃទី៨ខែតុលា តែពុំបានបណ្តាលឲ្យមនុស្សណាម្នាក់ ទទួលរងគ្រោះថ្នាក់នោះទេ។
លោក Pratthana Pattanasirim ដែលជានាយកគ្រប់គ្រងផ្នែកស្តង់ដារសុវត្ថិភាពហោះហើរ និងសន្តិសុខថៃ បានឲ្យដឹងថា TG 679 បានរអិលចេញផ្លូវព្រលាន ក៏ព្រោះពេលវាព្យាយាមចុះចត កាលពីវេលាម៉ោង ១០៖៤៨នាទីយប់ថ្ងៃទី៨តុលា ពេលដែលអាកាសធាតុកំពុងតែមិនអំណោយផល ដោយមានភ្លៀង និងខ្យល់បោកបក់ខ្លាំង។ យន្តហោះនេះបានចាកចេញពីខេត្ត ក្វាងចូវ ប្រទេសចិនកាលពីវេលាម៉ោង ៨៖៥៨នាទីយប់៕
