កងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាម រកឃើញគ្រាប់មីនតោន ៨គ្រាប់, មីនថ្មើរជើង និងគ្រាប់យុទ្ធភណ្ឌជាង ២០០គ្រាប់ ក្នុងខេត្តក្រចេះ

ខេត្តក្រចេះ ៖ កម្លាំងជំនាញនៃ មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាម (NPMEC) កំពុងប្រតិបត្តិការបោសសម្អាតគ្រាប់មីន នៅភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ ដោយរកឃើញមីន ប្រភេទ TM 46 ចំនួន០៨គ្រាប់ ក្នុងរណ្តៅតែមួយ ជាប្រភេទមីនតោនប្រឆាំងរថគ្រោះ រថពាសដែក និងគ្រឿងចក្រធន់ធ្ងន់ ព្រមទាំងមីនប្រឆាំងថ្មើជេីង និងយុទ្ធភណ្ឌមិនទាន់ផ្ទុះសរុបចំនួន ២០៨គ្រាប់។

ប្រតិបត្តិការនេះបានចាប់ផ្ដើមកាលពីថ្ងៃទី១១ ខែមីនា ឆ្នាំ២០២៣ ដោយបានសហការជាមួយប្រជាពលរដ្ឋរស់នៅក្នុងមូលដ្ឋាន ភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ។

បើយោងតាមរបាយការណ៍មជ្ឈមណ្ឌលជាតិរក្សាសន្តិភាពបានបញ្ជាក់ថា ចាប់តាំងពីថ្ងៃទី២៧ ខែកុម្ភៈ ឆ្នាំ២០២៣ កងកម្លាំងបោសសម្អាតមីនរបស់ NPMEC បានទទួលបន្ទុកប្រតិបត្តិការបោសសម្អាតមីនសម្រាប់ដំណាក់កាលទី១ នៅលើផ្ទៃដី ១,០៣១,៨៨០ម៉ែត្រក្រឡា និងសម្រេចបានផ្ទៃដីបានចំនួន ៥៧០,៦៥៦ម៉ែត្រក្រឡា៕