ឃាត់ខ្លួនមន្ត្រីនគរបាលចរាចរណ៍៣នាក់ ដែលទារលុយ ពីជនជាតិចិន បើករថយន្តល្មើសច្បាប់ចរាចរណ៍
ព្រះសីហនុ៖ លោកឧត្ដមសេនីយ៍ទោ ជួន ណារិន ស្នងការនគរបាលខេត្តព្រះសីហនុ បានអោយដឹងនៅល្ងាចថ្ងៃទី១១តុលានេះថា ៖ មន្ត្រីនគរបាលចរាចរណ៍ ៣ នាក់ នៅស្នងការដ្ឋាននគរបាលខេត្តព្រះសីហនុ ដែលពាក់ព័ន្ធនឹងការជំរឹតយកលុយពីជនជាតិចិនបើកបរល្មើសច្បាប់ ត្រូវបានហៅមកសាកសួរ ក្នុងនោះ មានម្នាក់ដែលចេះចិន ត្រូវប្រឈមមុខនឹងការអនុវត្តន៍វិន័យនគរបាលជាតិលេខ ០០៦ ចំណែក ពីរនាក់ទៀត គ្រាន់តែធ្វើការអប់រំតែប៉ុណ្ណោះ ។
លោកឧត្តមសេនីយ៍បន្តថា កំពុងពិនិត្យមើល ទៅលើវិន័យរបស់កងកម្លាំង ០០៦ ថាតើពួកគេប្រព្រឹត្តល្មើសវិន័យទំហំប៉ុណ្ណា ទទួលពិន័យប៉ុណ្ណា នឹងអនុវត្តន៍វិធានការណ៍យ៉ាងម៉ឺងម៉ាត់បំផុត ទៅតាមវិន័យរបស់កងកម្លាំង ០០៦ ហើយស្អែកនេះ នឹងបញ្ចប់នីតីវិធី អំពីក្រុមប្រឹក្សាវិន័យរបស់ស្នងការនគរបាលខេត្តព្រះសីហនុ។
លោកឧត្តមសេនីយ៍បញ្ជាក់ថា ការដាក់ពិន័យនឹងធ្វើយ៉ាងម៉ឺងម៉ាត់នឹងត្រូវបំផុត ព្រោះតែនគរបាលទាំង៣នាក់ បានធ្វើឲ្យខូចនូវកិត្តិយស របស់កងកម្លាំងនគរបាលជាតិទាំងមូល។
មន្ដ្រីនគរបាលដែលទារលុយពីជនជាតិចិន នៅខេត្តព្រះសីហនុនោះ ឈ្មោះ សំ ពិសិដ្ឋ ឋានន្តរសក្ដិ ថ្នាក់អនុសេនីយ៍ត្រី ឋានៈមន្ត្រីនៅផ្នែកអន្តរាគមន៍ នៃការិយាល័យនគរបាលចរាចរណ៍ផ្លូវគោក របស់ស្នងការដ្ឋាននគរបាលខេត្តព្រះសីហនុ។ ប៉ុន្មានថ្ងៃនេះ មានការបង្ហោះ ផ្សព្វផ្សាយ ចែកចាយវីដេអូបន្ដគ្នា អំពីនគរបាលចរាចរណ៍ផ្លូវគោកម្នាក់ បានឃាត់រថយន្តមួយគ្រឿង បើកបរដោយជនជាតិចិន ទារលុយចំនួន១០០ដុល្លារ ក្រោយមកតថ្លៃសល់៥០ដុល្លារ ជាថ្នូរនឹងការមិនអនុវត្តច្បាប់ចរាចរណ៍៕
