អគ្គិភ័យសណ្ឋាគារកាំបូឌីយ៉ាណា មួយកន្លែង បណ្តាលឲ្យរងការខូចខាតសម្ភារៈមួយចំនួន
ភ្នំពេញ៖ ករណីអគ្គិភ័យដែលបានឆាបឆេះសណ្ឋាគារកាំបូឌីយ៉ា មួយកន្លែង និងសម្ភារៈក្នុងឃ្លាំងអស់មួយចំនួន កើតឡើងនៅតាមបណ្តោយផ្លូវព្រះស៉ីសុវត្ថិ ភូមិ១ ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ នាវេលាម៉ោង ៩និង៣០នាទីព្រឹក ថ្ងៃទី២៤ ខែមេសា ឆ្នាំ២០២៣នេះ និងប្រើប្រាស់ឡានទឹកជាង ១០គ្រឿង។ បើតាមសមត្ថកិច្ច ករណីអគ្គិភ័យខាងលើនេះ គឺបណ្តាលមកពីការឆ្លងចរន្តអគ្គិសនី។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់ឲ្យដឹងថា ក្រោយពីទទួលបានព័ត៌មានករណីអគ្គិភ័យនេះ លោកបានបញ្ជាកម្លាំងសមត្ថកិច្ចជំនាញ ធ្វើការចេញរថយន្តពន្លត់អគ្គិភ័យភ្លាមៗ ដើម្បីជួយអន្តរាគមន៍ឲ្យបានទាន់ពេលវេលា។ ដោយនៅក្នុងរង្វង់ប្រតិបត្តិការខាងលើនេះ កម្លាំងសមត្ថកិច្ចជំនាញរបស់យើងបានធ្វើការជួយសង្គ្រោះនារីម្នាក់ចេញមកខាងក្រៅ ក្រោយពីទទួលបានដំណឹងមានមនុស្សជាប់ខាងក្នុង។
ចំពោះករណីនេះដែរ គឺមិនបានបណ្តាលឲ្យមានមនុស្សស្លាប់ ឬរងរបួសមនុស្សណាម្នាក់នោះទេ។ ដោយក្នុងនោះបានបណ្តាលឲ្យខូចខាតសម្ភារៈក្នុងឃ្លាំងរួមមាន តុ កៅអីឈើ សាឡុង ព្រមទាំងសម្ភារៈមួយចំនួន នឹងពុំបណ្តាលឲ្យឆេះរាលដាលដល់អ្នកក្បែរខាងឡើយ។ នេះបើតាមការបញ្ជាក់បន្ថែម របស់លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ។
លោកវរសេនីយ៍ឯក ព្រហ្ម យ៉ន បានបន្តទៀតថា ករណីអគ្គិភ័យនេះ កម្លាំងសមត្ថកិច្ចបានបាញ់ទឹកពន្លត់ នៅវេលាម៉ោង ១០និង០០នាទីព្រឹក ក្នុងនោះសមត្ថកិច្ចបានប្រើរថយន្តការិយាល័យអគ្គិភ័យ ចំនួន ៧គ្រឿង ប្រើប្រាស់ទឹកអស់ចំនួន ៥ឡាន ដោយក្នុងនោះ រថយន្តជំនួយមានរថយន្តរបស់ក្រសួងមហាផ្ទៃចំនួន ០១គ្រឿង ពុំបានប្រើប្រាស់ទឹក, រថយន្ត OCIC ទីក្រុងកោះពេជ្រចំនួន ០២គ្រឿង ពុំបានប្រើប្រាស់ទឹក, រថយន្តទីក្រុង កោះនរាចំនួន ០១គ្រឿង ពុំបានប្រើប្រាស់ទឹក៕
