អគ្គិភ័យឆាបឆេះរោងចក្រ អឹស ស្តារ អេមប្រូរដឺរី

ភ្នំពេញ ៖ គ្រោះអគ្គិភ័យមួយបានឆាបឆេះរោងចក្រ អឹស ស្តារ អេមប្រូរដឺរី មួយកន្លែងយ៉ាងសន្ធោសន្ធៅ បង្កការភ្ញាក់ផ្អើលដល់ប្រជាពលរដ្ឋ និងអាជ្ញាធរមូលដ្ឋានចុះអន្តរាគមន៍ បាញ់ទឹកពន្លត់ ភ្លាមៗ។

ហេតុការណ៍នេះដែរបានកើតឡើង កាលពីវេលាម៉ោង ០១នឹង៤០នាទីរំលងអាធ្រាត្រឈានចូល ថ្ងៃសៅរ៍ ២០
ខែឧសភា ឆ្នាំ២០២៣ ស្ថិតនៅផ្លូវបេតុង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

បើយោងតាមការបញ្ជាក់ពីបុរសអាម្នាក់គាត់ជាកម្មករស្នាក់នៅកន្លែងកើតហេតុបានប្រាប់ឲ្យដឹងថានៅមុនពេលកើតហេតុគាត់ឮស្នូសំឡេងផ្ទុះចេញពីក្នុងរោងចក្របន្ទាប់មកគាត់ក៏បានក្រោកមកមើលស្រាប់តែឃើញអណ្ដាតភ្លើងឆាបឆេះយ៉ាងសន្ធោសន្ធៅភ្លាមនោះដែលរូបគាត់ក៏បានរាយការណ៍ទៅអាជ្ញាធរមូលដ្ឋានសុំរថយន្តពន្លត់អគ្គីភ័យមកជួយអន្តរាគមន៍ជាបន្ទាន់។

បន្ទាប់មកសមត្ថកិច្ចមូលដ្ឋានក៏បានទាក់ទងទៅខាងកម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ សុំរថយន្តពន្លត់អគ្គិសភ័យមកជួយអន្តរាគមន៍បាញ់ពន្លត់ភ្លាមៗផងដែរ

សមត្ថកិច្ចបានឱ្យដឹងថា រោងចក្រ រងគ្រោះដោយអគ្គិភ័យខាងលើនេះជាប្រភេទសំណង់: ថ្ម ប្រក់ស័ង្កសី ទំហំ ៣០ម៉ែត្រ X ៥០ម៉ែត្រ ដោយខូចខាតសម្ភារៈប្រហែល៣០ %, (ឆេះម៉ាស៊ីនប៉ាក់ចំនួន ១០គ្រឿង រួមនឹងសម្ភារៈមួយចំនួនទៀត) នឹងពុំបានឆេះរាលដាលដល់អ្នកក្បែរខាងឡើយ ។
សមត្ថកិច្ចបានបញ្ចាក់ថា ក្នុងហេតុការណ៍អគ្គិភ័យនេះ គ្មានមនុស្សស្លាប់ ឬរងរបួស មនុស្ស នោះឡើយ ដោយមូលហេតុ កំពុងស្រាវជ្រាវបន្ត ។ ក្នុងប្រតិបត្តិការ សង្គ្រោះអគ្គិភ័យនេះដែរ កម្លាំងជំនាញបានប្រេីប្រាស់រថយន្តការិយាល័យពន្លត់អគ្គិភ័យ ចំនួន ១៨គ្រឿង ប្រេីប្រាស់ទឹកអស់ចំនួន ០៩ឡាន ស្មើរនឹង ៣៦ម៉ែត្រគូប ។ ក្នុងនោះមានរថយន្តជំនួយ របស់រថយន្តក្រុមហ៊ុនឯកជនចំនួន០១គ្រឿង ប្រើប្រាស់ចំនួន ០១ឡាន ស្មើនឹង ០៦ម៉ែត្រគូប ៕