បឹងព្រែកទប់កំពុងរំកិលបាត់បង់ តើនរណា ជាអ្នកទទួលខុសត្រូវ
លោកពេជ្រ ស្រស់ ប្រធានគណបក្សយុវជនកម្ពុជា និងជាជាសមាជិក ឧត្តមក្រុមប្រឹក្សាពិគ្រោះ និង ផ្តល់យោបល់ នៅថ្ងៃទី១៥តុលា២០១៨ បានបញ្ចេញសារផេកហ្វេសប៊ុកថា បឹងព្រែកទប់កំពុងរំកិលបាត់បង់ តើនរណាជាអ្នកទទួលខុសត្រូវ? បើអនុក្រឹតក៏បានកាពារដែរនោះ លោករដ្ឋមន្រ្តី សាយ សំអាល់ គួរគិតយ៉ាងណា ស្របពេលលោកជាអ្នក ទទួលដឹងឮផងដែរ…..?
លោកបន្តថា ក្នុងនាមខ្ញុំជាសមាជិកឧត្តមក្រុមប្រឹក្សាពិគ្រោះ និង
ផ្តល់យោបល់មួយរូប សូមប្រឆាំងយ៉ាងដាច់អហង្ការ ចំពោះការចាក់ដី លុបបឹងព្រែកទប់ដែលស្ថិតនៅក្នុង ខេត្តព្រះសីហនុ ក្នុងន័យនេះដែរ ខ្ញុំសូមអំពាវនាវ ដល់អាជ្ញាធរគ្រប់ជាន់ថ្នាក់ ជួយទប់ស្កាត់សកម្មភាព
ការចាក់ដីលុបបឹងព្រែកទប់ផង ដោយហេតុបឹងព្រែកទប់នេះ មានសារសំខាន់ណាស់ សម្រាប់ពលរដ្ឋខ្មែរ រស់នៅក្នុងខេត្តព្រះសីហនុនេះ។
ចំណែកលោកវីល្លាម កាង បានសរសេរថា បឹងព្រែកទប់ក្រុងព្រះសីហនុ កំពុងបានត្រូវគេចាក់ដីលយ ចូលម្ដងបន្តិចៗក្រោមរូបភាពអភិវឌ្ឍន៍ , អាជ្ញាធរក្រុងព្រះសីហនុ ត្រូវពិនិត្យមេីលករណីនេះឲ្យមានប្រសិទ្ធភាព ក្រែងលោអភិវឌ្ឍន៍លយចូលបឹងដែលមានទំហំ ១៦,៣ ហិកតា ដែលកំពុងការពារដោយអនុក្រឹត្យ ១៨៧ អនក្រ ប្រក ។
ហ្វេសប៊ុក Vanny Seven បានលើកឡើងថា
ជិតរលាយរលត់បាន សម្រេចហើយ បើប្រឹងទាំងថ្ងៃទាំងយប់ម្លឹងៗនោះ បឹងព្រែកទប់នៅក្បែរអូរតែល៧ជាន់ ក្រុងព្រះសីហនុ ជាស្នាព្រះហស្ថរបស់សម្តេចឪ។ មតិខ្លះគិតថា ជាបឹងធម្មជាតិ តែការពិតជាដៃព្រែកសមុទ្រធម្មជាតិមែន តែបានកែប្រែ ពេលដែលសម្តេចព្រះនរោត្តមសីហនុ(សម្តេចឪយេីង) រៀបចំកសាងក្រុងកំពង់ផែសមុទ្រទឹកជ្រៅនេះឡេីង ក្រុមអ្នកវិស្វករ ស្ថាបត្យករ បានសាងសង់ទំនប់បង្ហៀរទឹក ដោយទប់ព្រែកនេះ នៅត្រង់ចំណុចស្ពានអូរតែលប្រាំពីរជាន់ ដេីម្បីយកទឹកប្រេីប្រាស់ផ្គត់ផ្គង់ ប្រជាពលរដ្ឋក្នុងក្រុងព្រះសីហនុ ដែលគេហៅថា(ព្រែកទប់ៗ) រហូតដល់សព្វថ្ងៃនេះ។
គ្រប់សម័យកាល បឹងនេះ មិនមានអ្នកណាហ៊ានបំផ្លាញ រំលោភបំពានលុប់យកឡេីយ តែឥឡូវនេះ ខ្ញុំមិនហ៊ានបញ្ចេញឈ្មោះចំៗទេ ព្រោះខ្លាចជេតរ៉ូយ ប៉ុន្តែគេដឹងគ្រប់ៗ គ្នាថា សុទ្ធតែជាមន្រ្តីធំៗ ឃុបឃិតគ្នា ទន្ទ្រានលុបយកបឹងនេះ ចែកគ្នា។ ល។
គ្រឿងចក្រស្តារបឹងបួរ ព្រែក ប្រឡាយ អូរ របស់រដ្ឋបាលខេត្តព្រះសីហនុ បានមកដល់ហើយ តែមេីលទៅ ដូចជាតូចៗពេក តេីកាយស្តារបឹងនោះរួចដែរ? បេីការចាក់ដីលុបបឹងនេះ នៅបន្តទាំងយប់ទាំងថ្ងៃដូចនេះ?
នេះបើតាមការបង្ហោះរបស់គណនី មួយដែលមានឈ្មោះថា យុទ្ធជន តេជោ បានបញ្ជាក់ថា “បឹងព្រែកទប់តំបន់ទឹកស្អាត១៦ហិកតា ដែលបន្សល់ទុកមក និងជាស្នាប្រហស្ថតាំងពីជំនាន់សម្តេចតា ឥឡូវលោកមេខេត្តបច្ចុប្បន្នគាត់ បានចាត់ចែងយកជាសម្បត្តិជឯកជនអស់១១ហិកតាហេីយ សល់តែ៥ហិកតាទៀតកំពុងចែកគ្នាតែមិនទាន់ដាច់ស្រេច តែយ៉ាងណាគង់តែអស់ជាមិនខាន ថ្ងៃអនាគតដ៏ខ្លីខេត្តព្រះសីហនុ ប្រឈមនឹងខ្វះទឹកស្អាតជៀសមិនផុត ក្រុមអ្នកបច្ចេកទេសជប៉ុន បានទៅសិក្សាហេីយ ទំហំដែលនៅសល់៥ហិតានោះ តូចពេក ទោះជាធ្វេីឱ្យជ្រៅយ៉ាងណាក៏មិនអាចផលិតទឹកស្អាតបានដែរ វាទាល់តែលោកឧកញ៉ា និងមន្ត្រីគ្រាក់ៗដែលងាប់ ទៅអាចយកទ្រព្យសម្បត្តិ ទៅតាមបានទាំងនោះ គាត់ព្រមប្រគល់មកឱ្យជាសម្បត្តិរដ្ឋវិញ ទេីបអាចផលិតទឹកស្អាតប្រេីប្រាស់ ក្នុងខេត្តវិញបាន តែមិនបាច់សង្ឃឹមទេ ព្រោះដីដែលគេបន្លំយកបាននោះកំពុងឡេីងថ្លៃកប់ពពកឯណោះ”។
បឹងព្រែកទប់ ត្រូវបានសម្តេចតេជោ ហ៊ុន សែន ចេញអនុក្រឹត្យ រក្សាការពារទុកជាតំបន់អភិរក្ស ប៉ុន្តែនៅតែមានអ្នកមានអំណាចចាក់រំលោភយក៕
