ឃាត់ខ្លួនជនសង្ស័យចំនួន១១នាក់ ករណីហឹង្សាបំផ្លាញទ្រព្យសម្បត្តិអ្នកដ៏ទទៃ
បន្ទាយមានជ័យ: អនុវត្តតាមបទបញ្ជាលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំងនគរបាលផែនព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុងសិរីសោភ័ណ ចុះស្រាវជ្រាវនិងឃាត់ខ្លួនជនសង្ស័យចំនួន ១១ នាក់ ពាក់ព័ន្ធករណីអំពើហិង្សា កាលពីថ្ងៃ ទី២៣ ខែឧសភា ឆ្នាំ២០២៣ វេលាម៉ោង ២០និង១៦នាទី នៅចំណុចតូបលក់ចាប់ហួយ ស្ថិតក្នុងភូមិអូរអំបិល សង្កាត់អូរអំបិល បង្កដោយក្មេងស្ទាវ២ក្រុម ក្នុងហេតុការណ៍នោះបង្កឲ្យមានអ្នករករបួសធ្ងន់ស្រាល។
ក្រុមទី១ ភាគីជនរងគ្រោះមានគ្នា ចំនួន៥នាក់ និង ក្រុមទី២ ភាគីជនបង្កមានគ្នា ១៦នាក់។ ក្រុមជនបង្កជិះម៉ូតូ៦ គ្រឿង ម៉ាកហុងដាឌ្រីម ៥គ្រឿង ម៉ាកស្កុបពី ១គ្រឿង ប្រដាប់ដោយកាំបិត ៤ដើម បានធ្វើសកម្មភាពយកដុំថ្មដេញគប់និងកាប់ទៅលើក្រុមទី១ បណ្ដាលអោយត្រូវដៃខាងឆ្វេង(ជនរងគ្រោះឈ្មោះ សមុទ្រភេទប្រុស) និងកាប់កំទេចម៉ូតូខូចខាតអស់ចំនួន ៣គ្រឿង។ ក្រោយកើតហេតុ ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យមិត្ដភាពកម្ពុជាជប៉ុនស្រុកមង្គលបូរី។
ចំណែកម៉ូតូខាងជនរងគ្រោះ១គ្រឿង ត្រូវបាន សមត្ថកិច្ចយកមករក្សាទុកនៅប៉ុស្ដិ៍នគរបាលអូរអំបិល។ ក្រោយទទួលបានព័ត៌មាននៅព្រឹកថ្ងៃ២៤ ខែឆ្នាំដដែល វេលាម៉ោង ៨និង ១៥នាទី កម្លាំងការិយាល័យព្រហ្មទ័ណ្ឌកំរិតស្រាល បានសហការណ៍ជាមួយកម្លាំងនគរបាលក្រុងសិរីសោភ័ណ ធ្វើការស្រាវជ្រាវ និងបានឃាត់ខ្លួនមុខសញ្ញាសង្ស័យបានជាបន្តបន្ទាប់ចំនួន ១១នាក់ យកមកសាកសួរនៅអធិការដ្ឋាន។ ជនសង្ស័យទាំងអស់នោះ បានសារភាពថា ពួកខ្លួនពិតជាបាននាំគ្នាទៅកាប់ជនរងគ្រោះ និងម៉ូតូ របស់ជនរងគ្រោះពិតប្រាកដមែន។ចំណែកបក្សពួក ៥នាក់ទៀតបានកំពុងរត់គេចខ្លួន។
បច្ចុប្បន្នក្រោយសួរនាំ ជនសង្ស័យរួមទាំងវត្ថុតាង ត្រូវបានកសាងសំណុំរឿងបញ្ជូនទៅតុលាការចាត់ការបន្តតាមច្បាប់៕
